Манай гаригийн хамгийн азгүй хүмүүс

Нийтлэгч: Лука

Огноо: 2013/08/23

Total0
0

Өглөө гэрээсээ ажил руугаа гарахдаа ажлын бичиг баримтаа гэртээ мартаад, ажлын ширээн дээр кофегоо татаж асгаад, хамтран ажиллагч гэрээгээ цуцлаад, орой гэртээ харих гэтэл машины дугуй хагарч, ойр хавьд дугуй засвар олдохгүй үйл тамаа үзээд гээд л хорвоогийн хамаг азгүй явдлууд өөрт нь тулгарсныг тоочиж байгаа хүнтэй та ер нь таарч байсан уу? Азгүй азгүй гэхэд ийм азгүй байна гэж юу байхав гэж та бодож байж болох юм. Энд яг дээр дурдсан шиг зүйлүүдтэй таарсан хүний тухай биш ч гэлээ хувь тавилан нь яаж эргэхээрээ ингэдэг байнаа гэмээр хүмүүсийн тухай өгүүлэх гэж байна. Тэднийг хорвоогийн хамгийн азгүй хүмүүс гэдэг.

Жон Вейд Аган /John Wade Agan/ хэмээх энэ Америк эрийг Дэлхийн хамгийн азгүй хүн гэдэг. Учир нь тэрээр 2011 онд Флорида дахь гэртээ холбооны газар доорх шугамтай телефон утсаар ярьж байгаад цахилгаанд цохиулж байсан ба түүнээс өмнө таксины жолооч хийдэг байхдаа машин дотроо дээрэмдүүлж, цоожлуулж байжээ. Түүгээр ч зогсохгүй Аган цээжиндээ гүн хутгалуулж шархдаж байсны дээр нэг зэрэг хоёр могойнд хатгуулж байсан байна.

Нагасакигийн иргэн Цутому Ямагучи нь 1945 оны 8-р сарын 6-ны өглөөний 8:15 цагт Хирошимад ажлаар явж байгаад атомын бөмбөгдөлтөнд өртсөн бөгөөд шархтай байснаа ч үл харгалзан маргааш нь Нагасаки руу буцаж, 9-ны өдөр ажилдаа ортол хоёр дахь атомын бөмбөгдөлт түүнийг нэрвэсэн байна. Дор хаяж 160 орчим хүн хоёр удаагийн бөмбөгдөлтөнд өртсөнөөс амьд үлдэж чадсан цорын ганц хүн хэмээн Японы засгийн газраас албан ёсоор тодорхойлогдсон энэ хүнийг азгүйн зэрэгцээ азтай гэж хэлж болох юм.

Хөлөг онгоцны үйлчлэгч Вайолет Жессоп /Violet Jessop/ нь 1911 оны Олимпик /Olympic/, 1912 оны Титаник /Titanic/, 1916 оны Британник /Britanniс/ хөлгүүдийн сүйрлээс амьд үлдсэн нэгэн. Есөн хүүхэдтэй айлын ууган хүүхэд болон мэндэлсэн түүний гурван ах дүүс нь нас барсан ба багадаа сүрьеэ өвчтэй байсан түүнийг эмч нар

удаан амьдарч чадахгүй гэдэг байжээ. 23 настайдаа Олимпик онгоцны үйлчлэгч хийх болсон тэрээр дээрх ослуудын дараа ч хөлөг онгоцны компанид ажилласаар байсан байна.

1965 онд Бетси /Betsy/, 1998 онд Жорж /George/, 2003 онд Жуан /Juan/, 2005 онд Катрина /Katrina/, 2012 онд Исаак /Isaac/ гэсэн таван хар салхинд өртсөн Мелани Мартинез /Melanie Martinez/ Дэлхийн хамгийн азгүй хүмүүсийн нэг. 2013 онд түүний түүхийг сонссон Америкийн алдартай телевизийн шоунаас түүний байшинг 20,000 доллараар засаж өгсөн ч хэдхэн сарын дараа Исаак хар салхи түүний гэрийг нэрвэсэн байна. Түүнийг нүүлгэхийг хүссэн ч “Би энд төрсөн. Энэ бол миний төрсөн гэр.” хэмээн татгалзжээ.

2013 оны 7-р сарын 29-нд Багамын аралд амарч байсан Эрик Норри /Erik Norrie/ усан доор загасчилж байгаад махчин загасны дайралтанд өртсөн бөгөөд түүнээс өмнө тэрээр цахилгаанд цохиулж, хоржигнуурт могойнд хатгуулж байсан байна.

54 настай Жон Лайн /John Lyne/ өсвөр насны хүүхэд байхдаа модноос унаад гараа хугалсны улмаас эмнэлэгт хэвтэж байжээ. Гэвч эмнэлгээс гараад гэр рүүгээ явах замдаа автомашины осолд орж, хугарсан гараа дахин гэмтээсэн байна. Хэдийгээр өөр өөр газруудад болсон ч өдрүүд нь дандаа 13-ны Баасан гариг байсан хэмээн Жон өгүүлдэг. 2006 онд тэрээр уурхайд дарагдсан байна. Жоны өгүүлснээр тэрбээр гурван удаагийн авто осолд орсон, цахилгаан цохиулсан, уурхайд дарагдсан зэргээр нийт 16 удаа амь нас нь аюултай байдалд орж байсан гэнэ.