Та дараах үйлдлүүдийн аль нэгнээр өглөөг эхлүүлдэг юм биш биз?

Нийтлэгч: Лука

Огноо: 2014/03/17

Total0
0

Ямар ч төрлийн ажил хөдөлмөр эрхэлж байгаа хүмүүсийн хувьд өглөө эрт босч, ажлаа эхлүүлэх нь их чухал зүйл. Ялангуяа хувиараа бизнес эрхлэгчдийн хувьд өглөө орноосоо өндийхөөс эхлээд цагийг үр дүнтэй өнгөрүүлэх нь онцгой ач холбогдолтой зүйл. “Үр бүтээмжтэй байдлын 7 нууц” номын зохиолч, бизнес эрхлэгчдэд зориулсан үр дүнтэй байдлын зөвлөх Hillary Rettig шинэ өдрийн эхний 15 минут их чухал болохыг дурджээ. Түүний хэлснээр олонх хүний хувьд өглөө нь хамгийн эрч хүчтэй, сэргэлэн цовоо үе байдаг, цагийг сайн төлөвлөдөг менежерүүдийн хувьд цагийн өчүүхэн хэсэг бүр үнэ цэнэтэй байдаг, та гэртээ ч бай, ажил дээрээ очсон ч бай эхний хэдхэн минут л маш чухал байдаг гэнэ. Энэ үнэ цэнэтэй хугацааг ач холбогдол багатай зүйлд зарцуулснаар өдөр тиймэрхүү байдалтай өнгөрдөг аж. Дараах 5 зүйл нь таны үр дүнтэй цагийг үгүй хийж байгаа зүйлс юм байна.

1. Цахим орчинд холбогдох

Сэрмэгцээ ахилгаан шуудангаа эсвэл олон нийтийн сайт шалгах нь ердийн үзэгдэл болсон. Гэхдээ хэдхэн л минут болно гэж та бодсон ч нэг л мэдэхэд хэдэн цаг болох нь бий. Rettig 10 цаг хүртэл интернэтэд орохгүй байхыг зөвлөдөг аж. Тэрээр “Интернэтийн татах орчинд автах нь маш амархан. Ажлын өглөөгөө хамгаалах нь чухал учир бусад зүйлсийг хойшлуулж сураарай.” гэж хэлдэг байна.

2. Зурагт асаах

Олон хүний хувьд өглөө шүршүүрт орох, зурагт үзэх, өглөөний цай уух, зурагт үзэх, нохойгоо салхилуулах, зурагт үзэх байдаг. Олон хүний хувьд зуршил болсон зурагт үзэх явдал нь бидний хийх ёстой зүйлсийг мартагнуулж байдаг гэж Rettig хэлжээ. Түүнд бүү авт, унтраагаад орхиж сур, энэ бол Rettig-ийн зөвлөгөө. Хэрвээ та ямар нэгэн дуу чимээ сонсож байхыг хүсэж байгаа бол зурагтны оронд хөгжим сонсох нь хавьгүй дээр гэсэн байна.

3. Дасгал, хөдөлгөөнийг алгасах

Өглөөний дасгал нь цусны эргэлтийг сайжруулж, ажиглах, бодох чадварыг нэмэгдүүлдэг. Хэрвээ та хөлрөх эсвэл урт хэмжээний дасгалд дургүй бол сунгалт, суниалтын дасгал, бүжгээр өглөөг эхлүүлж болно. Хэрвээ та бүхэл өдөржин сууж ажилладаг бол ямар нэгэн төрлийн дасгал хөдөлгөөн танд тун тустай.

4. Утсаар ярих

Rettig-ийн хэлснээр “Утас нь үнэхээр их садаатай зүйл, хамгийн богинохон дуудлага ч таны анхаарлыг сарниулж дөнгөдөг” гэнэ. Тиймээс өглөөний хэдэн цагтаа утсаар ярихгүй байхыг эрмэлзэх хэрэгтэй юм байна.

5. Зогсоох аргагүй эсвэл айдас төрүүлсэн ажлаа эхэлж хийх

Эерэг нөлөө үзүүлэх ажлаа эхэлж хийхийг Rettig зөвлөжээ. Жишээлбэл танд хоёр худалдааны дуудлага байгаа бол хамгийн амжилттай болох магадлалтайг нь эхлэх хэрэгтэй. Тэгвэл нь энэ таныг урамшуулан зоригжуулах болно гэсэн байна.

Энэхүү зөвлөгөөг 20 гаруй жилийн турш бизнес, үл хөдлөх хөрөнгө, амьдралын хэв маягийн талаар бичиж байгаа чөлөөт сэтгүүлч Stephanie Vozza бичжээ.