Бостоны марафонд тэргэнцэртэй хүүгээ түрж гүйдэг байснаараа алдартай Дик Хойт 80 насандаа таалал төгсчээ

0
0
19,839

Бостоны марафонд тэргэнцэртэй хүүгээ түрж гүйдэг байснаараа алдартай Дик Хойт өнгөрсөн лхагва гарагт 80 насандаа таалал төгсчээ. Тэрээр Бостоны марафонд 32 удаа оролцож байсан бөгөөд амьдралынхаа туршид 1000 гаруй гүйлтэд оролцож байсан нэгэн юм.

Associated Press хэвлэлд түүний хүү Расс Хойтын мэдээлснээр Дик Хойт зүрхний өвчтэй байсан бөгөөд нойрон дундаа амар амгалан таалал төгссөн гэжээ.

 

Дик Хойт нь Бостоны марафонын билэг тэмдэг болсон нэгэн байв

Тэрээр тархины саажилттай Рик хүүгээ тэргэнцэр дээр нь түрж 1977 оны Бостоны марафонд оролцож байсан бол 3 жилийн хойно 1980 оны Бостоны марафонд оролцохдоо уралдаанд зориулсан тусгай тэргэнцэртэй оролцож байжээ. Тэд хамтдаа 32 удаа Бостоны марафонд оролцож байсан бөгөөд марафонд гүйх боломжгүй хүүгийнхээ хүслийг биелүүлэх гэж тэргэнцэр түрж гүйдэг байснаараа олонд алдаршсан юм.

Бостон марафоныг зохион байгуулагч Бостон Атлетик Холбоо ч эцэг, хүү Хойтгүйгээр Бостоны марафоныг төсөөлөх аргагүй хэмээн мэдэгдэж байжээ.

Мөн тэд Төмөр хүн триатлоны уралдаанд оролцож байсан бөгөөд эцэг Хойт 4 км усанд сэлэх үедээ хүүгээ завинд суулгаад, завиа олсоор биетэйгээ холбон сэлж байсан гэдэг. Үүгээр ч барахгүй тэд 180 км газар дугуйгаар явж, 42 км газар гүйж байжээ.

Улмаар тэд 2020 оны 1-р сард АНУ-ын Триатлоны Алдрын танхимд нэрлэгдсэн юм. Дик Хойт нь 2013 онд зодог тайлах бодолтой байсан ч Бостонд болсон хaлдлагын улмаас зохион байгуулагдаагүй тул 2014 онд тус марафонд оролцоод, эрүүл мэндийн асуудлаас үүдэлтэйгээр их спортоосоо зодог тайлсан ажээ.

 

Спортын ертөнц Дик Хойтыг үргэлж дурсан санаж байх биз ээ

Түүний нaс бaрсан талаарх мэдээ гарсан даруйд спортын одууд тасралтгүй эмгэнэл илэрхийлсээр байгаа юм. Тухайлбал, Бостон Атлетик Холбоо бусдын төлөө сэтгэл зүрхтэй түүний тухай энэ мэдээ дэндүү гэнэтийн байлаа хэмээн тодорхойлжээ.

“Бостоны марафонд гүйгчдийн хувьд 3 арваныг дамнан гүйсэн тэр бол цуцашгүй байдал, хүсэл эрмэлзлийн тод жишээ нь байлаа. Тэр зүгээр нэг хүмүүст үлгэр дуурайлал болсон нэгэн байсангүй. Тэр хүүгээ Хопкинтоноос Бостон хүртэл дагуулж гүйж хүсэл мөрөөдлийг нь биелүүлсэн сайн аав, үнэнч анд нөхөр байсан билээ” хэмээн түүнийг дурсчээ.

Аав хүү хоёрын хувьд 2009 оны Бостон марафонд оролцсон нь тэдний замналын хувьд 1000 дахь уралдаан байсныг мөн онцлон тэмдэглэжээ.

Массачусетс мужийн амбан захирагч Чарли Бейкер өөрийн твиттер хуудсаараа дамжуулан, “Дик Хойт бол Бостоны марафоны хувьд олон арваны билэг тэмдэг нь байлаа. Бусдын л нэгэн адил би Дик болон түүний хүүг барианд орох мөчийг харж, бахархахын зэрэгцээ үлгэр жишээ авдаг байсан” хэмээн эргэн дурсчээ. Харин Бостон хотын захирагч Марти Уалш твиттер сүлжээнд, “Бостончууд ямар тэсвэр хатуужилтай хүмүүс вэ гэдгийг харуулсан, үлгэр жишээч нэгэн байлаа” хэмээн тодорхойлжээ.

Түүнчлэн тус хотын спортын багууд ч түүнд хүндэтгэл үзүүлжээ.

12
ХарамсалтайХарамсалтай
4
ГоёГоё
0
Ха ХаХа Ха
0
ХөөрхөнХөөрхөн
0
ГайхмаарГайхмаар
0
БахархмаарБахархмаар
0
ТэнэглэлТэнэглэл
0
БурууБуруу
Баярлалаа!

Фейсбүүк сэтгэгдэл

Сэтгэгдэл бичих

АНХААР! Та сэтгэгдэл бичихдээ хууль зүй болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд XopoM.com хариуцлага хүлээхгүй.