Хүйтэн уур амьсгал биднийг өдрийн ихэнхи цагт гэртээ байлгаад зогсохгүй вирусны халдарт өртөмтгий болгож байдаг ажээ. Үүгээр ч зогсохгүй хүйтэн цаг агаар хүний биед тодорхой өөрчлөлтүүдийг ч дагуулдаг байна. Манай сайт уншигч танд өвлийн улиралд хүний биед ажиглагддаг 7 өөрчлөлтийг танилцуулж байна.
1. Хэлний үйл ажиллагаа хэвийн үеийнхээс ихэснэ
Хүйтэн уур амьсгал уруулыг хуурайшуулж эхэлдэг тул өвөл хэлээрээ уруулаа чийглэх үзэгдэл нэмэгддэг ажээ. Хэлээрээ уруулаа чийглэх нь богино хугацаанд танд таатай мэдрэмжийг өгөх хэдий ч цаашилбал уруул хагарах гол шалтгаан болдог байна. Учир нь шүлсэнд, урууланд харшлах олон тооны ферментүүд агуулагдахаас гадна маш хурдан ууршиж хатдаг тул уруулыг улам бүр хуурайшуулах нөхцлийг бүрдүүлдэг ажээ.
2. Шүд өвдөнө
Хэрэв таны шүд хэт мэдрэмтгий бол өвлийн улиралд гадуур явна гэдэг тун хэцүү гэдгийг сайн мэднэ биз ээ. Учир нь хэт хүйтэн агаар мэдрэмтгий шүдээр дамжин мэдрэлийн сувагт хүрснээр өвдөх шалтгаан болдог байна. Иймээс хэт мэдрэг шүдтэй хүмүүсийг ороолтоо амаа хааж зүүж байхыг шүдний эмч нар зөвлөдөг ажээ.
3. Цусан дахь сахарын хэмжээ нэмэгдэнэ
Сэрүүн уур амьсгал цусан дахь сахарын хэмжээг нэмэгдүүлдэг стрессийн гормоныг ялгаруулахад нөлөөлдөг ажээ. Хүйтрэх тусам хүний цусан дахь сахарын хэмжээ нэмэгдэж, гадагшаа гарах хүсэл багасч, дасгал хөдөлгөөн хийхээс төвөгшөөх хандлага гардаг байна. Иймээс мэргэжилтнүүд өвлийн улиралд хүмүүсийг цусан дахь сахарын хэмжээгээ тогтвортой байлгахын тулд дасгал хөдөлгөөн идэвхтэй хийж байхыг зөвлөдөг.
4. Жин хасна
Хүйтэнд хүний бие илчлэг ихээр шатааж эхэлдэг тул хүнд турах хандлага ажиглагдаж эхэлдэг. Учир нь хүйтэн цаг уурт хүний бие халуун ихээр ялгаруулж, дулаанаа хадгалахын тулд илчлэг шатаах үйл явц нэмэгддэг аж.
5. Үрчлээс нэмэгдэнэ
Цаг уур нүүрний үрчлээст шууд нөлөөлдөг гэх нь хэдийгээр өрөөсгөл ойлголт хэдий ч хүйтний улиралд арьс маш ихээр гэмтэж байдаг нь нууц биш. Агаарын чийгшил буурснаар арьс хуурайшиж, үрчлээс үүсэх магадлал өвөл цагт нэмэгдэж байдаг ажээ.
6. Хараа муудна
Өвлийн улиралд нарны хэт ягаан туяаны хамгаалалттай нүдний шил зүүх нь ховор байдаг тул хараа муудах эрсдэл үүнийг дагаж үүсдэг байна. Ялангуяа цасанд ойж буй нарны хурц туяа нүдэнд маш сөргөөр нөлөөлдөг. Эмч нар иймээс өвлийн улиралд гадуур гарахдаа хиймэл нулимс дусааж байхыг зөвлөдөг байна.
7. Биеийн чийгшил буурна
Өвлийн улиралд хөлөрч чийг алдах явдал бараг байдаггүй тул усны хэрэглээ мөн багасч эхэлдэг ажээ. Үүнээс үүдэлтэйгээр биеийн чийгшил буурч эхэлдэг байна.
Өвлийн улиралд таны биед дээрх шинж тэмдгүүд илэрч байсан уу? Хүйтэн уур амьсгалд хүний биед өөр ямар өөрчлөлт ажиглагддаг вэ?