Сэлэлт бол таныг хэдэн настай байхаас үл хамааран эрүүл амьдралд хүргэж өгөх галт тэрэгний тасалбар л гэсэн үг. Учир нь сэлэх нь биеийн булчингуудыг ажиллуулахаас гадна стрессийг бууруулж, аз жаргалын даавар буюу эндорфины ялгаралтыг нэмэгдүүлдэг байна. Энэ мэтчилэн өөр ямар ашиг, тустай болохыг нийтлэлээ уншаад мэдэж аваарай.
1. Уушгины ажиллагаа сайжирна
Сэлэлтээр хичээллэх нь уушгины үйл ажиллагааг дэмжих хамгийн сайн арга бөгөөд йогийн дасгалтай ижил түвшинд нөлөөлдөг байна. Сэлэх үед цээжний булчингуудын ажиллагаа нэмэгддэг учир уушгины үйл ажиллагааг идэвхжиж байдаг аж.
2. Үе мөч илүү хүчтэй болно
Усанд сэлэх үед ус биеийн 90%-д дэмжлэг үзүүлж байдаг учраас үе мөчний өвчтэй хүмүүсийн хувьд сэлэлтээр хичээллэх нь нэн чухал юм. Тогтмол усанд сэлснээр үе мөчний үйл ажиллагаа идэвхтэй болж үений эргэн тойрон уян хатан болох болно.
3. Нурууг бэхжүүлнэ
Хэрэв та ууц нурууны өвчнөөс болж шаналж байгаа бол усанд сэлэлтээр хичээллэхийг зөвлөж байна. Сэлэх үед бидний бие уснаас дэмжлэг авч өргөгдөж байдаг учир биеийн булчингууд тайвширч, элдэв өвдөлт намдана.
4. Калори шатаана
Долоо хоногт дор хаяж 3 удаа сэлэлтээр хичээллэх үед биед хуримтлагдсан илүүдэл калори шатаж, биеийн бүх булчин жигд чангарах болно. Ердөө 30 минут сэлэхэд л 500 калори шатаах боломжтой бөгөөд энэ нь алхалтаар турахаас хоёр дахин үр дүнтэй гэсэн үг. Тиймээс сэлэлтийг өдөр тутмын амьдралын нэгэн хэмнэлээ болгоорой.
5. Хөгшрөх үйл явц удааширна
Судалгаагаар 3000-5000 метр буюу долоо хоногт 3-5 удаа усанд сэлэх нь хөгшрөх үйл явцыг нэг жилээр биш хэдэн арван жилээр хойшлуулдаг болох нь тогтоогджээ. Тус судалгаанд сэлэлтийн үр дүнд чангарсан булчингууд биед хөгшрөлт явагдах үйл явцыг удаашруулдаг гэжээ.
6. Сайн унтаж амардаг болно
Усанд сэлснээр нойр сайжирч, стресс буурдаг. Учир нь сэлэлт нь нойргүйдлийг эмчлэхэд хамгийн тохиромжтой дасгалд тооцогддог байна. Тиймээс та унтаж чадахгүй шаналж байгаа бол сэлэлтээр хичээллээд үзэх хэрэгтэй.