Автобусанд амьдардаг Америкийн өвөрмөц гэр бүл

Нийтлэгч: Лука

Огноо: 2012/09/14

Total0
0

Хорвоо ертөнц дээр амьдарч байгаа хүмүүний амьдралд элдэв сонин хачин тохиолдол, өвөрмөц этгээд зан байдал, зуршил, амьдралын хэв маягууд тоолж барахын аргагүй олон. Үүний жишээ болгож бид та бүхэндээ Америкийн Охайо мужид маш өвөрмөц хэв маягаар амьдардаг Smiles Welch-ийн гэр бүлийнхний фото зургуудыг толилуулахаар бэлтгэлээ. Welch болон түүний эхнэр Space Cadet нар нь сургуулийн насны, дэрсхэн гурван хүүгийнхээ хамт Охайо мужийн Афин хотын нутаг дэвсгэрт, хүний хөл хөдөлгөөн байхгүй буйдхан газарт автобусан дотор амьдардаг.Замын унаанд дайгдан олон орноор аялж байсан Welch, Cadet нар хээрийн хээгүй амьдралд аль хэдийнээ дассан хүмүүс бөгөөд хүүхдүүд нь ч мөн адил аав ээжтэйгээ адил хээ шаагүй болж өсчээ. Хэдэн жилийн өмнө Охайогийн Афин хотоор аялсныхаа дараа энэ газарт суурьшиж, Forest, Elijah, Simon нэртэй гурван хүүгээ өсгөхөөр шийдэж, газар, сургуулийн автобус худалдан авсан байна. 20 акр талбай бүхий газартаа, өдгөө гэр хэмээн нэрлэх болсон сургуулийн автобусан дотроо, хэрэглээний халуун хүйтэн ус, цахилгаангүйгээр амьдарч байгаа Welch-ийн гэр бүлийнхэн энэ амьдралдаа маш сэтгэл хангалуун, хайртай байдаг аж. Цаашид байшин барьж амьдрахаар мөнгөө цуглуулж байгаа Welch гэр бүлийнхнээсээ орчин үеийн амьдралаар амьдрах хүсэлтэй байгаа эсэхийг нь асуухад гэргий болоод хөвгүүд нь минималист маягийн энэ амьдралаараа амьдрах хүсэлтэй байгаагаа хэлжээ. Бурхан хүмүүсийг хэрхэн амьдруулахыг хүсэж байгаа тэр амьдралаар амьдарч байна гэж өгүүлдэг энэ гэр бүлийн ууган хүү нутгийн сургуульд явдаг бол хоёр бага хүү нь гэрээр боловсрол олж авч байгаа юм. Welch, Cadet нар болон тэдний хүүхдүүд “Автобус маань биднийг үргэлж хамтдаа, нэг дор байж, ойр дотно байх боломжийг олгодог. Бид энэ гэртээ хайртай.” хэмээн өгүүлдэг байна.