Жаргалтай хосуудын нууцыг илчилсэн инфографик

Нийтлэгч: Жаргал

Огноо: 2014/12/02

Total1
1

Амьдралын мөн чанар хүн сэтгэл хангалуун, аз жаргалтай байх. Тэрхүү аз жаргалыг хүн хайртай хүнтэйгээ хамт бүтээдэг. Цаг хугацааны уртад хосуудын харилцаа нэг бол улам бүр бэхжиж байдаг бол эсрэгээр зарим нь нэг л мэдэхэд танихгүй хүмүүс шиг болчихсон байдаг. Тэгвэл хичнээн жил өнгөрсөн ч аз жаргалаар бялхаж, итгэл хайр нь улам бүр бэхжиж байдаг хосуудад ямар нууц хадгалагддаг болохыг энэхүү инфографикт харуулжээ.

Инфографикаас үзэхэд аз жаргалтай хосууд 1 сөрөг харилцан үйлдэл хийх бүрдээ 5 эерэг харилцан үйлдэл хийж байдаг бол салсан хосууд сөрөг харилцан үйлдэл бүрдээ 0,8 эерэг харилцаа гүйцэтгэж байдаг байна. Мөн судалгаагаар хамгийн чухал зүйл нь та хосынхоо сайн талыг яаж магтдаг явдал гэж тодорхойлжээ. Нэгэн судалгаагаар нэгнийхээ сайн талыг 7 хоногийн хугацаанд өдөрт 3 удаа магтдаг хүмүүс аз жаргалыг илүү ихээр мэдэрч, депресст өртөхгүй байдаг гэсэн дүн шинжилгээг гаргасан байна.

Таны амьдралын зам ямар ч байж болох ч хэрвээ гэрлэлт тань аз жаргал авчирдаг бол та амьдралын сэтгэл ханамж гэдэг томьёололд жилдээ нэмэлт 105,000 доллар олж байгаатай тэнцэхүйц үнэ цэнэтэй амьдралтай нэгэн байна гэсэн үг юм.

Хэдий хосууд секс, романтик байдал, дур хүслийн хувьд сэтгэл хангалуун байдлыг мэдэрдэг эсэхээс үл хамааран тэдний хоорондын нөхөрлөлийн чанар 70% байх нь гол тодорхойлогч хүчин зүйл болдог байна.

Аз жаргалтай хосууд 7 хоногтоо 5-аас дээш цагийг хамтдаа байж, ярилцаж өнгөрүүлдэг.

Аз жаргалтай хосууд гэгдэхийн тулд та өдөр бүр эерэг харилцан үйлдэл хийж байх учиртай. Үүнд магтах, талархлаа том жижиг ямар ч хамаагүй байдлаар илэрхийлэх, хөгжилтэй дурсамжуудаа сэргээх, өөрсөддөө таалагддаг ямар нэгэн зүйлийг хийх зэргээс гадна унтлагын өрөөнд хийх зүйлс ч багтдаг. Аз жаргал дүүрэн хосууд 7 хоногтоо 2-3 удаа секс хийдэг.

Харилцаандаа сэтгэл дүүрэн байдаг хосууд нэгнийхээ ялалт, амжилтыг өөрийн мэт баярлан хүлээж авдаг. Ингэхдээ баяр бахдалаа ил харуулах, асуулт тавих, хамтрагчдаа баяр хүргэх, хамтдаа юу хийснийг хийх гэх мэтээр өөрийн магтаалыг илэрхийлэх нь онцгой нөлөөлдөг байна.

Мөн хосууд хамтдаа шинэ зүйлийг үзэж, туулж, мэдрэх нь тэднийг бие биедээ улам бүр сэтгэл хангалуун болж, улам ихээр биесээ хайрлахад хүргэдэг аж. Үүнд оройд хамтдаа алхах, шинэ зоогийн газарт хамтдаа хооллох, урьд өмнө очиж байгаагүй газар очих, хамтдаа хоол хийх, тоглолт үзэх зэргээр харилцаагаа сайжруулах багтдаг байна.

Аз жаргалтай хосууд бие биендээ хамгийн сайныг нь өгөхийг чухалчилдаг ба нэгнийгээ өв тэгш хүн болоход нь аль болох туслахыг хичээдэг.

Жаргалтай хосууд маргалдах үедээ хурцадмал байдлыг аль болох багасгахыг хичээдэг. Тэд хошигнож, мэдрэмжээ илэрхийлж, бууж өгч чаддаг. Харин аз жаргалтай байдлыг мэдэрдэггүй хосууд маргалдахдаа шүүмжилж, зэвүүцлээ харуулж, нүдээ эргэлдүүлэн хамгаалалтын байдал гаргаж, дууддаг нэрээ өөрчилж, дууныхаа өнгийг өндөрсгөдөг.

Британид 20 жилийн турш явуулсан судалгаагаар дараах хүмүүсийг гэрлэлтэндээ хамгийн их сэтгэл ханамжтай, аз жаргалтай байдгийг тогтоожээ. Үүнд: гэрлээд 5 жил болоогүй байгаа хүмүүс, хүүхэдгүй хүмүүс, коллеж төгссөн хүмүүс, эрэгтэй нь ажилладаг хосууд.

Гэрлэлт нь дунджаар 2 жилийн хугацаанд хамгийн их аз жаргалтай байдаг ба түүнээс хойш хосуудын жаргалтай байдлын түвшин сүй тавихаас өмнө ямар байсан тэр хэмжээнд очих нь их байдаг байна. Аз жаргалтай гэрлэлт амьдралын сэтгэл ханамжинд жилдээ нэмж 105,000 доллар олж байгаатай тэнцэхүйцээр нөлөөлдөг бол гэр бүлийнхээ хүний үхэлтэй тулгарах нь жилдээ 308,780 доллар алдсантай адил нөлөөлдөг байна.

Хүүхдүүд хосуудын аз жаргалд нөлөөлдөг. Анхны хүүхэд төрсний яг дараахан хосуудын 33% нь өмнөх шигээ эсвэл өмнөхөөс илүү сэтгэл ханамжтай байдаг бол 67% нь эхнэр нөхрийн сэтгэл ханамжинд томоохон зогсолт мэдэрдэг байна. Мөн гэрлэсэн хосууд хүүхэд нь цэцэрлэг, сургуульд орох үед хамгийн аз жаргалгүй байдаг ба бага хүүхэд нь өсөхийн хэрээр аз жаргалын түвшин эргэн нэмэгдэж эхэлдэг.