Дэлхийн хамгийн хачирхалтай 10 барилга

Нийтлэгч: Лука

Огноо: 2013/08/06

Total96
96

Орчин үеийн уран барилгын хөгжил Дэлхий ертөнцөд олон гайхалтай барилга байгууламжуудыг бүтээсэн. Хачин жигтэй хэлбэр, асар их авьяас чадвар шаардсан сүрлэг загвар, шинэ материал, шинэ өөр өөр хэв маяг гээд бүхий л талаараа гайхаш төрүүлэм уран барилга, байгууламжууд Дэлхийн өнцөг булан бүрд сүндэрлэн боссоор байгаагийн дотроос Дэлхийн хамгийн хачирхалтай, этгээд чамин гэгдэж байгаа арван барилгын тухай мэдээлийг фото зургийн хамт та бүхэнд толилуулж байна. Тухлан сууж болгоохыг урья.

10. Хятад, Мэргэжлийн урлагийн үндэсний төв /National Centre for the Performing Arts – NCFA/

Хятадын Бээжин хотын дуурийн ордны энэхүү барилгыг Аварга том өндөг гэх нь ч бий. Хиймэл нуураар хүрээлэгдэн орших бараг 12,000 м.кв хэмжээ бүхий энэхүү төвийн барилгын эллипс хэлбэрийн бөмбөлөг орой нь шил болон титанаар бүтээгдсэн бөгөөд 5452 хүний суудалтай гурван их танхимтай. Францын уран барилгач Паул Андрю /Paul Andreu/-гийн зохион бүтээсэн энэ барилгын ажил 2001 оны 12-р сард эхэлж, 6 жилийн хугацаанд баригдсаар 2007 оны 12-р сард нээлтийн тоглолт хийгдэж байв.

9. Нидерланд, Роттердам, Шоо дөрвөлжин байшингууд /Cubic Houses/

Уран барилгач Пиет Блом /Piet Blom/-ын загварыг нь гаргасан энэ байшингууд хотын нягтрал ихтэй нөхцөлд зориулагдсан бүтээл юм. Зургаан өнцөгт баганан суурин дээр янз бүрийн өнцгөөр байрласан учир мод шиг харагддаг бөгөөд 38 жижиг шоо дөрвөлжингүүд нь өөр хоорондоо холбоотой учир ой шиг харагддаг.

8. Канад, Монреаль, Биосфер хүрээлэн буй орчны музей /Biosphere Environmental Museum/

Хүрээлэн буй орчинд зориулагдан бүтээгдсэн энэхүү музейн барилга 1978 оны Battlestar Galactica, 1979 оны Quintet кинонуудад дүрслэгддэг.

7. Герман, Forest Spiral

Валдспирале /Waldspirale/ нэртэй энэхүү орон сууцны барилгын цогцолбор Германы Дармштадт хотод 1990-ээд онд баригдсан. Австрийн зураач Фриедэнсрех Хандертвассер /Friedensreich Hundertwasser/-ын зохион бүтээж, уран барилгач Хайнз Спрингманн /Heinz Springmann/-ы төлөвлөж хэрэгжүүлсний үндсэн дээр баригдсан ногоон дээвэр, ороомог хэлбэрийн энэ барилга 2000 онд баригдаж дуусчээ.

6. Канад, Монреаль, Хабитат 67 /Habitat 67/

Израйль-Канад гаралтай уран барилга Моше Садфи /Moshe Sadfie/-гийн зохион бүтээсэн энэхүү орон сууцны барилгын цогцолбор шоо дөрвөлжин дүрснүүдийн сонирхолтой өрөлтийг харуулдаг ба хүүхдүүд тоглож өрсөн мэт харагддаг. Амьдрахад маш тухтайн зэрэгцээ маш тогтвортой барилгын цогцолбор юм.

5. Испани, Ла Педрера /La Pedrera/

Каса Мила /Casa Mila/ гэх нэрээрээ алдартай энэ барилгын загварыг Каталаны уран барилгач Антони Гауди /Antoni Gaudi/ гаргасан бөгөөд 1906-1912 онд баригджээ. Анх гэрлэсэн хосуудад зориулагдан зураг төсөл нь гарч баригдсан энэ барилгын цулгай хэлбэрийн долгионтсон чулуун нүүрэн дэх цонх тагтны төмөр чимэглэлийн ихэнх хэсгийн, гипсэн таазны зарим хэсгийн загварыг Каталаны уран барилгач Жосеп Мариа Жужол /Josep Maria Jujol/ гаргажээ. Энэхүү өвөрмөц байшин ЮНЕСКО-гийн Дэлхийн өв газарт бүртгэлтэй.

4. Бразил, Нитерой орчин үеийн урлагийн музей /Niteroi Contemporary Art Museum/

Бразилын Рио хотын энэхүү музейн энэхүү барилга өөр ертөнцөөс ирсэн мэт онцгой загвартай учир тус хотын гол уран барилгын дурсгалуудын нэгд тооцогддог. Бразилын уран барилгач Оскар Нимейер /Oscar Nimeyer/-ийн загварыг нь гаргаж барьсан энэ барилгын өндөр 16 м, оройн диаметр 50 м аж.

3. Чех, Бүжиглэж буй байшин /Dancing House/

Чехийн Праг хотноо байрладаг энэ байшинг Бүжигчин байшин гэхээсээ гадна Фред энд Жинжер /Fred and Ginger/ гэж хочлон нэрлэх нь бий. Уран барилгын гайхалтай энэ бүтээл биесээ тэврэн бүжиглэж байгаа хос шиг харагддаг. Праг хотын билэг тэмдэг болсон энэ барилгын загварыг Чехийн уран барилгачин Владо Милунич /Vlado Milunic/, Фрэнк Гери /Frank Gehry/ нар хамтран гаргажээ.

2. Португал, Чулуун байшин /Stone House/

Цахиур чулууныхан буюу Flinsstones хүүхэлдэйн киноны чулуун байшингуудын бодит хувилбар болсон энэ байшинг хоёр аварга том чулууг бетон зуурмагаар холбож барьсан ба хаалга, дээвэр, цонх, байшингийн өгсүүр хэсгийн бул чулуу, хутгуур хэлбэрийн төгсгөл хэсэг зэрэг нь энэ байшинг эрт галавын үеийн сууц мэт сэтгэгдлийг төрүүлдэг.

1. Польш, Муруй байшин /The Crooked House/

2004 онд баригдсан, ойролцоогоор 4000 м.кв орчим хэмжээ бүхий энэ байшин Польшийн Сопот хотын Резидент худалдааны төвийн нэг хэсэг байдлаар баригджээ. Польшийн зураач Ян Марцин Шанцер /Jan Marcin Szancer/-ын зурсан шидэт үлгэрийн зургуудаас сэдэвлэн Шотинчи энд Залесский /Szotynscy & Zaleski/ хэмээх уран барилгын пүүсийн загварыг нь гаргасан энэ барилга дотроо зоогийн газар, баар, дэлгүүрүүдтэй бөгөөд тус хотын аялал жуулчлалын том үзмэрийн нэг юм.