Алдарт загвар зохион бүтээгч Карл Лагерфельдийн амьдралдаа баримталдаг алтан дүрмүүд

2019 оны 2 дугаар сарын 19-ний өдөр Германы алдарт загвар зохион бүтээгч, Chanel загварын ордны захирал Карл Лагерфельд өөд болсон. Моодны тухай олон хүний төсөөлөл, ойлголтыг өөрчилж чадсан энэ хүний дурсгалд зориулж – алдартай дизайнерын ухаарал хайрласан үгнүүдээс танилцуулахаар бэлдлээ.

Карл Лагерфельд – загварын ертөнцөд маш алдартай хүн. Тэрээр хүмүүсийг алдаршуулж од болгосон, өөрийн хувийн брэндийг үндэслэсэн, бас Chanel нэрийг сэргээн босгож чадсан. Түүнийг бүгд хайрлан хүндэтгэдэг байлаа: дэлхийд алдартай дизайнер, загвар өмсөгчөөс эхлээд жирийн ард иргэд ч хүндэлнэ. Хар шил, эмх цэгцтэй зассан үс, тансаг зэрэглэлийн костюм – бид түүнийг ийм л дүр төрхөөр нь дурсан санах болно.

 

Карл Лагерфельд гоо сайхны тухай

• “Зөвхөн гадаад үзэмжиндээ хэтэрхий их анхаарал хандуулж болохгүй. Бидний туршлага биднийг улам илүү сонирхолтой болгодог.”
• “Царайлаг байх хүсэл үнэн хэрэгтээ маш аюултай санаа юм. Гоо сайхан харагдахын хувьд миний бодлоор дотоод сэтгэл зүрхэндээ анхаарал хандуулахад л болно”.
• “Шилдэг хоолны дэглэм – өөдрөг сэтгэл бөгөөд аз жаргал”
• “Шивээс надад аймшигтай санагддаг. Pucci-гийн даашинзтай өдөр болгон явж байгаа мэт л харагдана”
• “Урт, буржгар үсний моодноос би залхаад, тэгээд үсээ боож эхэлсэн юм, үнэндээ миний өөрийн үс яг тийм. Тэр чинь 1976 онд. Сүүл – хамгийн энгийн үсний засалт. Миний хувьд төгс, би өөрөө сайн үсчин биш л дээ. Би гель болон элдэв бусад бодисуудад дургүй, цагаан пудрийг үсээ засахдаа л ашигладаг: миний үс байгалиасаа тийм ч их сайхан биш”

Карл Лагерфельд эмэгтэйчүүдийн тухай

• “Сайн сайхан амьдрахыг хүсэж байгаа эмэгтэйчүүдийг би буруутгахгүй. Эмэгтэйчүүдэд зөвхөн мөнгө л хэрэгтэй байх юм гэж гомдол тавьдаг эрчүүдийг ёстой ойлгодоггүй. Өөрсдөө гоё даашинзтай, гоё үнэртэн түрхсэн сайхан эмэгтэйчүүдийг харах дуртай л шүү дээ? Гоо сайхан байхын тулд өөрийгөө золиослох хэрэгтэй гэдэг биз дээ? Худлаа. Гоо сайхан мөнгө л шаарддаг юм”.

Карл Лагерфельд моодны тухай

• “Биеийн тамирын өмд – ялагдлын шинж тэмдэг. Хэрвээ та биеийн тамирын өмд өмсөөд явж байгаа бол өөрийнхөө амьдралд тавих хяналтаа алджээ гэж ойлгоорой”
• “Моодны дизайнер – загварын дарангуйлагч”

Карл Лагерфельд амьдралын тухай

• “Уучлах – хэтэрхий энгийн. Би санаандгүй мартаж чадна, гэхдээ уучилж чадахгүй. Би өшөө авахыг эрхэмлэнэ”
• “Би маш цэвэрхэн болж аваад унтахаар хэвтдэг. Бага байхаасаа л тийм байсан. Намайг бага байхад ээж минь хэлэхдээ: “Чи шөнө дунд сэрээд үхэхийг үгүйсгэхгүй, тийм болохоор 100% төгс харагдахыг хичээж байгаарай” гэж хэлдэг байж билээ”.
• “Ном – хатуу хавтастай мансууруулах бодис л гэсэн үг. Би чинь аз жаргалтай номын хар тамхичин хүн байгаа юм”
• “Би өдөрт 7 цаг унтдаг. Хэрвээ шөнө 02:00 цагт орондоо орсон бол маргааш нь 09:00 цагт сэрнэ. Хэрвээ 12 цагт унтвал 07:00 цагт сэрнэ. Би сэрэх ёстой цагаасаа эрт сэрэхгүй – байшин нурж байсан ч хамаагүй би яг долоон цаг л унтана”
• “Гэрэл зургийн юу нь надад таалагддаг гээч, хэзээ ч эргэж ирэхгүй, дахин давтаж болохгүй тэр л мөчийг буулгаж чадаж байгаа нь”
• “Номын тавиураасаа хэд дахин хальсан тийм л их номтой хүн. Тэгээд тэр бүх номоо би бүгдийг нь уншсан. Би яг л Шварценеггер л гэсэн үг , гэхдээ тархиа нэмэгдүүлдэг. Би чинь – тархи-билдер”.
• “Ганцаардал – өөрийгөө эрхлүүлж болох хамгийн том тансаглал. Би өөрөө өөртэйгөө ганцаараа үлдэх зайлшгүй шаардлагатай, эс бөгөөс би, би биш болно”