Зуны улирал бол гарцаагүй амралт зугаалгын үе. Нар шарж, бороо орсон зуны эдгээр өдрүүдэд хүн бүр л гэр бүл, найз нөхдөөрөө цугларч, агаар салхинд гарч, амарч зугаалахыг хүсдэг. Мэдээж хэрэг аялал зугаалгын гол зоог бол хорхог шорлог гэх мэт махан хоол байдаг. Арааны шүлс асгармаар энэ амттай хоолнуудыг хийхэд хамгийн нэгдүгээрт анхаарах зүйл нь амттай шорлог хийхэд тохирох сайн мах сонгох юм. Хэрхэн шорлогны мах сонгох хийгээд өөр бусад юуг анхаарах хэрэгтэй болохыг харцгаая.
Юуны түрүүнд шорлог хийх мах шинэ бөгөөд залуу малын мах байх ёстой. Түүнчлэн махыг хөргүүрт хөргөсөн эсвэл ганцхан удаа хөлдөөсөн байх ёстой юм.
Шорлог хийх мах гахайны мах байвал тун сайн. Гахайн махнаас хүзүүний мах шорлогонд хамгийн тохиромжтой бөгөөд хүзүүний махаар хийсэн шорлог маш зөөлөн бөгөөд шүүслэг болдог. Мөн гол мах, хавирганы махыг ч ашиглаж болно. Ер нь аль болох өөх багатай мах сонгох хэрэгтэй.
Шорлогны махаа дундаж хэмжээтэй хэрчиж бэлтгэнэ. Хэт жижиг хэрчвэл мах шарагдах явцдаа хэт хуурай болдог. Хэт том хэрчвэл гадна тал нь түлэгдэж, голдоо түүхий болдог. Шорлогны махыг дөрвөлжин хэрчдэг гэсэн ойлголт хүмүүсийн дунд байдаг ч хамгийн төгс хэлбэр нь конус хэлбэрийн хэрчилт юм.
Шорлогны мах амттай, зөөлөн, сайхан үнэртэй болох нь хэрхэн дарж амталснаас мөн хамаардаг. Махыг дарж амтлах сав нь шил, шавар эсвэл паалан сав байх нь тохиромжтой. Амталгаанд хамгийн гол анхаарах зүйл нь яг шарахын өмнө давс хийсэн мах гайхалтай амттай болдог. Эрт давс хийснээр мах хуурай, шүүслэг бус болдог.
Исгэсэн бүтээгдэхүүнд суурилсан байдлаар амталснаар мах зөөлөн болдог. Мөн махандаа ханборгоцойн шүүс хийж, 1 цагийн турш байлгаад шарвал аманд ороод л уусах мэт сайхан амттай, зөөлөн болдог. Манайхны дунд шорлогны мах амтлахдаа цагаан цуу ашиглах явдал цөөнгүй байдаг. Гэвч энэ нь маш буруу юм. Цагаан цуу нь махны амт үнэрийг үгүй хийдэг. Махаа амталж дарах хугацаа аль болох урт байвал сайн. Шар айраг нь махыг маш сайн зөөлрүүлдэг төдийгүй үр тарианы өвөрмөц таатай амтыг нэмдэг. Эрдэмтэд махыг шар айргаар амталж дарснаар шарсан махан дахь карцероген буюу хорт хавдар үүсгэгч чанарыг багасгадаг болохыг олж тогтоосон.