Хамгийн күүл загвартай стресс арилгагч бөмбөгнүүд

Нийтлэгч: Лука

Огноо: 2013/07/01

Total123
123

Ихэвчлэн долоон сантиметрээс ихгүй диаметртэй зөөлөн, уян тоглоомыг стресс арилгагч бөмбөг буюу stress ball гэж нэрлэдэг. Гартаа атган базсанаар стрессийг арилгаж, гарын булчинд дасгал болох шидтэй энэхүү бөмбөгний олон төрлүүд байдаг ба хөөсөн резинэн бөмбөгнүүд олон. Мөн хөөсөн дотор шингэн бүрдэл хэсгийг шахаж өгсөн хэлбэртэй ч байдаг. Түүнчлэн янз бүрийн нягтаршилтай гелийг шахсан эсвэл резин дотор жижиг хэсгүүд бүхий нунтаг хийсэн, доторх шингэн дотор нь жижиг тоглоом гэх мэтийг хийсэн гэхчилэн олон янз хэлбэртэй байдаг. Хэдийгээр хэлбэр байдлын хувьд олон төрөл байдаг ч үндсэндээ стресс арилгах үүрэгтэй энэхүү шидэт бөмбөгний хамгийн күүл /cool/ хэлбэр, загвартай бөмбөгнүүдийг гэрэл зураг хэлбэрээр та бүхэнд танилцуулж байна.

Стресс арилгагч бөмбөг гэхээсээ Айлгах бөмбөг гэж нэрлэвэл зохилтой энэхүү шинэ стресс боллыг Horribal гэж нэрлэдэг. Үүнийг хэн нэгнийг чадах, шоглоход ашиглавал илүү тохиромжтой. Жирийн л нэг стресс арилгагч бөмбөг гэж бодсон таны хохирогч бөмбөгөө атгатал цус шиг шингэн дотроос харх, ялаа, өт хорхой, жоом тэргүүтэн ярзайтал гараад ирнэ гээд бод доо. Үнэхээр заваан, зальтай наргиа байгаа биз.

Као Мару Стресс болл /Cao Maru Stress ball/-ыг Макико Ёшида /Makiko Yoshida/ гэдэг хүн зохион бүтээсэн бөгөөд бүхэл өдрийн турш үүнийг чимхэж, шахаж, атган хөгжилтэй, хачин жигтэй, марзан дүр төрхийг харах зуураа стрессээ арилгах боломжтой.

Stressticles нэртэй энэхүү бөмбөг оффист ажилладаг эрэгтэй эмэгтэй ямар ч хүнд үнэхээр хөгжилтэй бэлэг болох болно. Хэдэн мянгын үнэтэй эмчилгээнд мөнгөө үрэхийн оронд Stressticles-ийг атгаад л бүтэн өдрийн стрессээ тайлах нь хамаагүй үр дүнтэй бас эдийн засгийн хэмнэлттэй юм.

Оддын дайны хорхойтнуудад хайртай киноныхоо сөрөг дүрийн баатрыг няц атгаж, стрессээ тайлах боломжийг Darth Vader Stress Ball олгох болно. Оюун санаандаа энх тайвныг тогтоох онцгой арга барил шүү.

Харахад зүгээр л нэг стресс арилгагч бөмбөг, харин түүнийг гартаа чанга гэгч нь атгахад та атга дүүрэн усан үзэмтэй болно. Сонирхолтой хэрэг шүү. Энэ бол Neon Mesh Ball стресс арилгагч бөмбөг. Амттай харагдаж байгаа биз.

Neon Mesh Ball бөмбөгтэй энэ араг ясны дээд хэсгээс ил харагдах тархины хэсэг төстэй харагдаж байгаа биз. Тэгэхээр үүнийг атгахад ямархуу байдалтай харагдах нь бараг төсөөлөгдөх байх гэж бодож байна. Тийм ч аятайхан биш боловч стрессийг маш сайн арилгана.

Ялагдаж, дарамтанд орсон мэт санагдаж байна уу? Ажил дээрээ сэтгэл санаагаар уначихаад байна уу? Компьютерынхоо дэлгэцийг хага цохичихмоор байна уу? Тэгвэл та стресс бухимдал, ядаргаагаа хөөрхий хөгшин Полд гаргаарай. Paul-ыг ажлынхаа ширээн дээр, халаасандаа, цүнхэндээ хаана л бол хаана авч явж болно. Тэгээд хүссэнээрээ стрессээ тайл.

Арван жентлемен эрийн ес нь амьд байгалийн төгс стресс тайлагч бөмбөг гэж бүсгүй хүний цээжийг үздэг. Харин түүнийг цаг үргэлж авч явах боломжгүй. Гэхдээ шийдвэрлэж болох арга зам байна. Энэ бол Stress Chest нэртэй, хөхний хэлбэртэй стресс тайлагч бөмбөг юм. Зөөлхөн, яг л жинхэнэ юм шиг энэ бөмбөгнөөс нэг нэгийг хоёр гартаа атгаад базаад байвал таны стресс ор сураггүй алга болно.

Алтлаг өнгөнд дуртай олон хүн бий. Мөн хүний гавлын яс сонирхдог хүмүүс ч цөөнгүй. Тэгвэл алтан өнгөт гавлын ясан стресс тайлагч бөмбөг байвал ямар вэ? Golden Skull Foam Prop стресс тайлагч бөмбөгний хамгийн гол онцлог нь хэмжээ бөгөөд стресс тайлагч бөмбөгний хэмжээнээс хавьгүй том буюу гавлын ясны бодит хэмжээ бүхий энэ бөмбөгийг ширээн дээрээ тавьчихаад үе үе хоёр гараараа базаж байхад стресс гэдэг зүйлийг мартах болно.

Өнөө цагт олонх хүн компьютерын дэлгэц ширтэж суудаг ажилтай болсон. USB Stress Ball нэртэй, USB залгуур бүхий энэхүү стресс тайлагч бөмбөг компьютерын ард суугаа хүмүүсийн зөвхөн биеийн ачаалал, стрессийг арилгаад зогсохгүй зарим виртуал стрессийг маш сайн арилгаж чадна. Танд таныг залхаасан мэйл, захианууд ирэх бүрт та энэ бөмбөгөө базах хэрэгтэй. Та тэдгээр захиануудад оюун санааны хувьд ялагдаж, залхсан мэдрэмжээ USB Stress Ball-ын тусламжтайгаар үгүй хийх болно.