Японы инженер, айкидогийн багш Кацузо Ниси багадаа сул биетэй, өвчин ороодог хүүхэд байсан ба эмч нар түүнийг 20 насалж чадахгүй гэж эцэг эхэд нь хэлдэг байжээ. Эрүүл чийрэг болгох гэж түүнийг Буддын сүмд илгээсэн ба тэрээр 3 жилийн турш янз бүрийн бясалгал болон сэлмийн эрдмээр хичээллэсэн байна.
Ниси эрүүл мэндээ сайжруулахын тулд орчин үеийн эмч нарын олон арван судалгаа, эртний дорно дахины болон европ эмчилгээг ч судалж байсан ба олон жилийн судалгааны явцад өөрийн гэсэн эрүүл амьдрах систем боловсруулсан байна. Түүний бичсэн ном 1927 онд хэвлэгдэн гарч байх үед зохиогч маань 44 настай байлаа.
Ингээд 90 жилийн туршид өөрийн гэсэн тоо томшгүй олон дагагчтай болсон Нисигийн системийн тухай танилцуулъя.
Нэгдүгээр зарчим. Хатуу дэвсгэр бүхий ор
Хүний нуруу нугас тахийснаас болж дотоод эрхтний олон өвчнөөр өвчилж болно. Тийм учраас та нууруугаа цэх байлгах тал дээр өдөр төдийгүй шөнө ч анхаарч байх хэрэгтэй. Нисигийн үзэж байгаагаар цэх нуруу таны өндрийг 1-2 см нэмэгдүүлэх ба цусны эргэлт, хоол боловсруулах эрхтэнд сайнаар нөлөөлөх юм байна.
Хоёрдугаар зарчим. Зөөлөн дэрний оронд хатуу хүзүүний дэр
Тахир хүзүү бол богино наслах нэг үндэс гэж Япончууд үздэг. Өдрийн турш хүн өөрийнхөө хүзүүний байрлалыг хянаж байж чадах бол шөнө унтаж байхдаа ингэж барагтаа чаддаггүй. Тиймээс зөөлөн дэрнээс татгалзаж хатуу хүзүүний дэр хэрэглэж сурахыг Ниси зөвлөж байна. Хүзүүний энэхүү дэрийг хэрэглэхдээ нурууны 3 болон 4-р үе энэ дэрэн дээр таарч байхаар хэвтэнэ. Мэдээж эхлээд ийм дэр маш эвгүй байх ба эхний үед даавуугаар давхарлан бүрж зөөллөж хэрэглэж болох ба аажмаар бүрсэн даавууныхаа давхарыг цөөлөх хэрэгтэй.
Гуравдугаар зарчим. “Алтан загас” дасгал
- Тэгш, хатуу газар хэвтэнэ.
- Гараа дээш өргөнө.
- Хөлийн улаа шалтай перпендикуляр байхаар байрлуулна.
- Баруун тавхайгаа толгой чигт татах үедээ зүүн гараа дээш өргөх ба энэ үедээ бие болон хөлөө шалнаас салгахгүй. Дараа нь нөгөө талаа бас ийм байдлаар ээлжлэн хөдөлгөх ба энэ дасгалыг 2 минутын турш хий.
- Гараа хүзүүнийхээ ард авах ба хүзүүний 3 болон 4-р үе дээр гарын алга таарах ёстой. Хөлөө чигээр нь, улаа хооронд нь бага зэрэг зайтай байлгаж байгаад хөлийн улаа баруун зүүн тийш бие савлатал хөдөлгөнө. Үргэлжлэх хугацаа 2 минут.
Дөрөвдүгээр зарчим. Цусны эргэлт сайжруулах
- Тэгш хатуу газар хэвтэнэ.
- Нурууны 3 болон 4-р үеийн дор хүзүүний хатуу дэр тавина.
- Хөл гараа дээш өргөх ба өвдөг тохойгоо сул байлгах.
- Хөл гараа сэгсрэх байдлаар энэ дасгалыг 1-3 минут хийх хэрэгтэй.
Тавдугаар зарчим. Хөлийн ул, гарын алгаа нийлүүлэн хийх дасгал
Үндсэн байрлал хатуу тэгш газар хэвтэх ба хүзүүний 3, 4-р үеийн дор хатуу дэрээ тавих ба хөлөө өвдгөөрөө нугалан улаа нийлүүлнэ, өвдгөө шалнаас салгахгүй байхыг хичээх хэрэгтэй. Бүх дасгалыг 10 удаа хийх хэрэгтэй.
- Гарын алгаа биетэй перпендикуляр байдлаар нийлүүлэх ба зөвхөн хуруу төдий биш бүх алга нийлүүлэх хэрэгтэй. Гараа салгахгүйгээр дээш болгох ба цээжний доод хэсэгт авчрах маягаар хийнэ.
- Гарын алганы байрлалыг өөрчлөхгүйгээр толгойн дээд хэсэг хүртэл явуулаад буцаж цээжний доод хэсэгт хүргэнэ.
- Гарын алганы байрлал хөл рүү харж, гараа доош хөл чиглэл рүү явуулах ба буцаан цээжний дээд хэсэгт авчирна. Дээрх дасгалуудыг тус бүр 10 удаа хийх хэрэгтэй.
- Алгаа нийлүүлсэн чигээр нь цээжний доод хэсэгт барих ба хөлийн ул нийлсэн чигээрээ, өвдгөө шалнаас салгахгүйгээр толгой болон хөлийн чиг рүү хөдөлгөнө.
- Хөл болон гарын дээрх хөдөлгөөнүүдийг хамт хийх ба танд эвгүй юм уу өвдвөл эхний удаадаа дасгалын тоо цөөн байх хэрэгтэй. Дараа нь үндсэн байрлалдаа орж нүдээ анин 10 минутын турш хэвтэж амарна.
Зургадугаар зарчим. Хэвлий болон нугасны дасгал
Үндсэн байрлал: хөлөө завилан, турк суултаар, гараараа дээд талд нь байх хөлийн улыг барин, мөрөө унжуулан сууна.
Бүх л дасгалыг 10 удаа хийх ба нэг багц дасгал хийсний дараа гараа урагшаа сунган толгойгоороо мөрөө давуулан ар нуруугаа харах байдлаар хоёр тийшээ харах ба дараа нь гараа өргөсөн байдлаар мөн хийнэ.
- Гарын байрлалыг өөрчлөхгүйгээр мөрөө дээш доош болго.
- Гараа үндсэн байрлалд авчран толгойгоо хоёр мөрөндөө хүргэх оролдлого ээлжлэн хийнэ.
- Гараа хөл дээрээ тавьж эрүүгээрээ дээш болгох ба дараа нь доош эрүүгээ цээж хүртэл буулгана.
- Гараа шалтай параллель байдалтай хажуу тийш авах ба тохойгоороо бага зэрэг нугална. Хоёр гараа нүүрний хэмжээний өндөрт авчран нийлүүлэх үед эрүүгээ цээжиндээ хүртэл доош болгоно. Дараа нь гараа салган нуруугаа тэгшлэх ба толгойгоо аль болох арагшаа болгоно. Энэ хоёр дасгалыг хийхдээ байрлалаа 7 секундын турш барих хэрэгтэй.
- Үндсэн байрлалаар сууж амьсгаа авахдаа мөрөө дээш, гаргахдаа доош болгоно.
- Үндсэн суултаар суугаад баруун болон зүүн тийш хазайх, гэдсээ татах болон суллах байдлаар 10 минут хөдөлнө.
Хүний биед эрүүл энх байх бүх л боломж, чадал байгалаас заяасан бөгөөд хүн зөвхөн залхуурахгүй, энэ үнэлж баршгүй нөөцийг ашиглах л дутаад байна хэмээн Кацузо Ниси хэлсэн билээ.
Гоё
Хөөрхөн
Тэнэглэл
Буруу
Гайхмаар
Ха Ха
Бахархмаар
Харамсалтай
