Нэр өгөхөд учир бий

Нийтлэгч: Лука

Огноо: 2013/06/29

Total0
0

Монголчуудын хувьд шинэхэн төрсөн нярай үрдээ нэр өгөхдөө ихээхэн бодож тунгааж, өндөр ач холбогдол өгдөг уламжлалтай. Сүүлийн жилүүдэд үр хүүхэддээ нэр хайрлах явдалд залуус өөрийнхөөрөө хандаж, эрт цагийн хаад, хатад, алдартай баатруудын нэрийг их өгөх эсвэл бусдын чихэнд онцгой содон дуудагдах нэр өгөхийг эрмэлзэх болсон. Гадаадын улс орнуудын ард иргэдүүдийн хувьд ч ялгаагүй. Нэг их түгээмэл байсан нэрнүүд өөр цаг үед ховор болох жишээтэй. Бас л зарим хүмүүс этгээд содон нэрнүүдийг хүүхдүүддээ өгдөг. Тэгвэл барууны алдартнуудын дундаас хүүхдүүддээ хачин сонин магадгүй бүр тэнэг ч юм шиг нэр өгсөн хүмүүс цөөнгүй байдаг бөгөөд энд бид хүүхдүүддээ хамгийн хачин нэр өгсөн гэгддэг оддын зураг болон хүүхдүүдийнх нь нэрийг сонирхуулахаар бэлтгэлээ.

Ким Кардашиан /Kim Kardashian/, Кани Уэст /Kanye West/ нар шинэхэн төрсөн охиноо Норт Вест /North West/ гэж нэрлэжээ.

Гвинет Пэлтроу /Gwyneth Paltrow/, Крис Мартин /Chris Martin/ нар охиноо Эппл /Apple/, хүүгээ Мосес /Moses/ гэж нэрлэсэн. Юуны учир охиноо Алим хэмээн нэрлэх болсон талаараа Гвинет Опрагийн шоун дээр алимнууд маш амттай бөгөөд эрүүл гэж хариулсан байна.

Жейсон Ли /Jason Lee/ хүүдээ Pilot “Standard” Inspektor гэдэг нэр хайрлажээ. Яагаад гээч. Учир нь тэр Грандадди /Grandaddy/ хамтлагийн дууны “He’s simple, He’s dump, He’s the pilot” гэдэг мөрөнд дуртай гэнэ.

Николас Кейж /Nicolas Cage/ Супермэн комиксын гал улаан фен. Тиймдээ ч хүүдээ Супермэний хүүхэд ахуйн нэрийг хайрлаж, Kal-El гэх болжээ.

Виктория Бекхэм /Victoria Beckham/ охиндоо өөрийн хайртай зохиолч Харпер Ли /Harper Lee/-гийн нэрийг өгч, Харпер Севен /Harper Seven/ хэмээн нэрийджээ. Харин Севен гэдэг нь нөхрийнх нь тоглогчийн дугаар гэдгийг хүн бүхэн мэднэ.

Жүжигчин Алишиа Сильверстоун /Alicia Silverstone/ хүүгээ Хөх баавгай буюу Bear Blu Jarecki гэж нэрлэсэн.

Бейонсе /Beyonce/, Жей-Зи /Jay-Z/ нарын хувьд охиндоо Блю Иви /Blue Ivy/ гэдэг нэрийг өгөх нь зүйтэй гэж боджээ.

Жоли /Jolie/, Питт /Pitt/ нарын хүүхдүүдийн нэрний утга учрыг сийрүүлбэл, Maddox гэдэг нь өгөөмөр, сайхан сэтгэлтэй, Zahara нь гэрэл гэгээ, Shiloh Nouvel гэдэг нь еврей сударт гарах хотын нэр мөн мэдээ гэсэн утгатай үг, Pax энх тайван гэсэн утгуудыг тус тус илэрхийлдэг аж. Харин Vivienne Marcheline гэдэг нэр Анжелина Жолигийн ээжийн хүндэтгэлд зориулагдсан байна.