ВВС Монгол улсыг аялал жуулчлалын хувьд доогуур үнэлэгддэг 5 орны нэг гэжээ

Нийтлэгч: Лука

Огноо: 2014/03/12

Total0
0

Британичууд зөвхөн цай уудаг, бүх Аргентинчууд танго бүжиглэдэг зэрэг тогтсон ойлголтууд нь тухайн улс орны жинхэнэ бодит өнгө төрхийг нууж байдаг талтай. Асуулт хариултын Quora.com сайт “Гадаадын жуулчин бүр таны эх орны талаар юуг мэдэх хэрэгтэй гэж бодож байна вэ?” гэсэн асуултыг тавьжээ. Зөв ойлголт эсвэл эх орноороо бахархах сэтгэлийнхээ алиныг нь хуваалцсан бай 600 гаруй хэрэглэгч өөрийн эх орны нэрийн өмнөөс санал бодлоо илгээсэн байна. Хэдийгээр бүх хариултыг жагсаах боломжгүй ч Quora-гийнхан зарим аялагчдын жагсаалтанд багтаагүй ч байж магадгүй улс орнуудын онцлууштай тал нь юу болохыг тодруулан тоймлосон нь Британий ВВС-гийн албан ёсны сайтнаа нийтлэгдсэн байна.

Монгол

Буддагийн төрсөн өдрийг тэмдэглэж байгаа сүсэгтэн Монголчууд /Taylor Weidman/LightRocket/Getty/

Ганбатын Амгалан гэгч Монгол залуу Чингис хааны үүсгэн байгуулсан дайнч үндэстэн гэх мэт Монголын түүхтэй холбоотойгоор дурдагддаг ерөнхий ойлголтыг түр хойш тавихыг яаравчилжээ. Тэрээр хэлэхдээ “Бид хэзээ ч Хятадын Цагаан хэрмийг барьсан тэдгээр залуус шиг харгис хэрцгий дайчид байгаагүй. Үнэн хэрэгтээ Монголчууд хамгийн найрсаг, хамгийн дөлгөөн тайван хүмүүсийн нэг байж чадна.” гэсэн байна. Түүнчлэн Амгалангийн хэлэхийг хүссэн бас нэгэн зүйл нь жуулчид Монголын үндэсний хамгийн том баярын нэг Наадмаар эртний нум сумаар харвахыг харах боломжтой гэдгийг дурджээ. Жил бүрийн 7-р сард болдог Наадмын үеэр мөн хурдан морь уралдах, Монгол бөхийн барилдааныг үзэхийг зөвлөсөн байна.

Монгол Наадмаар наадаж байгаа үндэсний хувцастай наадамчин болон уран нугараач /Bruno Morandi/Getty/

Мөн хүн амын 10-15% нь эртний нүүдэлчин ахуй, амьдралын хэв маягаа хадгалсаар байгаа ба орчин үеийн тохь тухтай байдлыг шүтэж эрхэмлэдэггүй ч дэлхий ертөнцөөс тасрахыг хүсдэггүй гэдэг нь өндөр хурдны интернэт болон хөдөөд ч гар утас, хиймэл дагуулын антенн бүхий зурагт, нарны энергийн хавтан зэргийг ашигладаг гэдгээр харагдана гэжээ.

Дашрамд дурдахад Ганбатын Амгалангийн Quora-д өгсөн хариултуудыг уншиж сонирхохыг хүсвэл дараах линкээр зочлоорой.

http://www.quora.com/Countries/What-do-you-think-every-foreigner-should-know-about-your-country/answer/AmgaIan-Ganbat?srid=u4Fo&share=1

Замби

Замби, Өмнөд Луангва үндэсний цэцэрлэгт хүрээлэн, Өмнөдийн зөгийгөөр хооллогч улаан бялзуухай /Mint Images/Art Wolfe/Getty/

Замби, Өмнөд Луангва үндэсний цэцэрлэгт хүрээлэн, цоохор ирвэс

Хэдийгээр эцэг эх нь Энэтхэгээс гаралтай боловч Пранеет Виззапу Африкын өмнөд хэсгийн далайд гарцгүй Замби улсад төрж, өссөн нэгэн. Түүний хамгийн түрүүнд хүмүүст мэдүүлэхийг хүсэж байгаа зүйл бол Замби бол аюулгүй, тайван улс гэдэг аж. Гэхдээ мэдээж хэрэг нэн тэргүүнд улсынхаа сонирхол татам газруудын тухай хүмүүст хүргэхийг хүсдэг. Замби улсынхаа онцлогийн нэгээхэн хэсгийг харуулахын тулд Виззапу төрөлх нутагт нь ургадаг дэлхий дээрх хамгийн том идэж болдог мөөг Termitomyces titanicus-ын зургийг илгээжээ. 12-оос 3-р сар хүртэл үргэлжилдэг Замбийн борооны улирлын үеэр ургаж, 1 метр хүртэл диаметртэй болдог энэ мөөгийг үзэхийг хүсвэл Замбийн хойд хэсэг дэх Mutinondo Wilderness хэмээх газар хүртэл аялах болдог байна.

Диаметр нь 1 метр хүртэл томордог Termitomyces titanicus мөөг /Herman du Plessis/Getty/

Магадгүй Замби нь Викториягийн хүрхрээгээрээ алдартай байж болох ч Виззапу аялагчдад Африкын хамгийн гайхалтай газруудын нэг болох Өмнөд Луангва үндэсний цэцэрлэгт хүрээлэн /South Luangwa National Park/ тийш хязгаараа тэлэхийг санал болгожээ. Тэрээр хэлэхдээ “Луангва гол орчмын онгон зэрлэг байгалийн цогцолбор нь Африкын хамгийн гайхалтай газруудын нэг.” гэсэн байна.

Луангва голыг туулж байгаа заан /Thomas Retterath/Getty/

Гайана

Гайанад байдаг шар зурааст, хорт сумт мэлхий /Kitchin and Hurst/Getty/

Гайанагийн Кайетур үндэсний цэцэрлэгт хүрээлэн, Кайетурын хүрхрээ /Mick Baines and Maren Reichelt/Getty/

Дханишри Нарине өөрийнхөө улсыг уншигчдад Африкт биш Өмнөд Америкт байдаг гэдгийг сануулахыг нэн тэргүүнд хүсчээ. Учир нь Гайана улсын шар, улаан, ногоон, хар өнгийн төрийн далбаа эсвэл Африкын Гвиней Бисау улстай төстэй сонсогддог нэрнээс болоод хүмүүс Африкын улс гэж бодох нь олонтаа байдаг аж. Тивийн умард хэсэгт байрладаг Гайана улс нь Англи, Франц, Испани, Нидерланд зэрэг хэд хэдэн орнуудад колоничлогдож байсан учир Өмнөд Америкчуудаас илүү Карибын өв соёл, уламжлал, итгэл үнэмшилтэй улс. Наринегийн хэлж байгаагаар Венесуэл, Суринам, Бразил зэрэг улсуудтай холбогдсон замуудтай болж байгаа нь тэдний соёлыг дахин өөрчлөх юм байх. Гайаначуудын гал тогооны түүхэнд олон улс үндэстний хоол хүнсний соёлын ул мөр шингэсэн байдаг. Энэтхэгийн роти, карри, Африкын олон төрлийн хүнсний ногоо, банштай шөл болох метернгие, Европын талхны чунз, бяслагны ороомог, Хятадын чоумейн буюу мах, ногоо, мөөгтэй шарсан гоймон зэрэг хоолнууд Гайанад байдаг гэж Нарине хэлжээ.

Гайанагийн Рупунуни голд байдаг Өмнөд Америкийн халуун бүсийн цэнгэг усны загас арапаймагийн махыг хатааж байгаа эмэгтэй /Danita Delimont/Getty/

Гайанад аялагчдын хувьд нэг азтай гэмээр зүйл нь тэд хоолоор дайлах их дуртай хүмүүс байдаг явдал аж. Мөн хэрвээ та манайхны хэн нэгнийх нь гэрт зочлох юм бол бид таныг эсэргүүцэхийн аргагүй болтол хоолоор дайлах болно гэсэн байна.

Казахстан

Казахстан, Астана, Ерөнхийлөгчийн ордон /Leon Neal/Getty/

Казахстан, зэрлэг морьдын сүрэг /Nutexzles/Getty/

Саша Барон Коэны Borat киноны ачаар Казахстаны иргэд кинонд дүрслэгдсэн зарим ташаа ойлголтуудыг засах ёстой гэдгээ ойлгожээ. Казахстан бол Боратаар бүтээгдээгүй, угаас байсан том орон гэж Берик Доссаев хэлсэн байна. Үүнийхээ баталгаа болгож 2022 оны Олимпийн наадмыг зохион байгуулах хүсэлтэй байгаа тус улсын хамгийн том хот болох орчин үеийн Алматы хотынхоо зургийг илгээжээ.

Казахстан, Алматы, Тусгаар тогтнолын өдөр /Christopher Herwig/LPI/Getty/

Бирма буюу Мьянмар улс

Эртний Баганд үүр цайж байгаа нь /117 Imagery/Getty/

Ази тивийн хамгийн баялаг археологийн дурсгалт газруудын нэг Баган /Santi Sukarnjanaprai/Getty/

Зүүн Өмнөд Азийн энэ улсын тухай Quora-гийн хэрэглэгч Эй Вай хэлэхдээ засгийн газрын авилга хээл хахууль, эмх замбараагүй байдлаараа мэдээлэгддэг ч одоогийн засгийн газар байдлыг дээрдүүлж байгаа гэжээ. Гэхдээ мэдээж өнгөрсөн үеийн олон асуудлуудыг одоо ч давж гарч чадаагүй байгаа юм байна. Вайгийн хувьд Нобелийн энх тайвны шагналт улс төрч До Аун Сан Су Чи шиг хүмүүс өнөөгийн нөхцөл байдлыг өөрчилж чадна гэдэгт итгэдэг гэдгээ хэлжээ. Түүнчлэн найрсаг зочломтгой ард түмэн, өв соёл, гайхалтай түүхэн газруудыг нь улсынх нь түүх тодорхойлохгүй гэдэгт итгэдэг гэсэн байна. Эх орны минь газар бүхэн үзэсгэлэнтэй хэмээсэн Вай эртний түүхт Баган хот, хүмүүсийн хандивласан 40 гаруй тонн алтаар бүтээгдсэн Алтан сүм /Shwedagon Pagoda/-г заавал үзэх хэрэгтэй гэжээ.

Алтан сүмийн дэргэдүүр явж байгаа буддист лам /Marjorie Lang/Getty/