Аав нь уурхайн ээлжнээсээ буугаад гар, нүүрээ ч угааж амжилгүй хүүтэйгээ цуг шууд тэмцээн үзэхээр явжээ. Ингээд тэр интернэтийн од болсон юм

Саяхан сошиал сүлжээнд Кентуккигийн их сургуулийн сагсан бөмбөгийн багийн тоглолтын үеэр дарсан нэгэн гэрэл зураг вирус шиг тарлаа. Гэрэл зураг дээр хүүгээ дагуулсан нэгэн хөгжөөн дэмжигч харагдана. Гэхдээ тэр хөгжөөн дэмжигч эрийн хувцас нь бохир заваан, гар, нүүр нь нүүрсний тоос шороонд дарагдаж халтартсан байв. Бид тухайн гэрэл зураг яагаад их алдаршсаны учрыг олохоор шийдсэн юм.

Уг гэрэл зургийг дэргэд нь сууж байсан хөгжөөн дэмжигч бүсгүй дарсан бөгөөд хэрвээ Kentucky Wildcats багийн ахлах дасгалжуулагч Жон Калипари репост хийгээгүй бол анзаарагдахгүй өнгөрөх байлаа. Жон гэрэл зураг дээр юу болсныг илүү тодорхой тайлбарласан байв. Энэ эр ээлжнээсээ буугаад тэмцээн үзэхээр шууд яаран ирсэн бололтой. Тэр хүүтэйгээ цуг тоглолт үзэхийг ихэд хүссэн нь тодорхой. Даанч шүршүүрт орж хувцсаа солих цаг түүнд олдсонгүй. Тийм учраас л ийм байдалтай тэмцээн дээр иржээ. Дасгалжуулагч хөгжөөн дэмжигчийн хүсэл сонирхлыг үнэлж дараагийн тэмцээн үзэх VIP тасалбарыг гэр бүлд нь гардуулж өгөхөө амласан байна.

Гэрэл зураг алдаршсан тул хөгжөөн дэмжигчийн гэр бүлийн хүн ч илүү дэлгэрэнгүй тайлбар хийхээр шийджээ.  Twitter-ийнхээ өмнөх аккаунтыг алдсан байсан тул шинэ аккаунт нээхэд хүрсэн. Хөгжөөн дэмжигчийн эхнэрийг Молли гэх бөгөөд маш хурдацтай тарж байгаа гэрэл зураг дээр нөхөр Майкл Макгуайр, түүний гурван настай хүү Истон нар буусныг тайлбарлав. Аав нь хүүгийнхээ анхны сагсан бөмбөгийн тэмцээнийг цуг үзнэ гэж амласан байжээ. Уурхайчны ээлж их орой тарсан тул Молли хүүтэйгээ цуг хоёулаа спортын ордонд очиж дараа нь аавтайгаа уулзсан байна. “Тэмцээн эхлэхээс өмнө Истонтой цуг байх нь түүний хувьд хамгийн чухал зүйл байсан юм” гэж эмэгтэй бичсэн байв.

Гадаад байдлаараа бусдаас ялгарах энэ эрийн гэрэл зургийг Кентукки багийн үнэнч хөгжөөн дэмжигч Сью Киннер дарахаар шийджээ. “Тэр чигтээ бохир заваан эр байсан, нүүр нь тоос шороо болсон. Их ядарсан болов уу гэмээр царайтай, гэхдээ хүүгээ харах бүрдээ инээмсэглэл тодруулна. Харин хүү аавынхаа өвөр дээр эрхлээд л. Тэд үнэхээр аз жаргалтай харагдсан юм” Сью сэтгүүлчдэд өгсөн ярилцлагадаа дурджээ.

Сошиал сүлжээ хэрэглэгчдэд энэ эрийн түүх ихэд таалагджээ. Хүнд ажлын дараа ядарсан ч гэлээ хүүтэйгээ цуг сагсан бөмбөгийн тэмцээн үзэх цагийг гаргаж чадсан эцэг хүнээр хэн ч бахархана. “Тэр энэ дэлхий дээрх хамгийн шилдэг аав” гэж Молли хэлсэн юм.

Танд энэ түүх таалагдав уу? Та хүүхэдтэйгээ цуг цагийг хөгжилтэй өнгөрөөхийн тулд ажлын бохир хувцастайгаа ирж чадах уу?

84

Гоё

13

Хөөрхөн

6

Бахархмаар

5

Гайхмаар

4

Буруу

1

Тэнэглэл

1

Харамсалтай

1

Ха Ха

Баярлалаа!