“YouTuber”-үүд ямар ч энгийн зүйлийг өөр өнцгөөс харуулах гайхалтай чадвартай бөгөөд бид тэдний аливаа зүйлийг харуулж буй хэлбэрт өөрийн мэдэлгүй татагддаг. Харин “YouTube”-ийн “BBC Earth Unplugged” сувгаар цацагдсан энэ видео бол тэдгээр сайн жишээнүүдийн нэг юм.
“Oli Martin” хэмээх нэртэй нэгэн сувагт дулаан мэдрэгч камер ашиглан хүйтэн орчинд хүний бие дулаанаа хэрхэн алдаж буйг харуулсан бичлэг хийжээ.
Ингээд үр дүнг нь харцгаая!
“Оли Мартин цэргийн тусгай зориулалт бүхий “Selex Merlin” дулаан хэмжигч камер ашиглан Шотландын өндөр уулын хүйтэн цаг уурт хүний бие дулаанаа хэрхэн алдаж буйг харууллаа” хэмээн видеоны тайлбар хэсэгт бичжээ.
Видео бичлэгийн эхэнд өвлийн зузаан хувцас өмссөн залуу камерын өмнө зогсож байх бөгөөд дараагаар нь тэр биеийн температурын өөрчлөлтөө харуулахын тулд хэсэг хугацааны дараа хувцсаа тайлж эхэлсэн байна.
“Миний арьсан дээр үүссэн толбонууд бол цасны ширхэг бие дээр хүрч тухайн хэсгийг хэрхэн хөргөсөн байгааг харуулж байна”
Эхэндээ түүний бие камерт улаан өнгөтэй харагдах бөгөөд энэ нь бие дулаан байгааг харуулж байгаа юм. Гэвч хугацаа өнгөрөх тусам түүний биеийн өнгө шар болж, дараагаар нь ногоон өнгөтэй болсноор бие дулаанаа алдаж буйг харуулжээ.
“Энэхүү дулаан мэдрэгч камер нь хүний бие хэвийн температураа алдах нь ямар аюултай болохыг сайтар харах боломжийг танд олгоно.”
Дараагаар нь залуу гартаа цас аваад, цасан бөмбөг хийж байгаад хүйтэн гараа цээжин дээрээ нааж харуулжээ. Ингээд залуу гараа арьсан дээрээсээ салгасны дараа түүний цээжин дээр ногоон өнгийн алганы ул мөр үлдсэн буюу хүйтэн зүйлд бие хариу урвал үзүүлж хэсэгчлэн хөрсөн байгаа нь харагдах болно.