Технологийн асар хурдтай, өндөр хөгжил хүн төрөлхтөн бидний өдөр тутмын амьдралыг маш ихээр хөнгөвчилж, дэндүү амар хялбар болгож байна. Хог шүүрдэх, шал арчих, хивс цэвэрлэх, тоос арчих гэх мэт гэр ахуйн бүхий л үйлдлүүдийг ганцхан багажаар бараг ганц үйлдлээр хийдэг болоод байгаагийн зэрэгцээ холбоо харилцааны болон бусад талууд дээр ярихын ч хэрэггүй. Шинэ шинэ техник технологиуд ар араасаа гарч ирсээр байгаа нь цаашдын бидний амьдрал одоогийнхоос ч илүү амар хялбар болохын дохио биз. Ямартай ч сармагчингаас өнөөгийн оюун ухаант хүн болохын тулд уртаас урт адармаатай замыг туулж ирсэн хүн төрөлхтөн бидний амьдралын салшгүй хэсгүүд болсоор байгаа технологийн шинэ шийдлүүдийг амьдрал ахуйдаа нэн даруй нэвтрүүлэгч технологийн хорхойтнуудын гэрт заавал байх ёстой 10 төхөөрөмжийг бид танилцуулж байна. Тухлан сууж уншина уу.
Кохлер Нуми /Kohler Numi/ жорлон
Ариун цэврийн болон гал тогооны өрөөний тоног хэрэгслийн Кохлер брэндийн Нуми байгальд ээлтэй жорлон нь орчин үеийн ариун цэврийн өрөөний загварлаг бөгөөд үр ашигтай тоноглол юм. Хөдөлгөөнөөр идэвхждэг суултуур болон таг, олон төрлийн тохируулга бүхий даруулга болон шүршигч цорго, хатаагч, үнэр дарагч модны нүүрсэн шүүлтүүр, гэрэлт хавтангууд болон хөлнөөс халаагч зэргээр тоноглогдсон Нумигийн бас нэгэн дурдууштай тал нь хөгжимтэй болсон явдал юм. Удирдлагаар дуртай дуугаа тоглуулан сонсох боломжийг энд бүрдүүлжээ.
Нэтатмо цаг уурын станц /Netatmo Weather Station/
iPhone болон Android гар утаснуудад зориулсан утасгүй цаг уурын станцын Нэтатмогийн энэ төхөөрөмж агаарын чанар, чийглэг, нүүрстөрөгчийн давхар исэл, гадна болон дотор температур тэр ч бүү хэл дуу чимээний бохирдлыг хүртэл тодорхойлон ухаалаг гар утас эсвэл таблетын тань дэлгэцэн дээр харуулдаг.
Айроцид /Airocide/ агаар цэвэршүүлэгч
НАСА-гийн эрдэмтдийн зохион бүтээсэн Айроцид нь агаарт байгаа харшил болон астма үүсгэгч хорт бодисуудыг цэвэршүүлдэг. Энэхүү төхөөрөмж нь шүүлтүүрийн оронд хоёр катализын хариу үйлдлийн хэсгээр дамжуулан агаарт байгаа өвчин үүсгэгч жижиг организмыг исэлдүүлэх нанотехнологийг ашигладаг байна. Айроцид нь модерн урлагийн нэг хэсэг мэт харагдах байдалтайн дээр мэдрэгч бүхий удирдлагатай.
КалипсоКи /CalypsoKey/ болон кейс
Өнөөгийн бид нар ухаалаг гар утаснаасаа илүү гэрийнхээ түлхүүрийг мартдаг болоод байгаа. Хоёр зүйлд санаа зовох явдлыг нэгтгэсэн КалипсоКи нь iPhone ухаалаг гар утасны тусгай кейсэн дотор байрладаг. Кейсийг тохиромжтой байрлалд аваачсанаар холболт идэвхжиж, хаалганы цоож нээгдэнэ.
Ханын толин дээрх iOS залгуур /Digital Habit(s) iOS Dock/Mirror
Нэг хэсэг нь хажуу тийш гулгаснаар iPhone эсвэл iPod төхөөрөмжийн залгуур нээгдэж, хөгжим эгшиглэж эхлэх ба толин доогуураа гараараа далласнаар толины доорх хөдөлгөөнөөр идэвхжидэг мэдрэгчүүдээр дамжуулан дуугаа солих, дууг нэмж хасах үйлдэл хийдэг байна.
Нарны энергиэр ажилладаг хибрид өвсний машин /Husqvarna Automower Solar Hybrid/
Хашааныхаа өвсийг хадахын тулд танд хүчирхэг гурван толгойт булчин байх шаардлагагүй болоод байна. Энэхүү робот автомат өвс хадагч машиныг гэрэлтэй нөхцөлд байрлуулснаар нарны энерги цуглуулагч хавтан нь 2100 кв.м хүртэлх талбайн өвсийг хадах хэмжээний энергийг батерейндаа хуримтлуулж чадна.
Зета задгай зуух /Zeta Fireplace/
Арьсан өнгөлгөөтэй, титан доторлогоотой энэхүү гоёмсог задгай зуух эвхчихэж болдог авсаарханы дээр аль ч өрөөгөө дулаацуулах боломжийг олгоно.
Орас Етерна /Oras Eterna/ ухаалаг шүршүүр
Эхний ээлжинд үр өгөөжтэй бөгөөд усанд хэмнэлттэй байхаар зохион бүтээгдсэн энэ шүршүүр технологитой нэгдсэнээр гайхалтай болж хувирсан. Ногоон гэрэл танд хоёр минутанд шүршүүрт орохыг сануулах бол улаан гэрэл таныг илүү их ус урсгаж байгааг сануулна. Усны температурын нарийн тохиргоо нь таныг шалзлах эсвэл дааруулахаас хамгаална.
Нарны эрчим хүчийг хуримтлуулагч ширээ /Solar-Powered Sun Table/
Цаг уурын хамгаалалт бүхий Нарны ширээг бүрэн цэнэглэгдэх хүртэл 4 цаг нарны шууд гэрлийн тусгалтай газарт байрлуулаад дараа нь лаптоп, гар утас, ширээний гэрэл гэх мэт эрчим хүч шаарддаг төхөөрөмжүүдийг асаахад хэрэглэж болно.
Уинбот Робот /Winbot Robot/ цонх цэвэрлэгч
Энэхүү бяцхан төхөөрөмж цонхны шил гэх мэт цэвэрлэх гадаргууныхаа хэмжээг тодорхойлоод дараа нь гурван үе шаттайгаар цонхыг тань цэвэрлэнэ. Шүрших, угаах, арчих гэсэн гурван үе шатат цэвэрлэгээг хийнэ.
0
Гоё0
Ха Ха0
Хөөрхөн0
Гайхмаар0
Бахархмаар0
Харамсалтай0
Тэнэглэл0
Буруу
