Орчин цагт хүнснийг урт хугацаагаар хадгалж, өдөр бүр шинэ мэт хүнс хэрэглэх боломжийг бүрдүүлсэн хамгийн том ололт бол хөргөгч билээ. Тэгвэл манай сайт уншигч танд хөргөгчөө хэрхэн зөв ашиглан ажиллуулах талаар 10 зөвлөгөөг хүргэхээр бэлдлээ.
1. Тохиромжтой хэмд тохируулах
Хөргөгч болон хөлдөөгчийн хэмийг тохиромжтой хэмжээнд тохируулснаар хүнс хадгалах нөхцөл улам бүр урт болдог ажээ. АНУ-ын Хүнс, Эрүүл ахуйн газраас хөлдөөгчийг −18° C тохируулан хэрэглэх нь хамгийн оновчтой хэмээн тодорхойлсон байдаг байна.
2. Хөлдсөн хүнсний бүтээгдэхүүний тасалгааны хэмд гэсгээж болохгүй
Хүмүүс ихэвчлэн хөлдөөсөн хүнсний бүтээгдэхүүнээ тасалгааны хэмд гэсгээх, богино долгионы зууханд хийж гэсгээх, усанд сойж гэсгээх гэсэн 3 аргыг хэрэглэдэг. Тэгвэл мэргэжилтнүүд тасалгааны хэмд хүнсний бүтээгдэхүүнийг удаан хугацаагаар тавьж гэсгээх нь нян, бактери үржих нөхцлийг бүрдүүлэх эрсдэлтэй тул уутанд хийж усанд сойж гэсгээх арга хэрэглэхийг зөвлөдөг ажээ.
3. Болгосон хүнсний бүтээгдэхүүнийг хөлдөөх
Хөлдөөгчнөөс гаргаж гэсгээсэн хүнсийг ахин хөлдөөж болохгүй, чанаж болгосон хүнсийг хөлдөөж болохгүй гэх өрөөсгөл ойлголт олны дунд түгээмэл байдаг. Үнэхээр ч зарим төрлийн хүнснийг олон дахин гэсгээж, хөлдөөх үед үнэр, амт өөрчлөгдөх, сулрах явдал тохиолддог. Гэхдээ чанаж болгосон хүнснийг удаалгүй хөлдөөж хэрэглэж болохгүй гэх үндэслэл үгүй ажээ.
4. Хөргөгч, хөлдөөгч нян устгадаггүй
Хүйтэн хэмд хүнсний бүтээгдэхүүнийг байлгаснаар нян саармагжиж байдаг боловч гэсгээх үед эргэн сэргэж байдаг тул хөлдөөгч ашиглан хүнсний бүтээгдэхүүнийг ариутгана гэх ойлголт нь өрөөсгөл аж.
5. Хүнсний бүтээгдэхүүн бүрийг хөргөгчид хийж хадгалах боломжгүй
Хөргөгч, хөлдөөгч нь хэдийгээр хүнсний бүтээгдэхүүнийг удаан хугацаагаар хадгалах зориулалттай боловч чанасан өндөг, хэт усархаг хүнсний ногоо, майонез зэргийг хөргөгчид хадгалах нь тохиромжгүй байдаг ажээ.
6. Хөргөгчийг удаан хугацаагаар хоосон ажиллуулах хэрэггүй
Хөргөгч нь дотор нь байрлуулсан байдаг термостатуудын тусламжтайгаар хэмээ автоматаар тэнцвэржүүлэх системтэй байдаг. Гэвч хөргөгчийг урт хугацаагаар хоосон ажиллуулах үед хөргөгч дотоод орчинг хүйтэн барихын тулд хэт их эрчим хүч зарцуулах хандлагатай байдаг аж. Харин дотроо хүйтэн хүнс хадгалсан үед ажиллах горим тогтворжиж, хэрэгцээгүй эрчим хүчний зарцуулалт зогсдог байна.
7. Хөлдөөсөн хүнсний бүтээгдэхүүнийг гэсгээхдээ богино долгионы зуух ашиглах
Орчин цагт богино хугацаанд хүнсийг гэсгээх боломжтой гэдэг утгаараа богино долгионы зуухыг хүмүүс ихээр хэрэглэх болсон. Гэвч богино долгионы зуух нь жигд бус халах горимтой байдаг тул хүнс халаах, хөлдөөсөн хүнсний бүтээгдэхүүнээ гэсгээхдээ эргэлтийг жигд байгаа эсэхийг шалгаж хэвшээрэй.
8. Хүнсээ тохиромжтой зүйлд хийж хөлдөөх
Хэдий хөргөгчид хүнсээ хийж буй боловч нян үржүүлэхгүй байх үүднээс агаар нэвтрүүлэхгүй, битүү сав, уутанд хийж хэвших хэрэгтэй. Харин хөлдөөх гэж буй зүйлээ мөнгөн цаасанд ороож хийхийг мэргэжилтнүүд төдийлөн зөвлөдөггүй аж. Учир нь энэ цаас нь маш нимгэн, амархан урагддаг тул тохиромжгүй гэж үздэг байна.
9. Тог тасарсан тохиолдолд хөргөгчинд байгаа хүнс хэр удаан хадгалагддаг вэ?
АНУ-ын хүнсний аюулгүй байдлын тухай зөвлөмжид тоггүй болсон тохиолдолд хөргөгчид буй хүнс 48 цагийн турш сэрүүн байдлаа хадгалж, эрүүл ахуйд сөргөөр нөлөө үзүүлэхгүй хэмээжээ. Харин хөргөгч дүүрэн бус хагас хүнстэй байгаа нөхцөлд 24 цагийн хугацаанд хүнсэнд өөрчлөлт орохгүй гэж заасан байдаг аж.
10. Шошго хэрэглэх
Хөлдөөгчид байгаа зүйлс удаан хугацаанд хадгалагдах үедээ мөстөж, чухам хайж буй зүйл хаана байгаа нь тодорхойгүй болох явдал түүгэмэл үүсдэг билээ. Тэгвэл энэ асуудлыг шошго наах замаар хялбархан шийдэх боломж танд бий.
Таны зүгээс хөлдөөсөн хүнсний бүтээгдэхүүнтэй холбоотой өөр ямар зөвлөмж өгөх байна вэ? Сэтгэгдэл хэсэгт бидэнтэй хуваалцаарай.
Munkh Baynjargal
2022/04/04 at 08:10
Ergen sergeeh mongiug n oorsdoor n tolvvl