Байшин барилгаар хооллогч робот

Нийтлэгч: Лука

Огноо: 2014/03/14

Total0
0

Тэнгэр баганадсан өндөр барилгыг нураах гэдэг нь үнэхээр аюултай бөгөөд түүнээс үүдэлтэй шороо тоос ихтэй төвөгтэй ажил. Ялангуяа хүн ам шигүү суурьшсан газарт бүр ч хэцүү байх нь ойлгомжтой. Түүнчлэн энэ ажлыг гүйцэтгэхэд олон тооны хүнд механизм шаарддаг. Туркын оюутан Omer Haciomeroglu бетон ‘иддэг’ роботоороо Америкийн аж үйлдвэрийн нийгэмлэгээс зохион байгуулдаг механизмын дизайны тэмцээний 2013 International Design Excellence Award шагналыг хүртжээ. Энэхүү робот нь сүндэрлэж байсан барилгыг ямар ч ул мөргүйгээр ‘идэж’ орхидгийн дээр ‘идсэн’ бүх материалуудаа эргэн ашиглаж чаддаг байна. Умеа Дизайны институтын оюутан залуугийн хэлснээр ERO Concrete Recycling Robot нь бетон байгууламжийг ямар ч үлдэгдэл, хог хаягдал, тоос шороогүйгээр задлахаар бүтээгдсэн гэнэ. Мөн түүний задалсан материалуудыг бетон барилга барихад дахин ашиглаж болох аж.

Загвар болон хэрэглээгээрээ WALL-E хүүхэлдэйн киноны роботыг санагдуулам энэ робот нь бетоныг бутлах усан шүршүүрээр ханыг буудахын өмнө барилгыг шинжилж, хамгийн тохиромжтой арга замыг тодорхойлох чадвартай. Робот барилгыг нураах үед гарсан хог хаягдлыг соруулах сорогчтой ба энэ нь ус болон цементийг тус тусад нь сордог. Усыг робот өөрөө дахин ашиглах бол цементийг дахин бетон хийхэд ашиглах аж.

Хүнд механизмаар барилга нураахад их хэмжээний ус хэрэгцээгүй болж хаягдан, барилгаас гарсан материалыг газарт булахад хүрдэг. Бетоныг өндөр даралттай усаар шүршиж, доторх ган төмөр саваануудыг ямар ч гэмтэл эвдрэлгүйгээр авч, тэр дор нь дахин ашиглах боломжтойн дээр төмөр дээр үүссэн зэвнүүдийг ч угааж арилгах ажээ.

Төвөөс зугтах хүчийг ашигласан сав нь шингэн болон хатуу хэсгүүдийг салгах үүрэгтэй бөгөөд тус бүрчлэн савлаж дахин ашиглахад бэлэн болгодог байна. Хэдийгээр нь энэ робот нь туршилтын шатандаа яваа ч нөлөө бүхий байгууллагууд үүнийг гайхалтай санаа гэдгийг нь няцаахгүй байгаа аж.