26 жилийн турш аялахдаа мөрөн дээрээ аварга том загалмай үүрч явжээ

Зарим хүмүүс өөрийн итгэл үнэмшилд өөрийгөө бүрнээ зориулж чаддаг нь гайхмаар. Яг л сүүлийн 25 жилийн турш Дэлхийгээр тойрон аялахдаа аварга том загалмай мөрөн дээрээ үүрээд, өөрийг нь сонсохыг хүссэн хүн бүрт Есүсийн тухай ярьж өгч байгаа 60 настай Линдсей Хэмон Lindsay Hamon шиг. Тэрээр өөрийн итгэл бишрэлийг мөрөн дээрээ үүрээд Шинэ Зеланд, Румынь, Энэтхэг, Шри Ланк зэрэг 19 улс орнуудаар аялж яваа юм. Энэхүү гайхалтай аялалынхаа үеэр тэрээр хэзээ ч мартамгүй жинхэнэ гайхамшигтай үеүдийг туулж байсны зэрэгцээ хүнд хэцүү зүйлтэй ч тулгарчээ.Бангладешт чулуугаар шидүүлж, халдлагад өртсөн ч, Ромд Гэгээн Питерийн сүмээс хөөгдөж байсан ч өөрийн энэ ажлаа үргэлжлүүлэн хийхээс татгалзаагүй тэрээр 1987 онд аварга том загалмай үүрээд Дэлхийг тойрох даалгавраа эхлүүлсэн байна. Түүнээс хойш өдийг хүртэлх хугацаанд цөөхөн удаа загалмайгаа мөрнөөсөө буулгаж ирсэн Хэмоны самрын модоор хийсэн загалмай нь 3.6 метр болон 1,8 метрийн хэмжээтэй аж. Мэдээж хэрэг нэг үзүүр нь газраар чирэгдэж явах учир хялбар байлгах үүднээс сууринд нь дугуй хийж өгсөн ба Хэмон өдөрт 12 хүртэл цагаар үүнийгээ үүрэн явдаг байна. Хоёр хүүхдийн эцэг энэ эрхэм христийн шашны сургаалыг түгээгчийн үүрэгтээ нэн үнэнч зүтгэж байгааг нь үнэлсэн дэмжигчид, дагалдагчдаас хандив хүлээн авдаг ч Корнвалл дахь гэртээ гар хумхин суухыг хүсдэггүй бөгөөд гэр бүлийнхээ хэрэгцээний мөнгийг олохын тулд л ажил хийж, үлдсэн цаг заваараа загалмайгаа үүрэн аялдаг гэнэ. Заримдаа эхнэр, хүүхдүүдийнхээ төлөөнөө айх үе байдаг ч амь насаа аюулд учруулан байж ийнхүү аялах нь бурханд үнэнхүү итгэснээр бурхан өөрийг нь хамгаална гэдгийг мэддэг болсонтой холбоотой хэмээн тайлбарлах 60 настай энэ хүнээс юуны учир ийнхүү загалмай үүрэн алхаж байгааг гайхан асуух хүн бүртэй тэр гар барин мэндчилж, ерөнхий сайд ч бай, биеэ үнэлэгч ч бай өөрийг нь сонсохыг урьдаг бөгөөд ийнхүү аялахдаа янз бүрийн газарт зөвхөн аяны хөнжилдөө шургаад унтахаас өөр аргагүй нөхцөлд ч хоноглох нь байдаг. Гадаад орнуудад аялж яваад дээрэмдүүлэх гэх мэт аюултай учрах үе байдаг ч аялалаа зогсоодоггүй тэрээр ихэвчлэн англи хэлээр номлодог ба заримдаа хүмүүс хэлмэрчилж өгдөг байна. Хэмон одоогоор төрөлх Англи орондоо аялж байгаа ба Латви руу хийх аялалаасаа өмнө гэртээ нэг харих гэнэ. Хэмон загалмайгаа үүрээд Беларусь, Бангладеш, Болгар, Бельги, Герман, Франц, Голланд, Ирланд, Энэтхэг, Унгар, Непал, Шинэ Зеланд, Итали, Орос, Румынь, Польш, Шри Ланк, Словак, Нэгдсэн Вант Улсуудаар аялж байжээ.