Огт хөдлөхгүйгээр хийж болох “залхуу” 10 дасгал. Эдгээр дасгал нь таны биеийг дахин ачаалж, зөв галбиртай болоход тусална

Нийтлэгч: Uku

Огноо: 2020/06/22

Total1,383
1,383

Тогтмол дасгал хийх нь олон талын ач тустай гэдгийг бид бүгд мэднэ. Гэхдээ танд орноосоо босолгүйгээр эсвэл хоол хүлээх зуураа дасгал хийнэ гэхээр ямар санагдаж байна? Зүгээр л зочны өрөөндөө ямар нэг дасгалын төхөөрөмжгүйгээр илүүдэл калорио шатаана гэвэл ямар вэ? Ингээд бид танд фитнес орох завгүй эсвэл дургүй хүмүүст зориулсан гэртээ хийж болох хялбар дасгалуудыг хүргэж байна.

1. Аарцагны сунгалт

Энэ дасгал нь ташаагаар эргэх үйлдэлтэй бөгөөд аарцагны булчингуудыг чангалж өгнө. Мөн мэдрэлийн судаснууд олноор байрладаг өгзөгний булчинг давхар чангалах болно.

1. Хөлөө урагш сунгаад газар сууна

2. Баруун хөлөө зүүн хөл дээгүүрээ давуулж баруун хөлийнхөө улыг шалан дээр бүтэн тавина.

3. Дараа нь баруун гараа биеийнхээ хажууд тавиад зүүн гараа баруун хөлийнхөө өвдөг дээр авчирна.

4. Баруун хөлөө зүүн тийш нь дарж, биеийг баруун тал руу нь зөөлөн мушгина.

5. Байрлалыг 30 секундийн турш бариад нөгөө талдаа давтана.

2. 90/90 сунгалт

Энэхүү дасгалыг өдрийн ихэнх цагийг суугаа байрлалтай өнгөрөөдөг хүмүүс хийхэд илүү тохиромжтой бөгөөд ташааны уян хатан байдлыг сайжруулна.

1. Баруун өвдгөө хэвтээгээр нь 90 градус нугалж сууна. Хөлийн өсгий зүүн хөлийн харалдаа ирсэн байх ёстой. Энэ байрлалд хөлд зовуурь мэдрэгдэх ёсгүй.

2. Зүүн өвдөгийг биеийнхээ зүүн талд тавиад хөлөө арагш жийнэ. Бага зэрэг өвдгөө нугалсан байна. Хөл уян хатан хэвээр байх ёстой.

3. Баруун өгзгөө шаланд наагаад зүүн өгзгөө аль болох арагш сунгаж чангална.

4. Байрлалыг 30 секундээс 2 минутын хооронд барина. Нөгөө талдаа давтана.

3. Мэлхий сунгалт

Гуяны дотоод булчингуудыг чангалж хэвлий, хонгоны булчинг идэвхжүүлнэ.

1. Өвдгөө дэлгэнэ, мөрнөөс илүү өргөн байх ёстой.

2. Хөлөө гадагш эргүүлнэ. Ингэснээр хөлийн дотор тал шал руу харна гэсэн үг.

3. Одоо ташаагаа өсгийнийхөө эсрэг чиглэлтэй түлхэж өгнө.

4. Боломжтой бол тохойгоо доошлуулж биеэ илүү сайн сунгаж болно.

5. Байрлалыг 2 минут баривал илүү үр дүнтэй.

4. Цээжний сунгалт

Цээжний булчингуудыг чангалж биеийг бүхэлд нь сунгаж өгөх дасгал.

1. Гэдсэн дээрээ хэвтээд гараа хоёр талдаа авна. Бие “T” хэлбэртэй болно гэсэн үг.

2. Зүүн гараа газар тулж биеэ түлхэнэ. Биеэ тэнцвэртэй байлгахын тулд зүүн хөлөө бага зэрэг нугалаад биеэ баруун тийш нь эргүүлнэ.

3. Хэрэв боломжтой бол байрлалаа 3 минут барина. Нөгөө талдаа давтаж хийгээрэй.

5. Хэвтээ байрлалын сунгалт

Энэ дасгалыг тогтмол хийснээр илүүдэл илчлэгээ шатаахаас гадна урт хугацаандаа хөлийн булчингуудыг чангалж, тэнцвэрийг сайжруулж өгнө.

1. Эхлээд хажуу талаараа харж хэвтэнэ.

2. Доор байгаа хөлөө аль болох сайтар сунган жийж өгнө. Харин дээр байгаа хөлөө арагш нугалан өгзгөндөө нааж өгөөрэй.

3. Байрлалаа өөрчлөхгүйгээр дээр байгаа хөлөө өгзөг рүүгээ сайтар татаж өгнө.

4. Биеийнхээ тэнцвэрийг хадгалахын тулд биеэ бүхэлд нь чангалж өгөх хэрэгтэй.

5. Энэ байрлалаа 2 минут бариад нөгөө талдаа давтаж хийнэ.

6. Сфинксийн байрлал

Энэхүү дасгал нь хэвлийн доод хэсгийн булчинг чангалахаас гадна нуруунд маш сайн дасгал болж өгнө.

1. Гэдсээрээ доош харж хэвтээд хөлөө арагш нь шулуун жийнэ.

2. Тохойгоороо газар тулаад гарын алгаа доош харуулна. Цээжээ шалнаас дээш өргөж өгнө.

3. Ташаа, гуяа чангалж нуруугаа сунгана. Энэ үед мөрөнд ачаалал ирэх ёсгүй.

4. Биеэ сайтар өргөж нуруугаа сунгана. Хэрэв ямар нэг өвдөлт мэдрэгдвэл дасгалаа зогсоогоорой.

5. Байрлалаа 30 секунд бариад, хүсэж байвал 1-2 удаа дахин давтаж болно.

7. Хөлөө ачиж сунгах байрлал

Энэ байрлалыг хэдэн долоон хоног хийснээр биеийн ерөнхий сунгалт сайжирч нуруу болон, аарцагны булчингууд чангарна.

1. Дээшээ хараад өвдгөө нугалан хэвтэнэ.

2. Баруун шагайгаа зүүн өвдөг дээрээ тавина.

3. Гараа нийлүүлэн зүүн гуяа тэврээд бие рүүгээ татаж өгнө. Толгойгоо газраас хөндийрүүлж болохгүй гэдгийг анхаараарай.

4. Байрлалаа 2-5 минут бариад нөгөө талдаа давтаж хийнэ.

8. Хүүхэд байрлал

Энэ нь маш хөнгөхөн байрлал бөгөөд хүзүү, нуруу, мөрөнд ачаалал өгөх байдлаар стрессийн түвшинг бууруулдаг. Түүнчлэн компьютерын урд удаан суудаг хүмүүс хийхэд илүү тохиромжтой.

1. Өвдөглөөд доош харж хэвтэн хөлийн хуруунуудаа шалан дээр наасан байна. Өвдөг хооронд ташааны өргөнтэй ижил хэмжээний зайтай байх ёстой.

2. Биеэ суллаад хоёр гуяынхаа завсар шигдэж орно. Толгойгоороо газар тулаад хүзүүгээ бага зэрэг сунгаж өгнө.

3. Одоо гарынхаа алгыг дээш харуулан биеийнхээ хажууд байрлуулна.

4. Байрлалаа 5 минутын турш барина.

9. Мушгилт

Энэхүү дасгал нь хоол боловсруулах системийг дэмждэг. Учир нь тус байрлал нь хоол боловсруулах эрхтэн системд массаж болж өгдөг байна. Энэ дасгалыг тогтмол хийснээр өтгөн хатах асуудлыг шийдэх боломжтой.

1. Нуруугаараа газар хэвтээд баруун хөлөө өвдгөөр нь нугалан цээж рүүгээ татна. Зүүн хөл шалан дээр шулуун жийсэн байдалтай байх ёстой.

2. Баруун хөлөө зүүн хөл дээгүүрээ давуулан нугалаад өвдгөө чадах чинээгээрээ шал руу түлхэж өгнө.

3. Мөрөө шалнаас хөндийрүүлэхгүйгээр толгойгоо баруун тийш эргүүлнэ.

4. Байрлалаа нөгөө талдаа солбих хүртлээ хэдэн минутын турш барьж өгнө.