Тансаг зэрэглэлийн хамгийн гоёмсог, хамгийн сэтгэл татам цагны загварууд

Өндөр үнэтэй үнэт эдлэл, хосгүй тансаг автомашинтай хамт тансаг амьдралын салшгүй нэг хэсэг болсон зүйл бол тансаг зэрэглэлийн бугуйн цаг байдаг билээ. Зарим тохиолдолд тансаг зэрэглэлийн цаг гоёмсог машинаас ч илүү үнэд хүрэх нь бий. Yүнд гайхаад байх зүйл огтхон ч үгүй, учир нь зарим нэг тансаг зэрэглэлийн цаг нь жинхэнэ урлагийн бүтээл, ер бусын гоёмсог музейн үзмэр байдаг. Дэлхий даяар ийм чамин цаг хийдэг олон компани, жижиг урлангууд байдаг бөгөөд зарим нэгэн тансаг зэрэглэлийн цагнуудын хувьд маш цөөхөн хувь ширхэгээр, заримдаа бүр цорын ганцхан ширхэг ч хийгдэх нь бий. Ийм ер бусын, хосгүй тансаг загварын цаг нь хэн нэгэн хувь хүний тусгай захиалгаар, эсвэл цаг үйлдвэрлэгч компаний тэмдэглэлт ой гэх мэт онцгой ач холбогдолтой үйл явдал зэрэгт тусгайлан зориулж хийгддэг. Бид бүхэн таны сонирхолд нийцүүлэхээр дэлхийн хамгийн ер бусын тансаг, гоёмсог бугуйн цагнуудын фото зургийн цуглуулгыг бэлтгэсэн нь энэ ба эдгээр бугуйн цагнууд 5.000-аас 1.5 сая долларын үнээр үнэлэгдэж байгаа юм.

Double Tourbillon 30° Vision
Швейцарийн Greubel Forsey хэмээх цаг үйлдвэрлэгч компаниас 2006 онд гаргасан дээд зэргийн тансаг зэрэглэлийн дараах цаг нь цагны минутын зайг хэмжих ховор төхөөрөмж бүхий давхар эргүүлэгтэй цагаан алтан цаг бөгөөд 200.000-аас 300.000 доллараар үнэлэгдэж байгаа ажээ.

Arena Metasonic Luxury Watch
Маш чамин цагнуудаараа алдартай Швейцарийн Gеrald Genta брэндийн Arena Metasonic загварын дуут цагны цуврал 1994 онд анхныхаа цагийг танилцуулж байснаас хойш өнөөг хүртэлх хугацаанд улам бүр шинэчлэгдэн сайжирсаар ирсэн байна. Энэхүү цаг нь дотроосоо гарах дууг нэмэгдүүлэхээр зохион бүтээгдсэн 46 мм-ийн өргөнтэй титан болон бусад тусгай металь хайлшуудаар хийгдсэн бөгөөд ердөө 10-хан ширхэг хийгдсэн тус цаг нь 900.000 доллараар үнэлэгдэж байгаа ажээ.

Bvlgari Serpenti Luxury Watch
Италийн Bulgari компани нь 19-р зууны сүүлчээс эхлэн тансаг гоёл чимэглэлийн зүйлс болон өндөр үнэтэй цаг үйлдвэрлэж эхэлсэн түүхтэй. Тансаг зэрэглэлийн Bvlgari Serpenti Watch бугуйн цаг нь тус компаний 125 жилийн ойд зориулан гаргасан цуглуулгын үргэлжлэл ба Serpenti цуглуулгын онцлог шинж нь өнгөрсөн зууны дундуур Bvlgari-ын мастеруудын бүтээсэн могой хэлбэрийн мушгирсан бугуйвч юм. Цутгаж, өнгөлж хийсэн цагны гэр нь 18 каратын алтаар бүрхэгдэж, нийтдээ 0.29 каратын 38 ширхэг очир алмаазаар чимэглэгджээ. Мөн цагны зүү болон ром тоонууд нь алтаар хийгдсэн байна.

Parmigiani Fleurier Bugatti 370
Bugatti Veyron загварын автомашинаас сэдэлтэйгээр хийгдсэн Bugatti Type 370 Centenaire загварын цаг нь Швейцарийн Parmigiani Fleurier брэндийн нэр дээр гарсан бөгөөд ер бусын дизайнаараа худалдан авагчдын сонирхлыг гойд ихээр татаж байгаа юм. Энэхүү ер бусын цагны цилиндр хэлбэрийн загвар нь жолооч нарт машиныхаа жолооноос гараа салгахгүйгээр цагаа харах боломжийг олгож байгаа ажээ. 18 каратын алт болон 950-ын цагаан алтан гэсэн хоёр загвараар хийлгэх боломжтой энэ цаг нь сийлбэрийн мастер Philip Bodenmannu-гийн 300 орчим цагийн хөдөлмөрийн дүнд бий болсон байна. Францын Hermеs хэмээх загварын ордны тугалын арьсан оосор бүхий энэ цаг жилд 150 ширхэг л хийгддэг байна.

Rolex Oyster Perpetual Date Just Lady
Швейцарийн өндөр чанартай, тансаг зэрэглэлийн цаг үйлдвэрлэгч Rolex компани Oyster Perpetual Date Just Lady загварын бугуйн цагаа цаг болон үнэт эдлэлийн худалдааны BaselWorld 2010 үзэсгэлэн дээр танилцуулсан байна. Саарлаас эхлээд шоколадан бор гэхчилэн өөр өөр өнгө бүхий нүүр нь долгиолсон мөн дугуй хэлбэрийн 24 эсвэл 46 ширхэг гялалзсан үнэт чулуугаар чимэглэгдсэн хүрээтэй юм. Мөн тус цагны ром тоогоор дүрслэгдсэн зургаагийн тоо нь эрдэнийн чулуун шигтгээтэй ажээ. Єє сэвгүй, туйлын чамин хээнцэр эдгээр Rolex-ын хатагтай нарын гоёл нь эмэгтэй хүний тансаг, уян налархай шинж чанарыг илтгэн харуулдаг байна.

New Artisan Timepiece Collection
Швейцарийн тансаг зэрэглэлийн Angular Momentum брэнд шилэн нүүрнийхээ ар талд бяцхан зураг бүхий New Artisan Timepiece Collection загвараа гаргажээ. Yлгэр домог буюу verre еglomisе гэгддэг шилний ар талыг алт болон металь ялтсаар бүрэх техникийг ашиглаж хийгдсэн энэ зургийг Голландын барокко стилийн зураач нар зурж гүйцэтгэжээ. Шилэн нүүр, ган төмрөн гэр бүхий энэ механик цагны зургаа болон арван хоёрын тооны харалдаа дугуй хэлбэрийн үнэт чулуу шигтгэжээ.

Chanel J12 Marine Diver
Chanel загварын ордноос Baselworld 2010 үзэсгэлэн худалдаан дээр Chanel J12 Marine Diver хэмээн нэрлэгдсэн цагаа танилцуулсан нь өндөр технологийн дүнд гаргаж авсан керамик болон болороор хийгдсэн бөгөөд гадны нөлөөллөөс хамгаалах тусгай давхарга бүхий индранил чулуу нь усны гүнд 300-аас дээш метр шумбадаг шумбагч нарт тусгайлан зориулж бүтээгджээ. Цагны оосрын хувьд мөн адил өндөр технологиор гаргаж авсан керамик ашигласан өндөр чанартай резинээр хийгдсэн байна. Хар болон цагаан өнгөний сонголт бүхий энэ цаг 5.000 орчим доллараар үнэлэгдэж байгаа юм.

Cartier Santos Triple 100
Францын цаг, үнэт эдлэл үйлдвэрлэгч Cartier брэндийн Cartier Santos Triple 100 бугуйн цагны 18 каратын цагаан алтан гэр нь бүхэлдээ үнэт эрдэнийн чулуун шигтгээгээр бүрхэгдсэн бөгөөд очир алмаазны нийт тоо нь 861 ширхэгт хүрч, харин тэдний нийт жин нь 7.6 каратад хүрэх ажээ. Цагны гол онцлог нь солигддог нүүртэйгээр хийгдсэнд орших ба нэг цаг гэхэд гурван өөр нүүртэй болох боломжтой. Yүний эхний хэлбэр нь очир алмааз болон хар өнгийн индранил чулуугаар бүрхэгдсэн бол хоёр дахь нь барын толгой сийлбэрлэсэн, харин гурав дахь сонгодог хэлбэр нь цагны бүх тоог ром тоогоор дүрсэлсэн байна. Ердөө 20-хон хувь хийгдсэн энэ цаг 340.000 долларын үнэтэй юм байна.

Harry Winston Opus X Luxury Watch
Harry Winston брэнд Opus загварын бугуйн цагныхаа 10 жилийн ойд зориулан Opus X хувилбарын шинэ дурсгалын цагийг гаргасан нь гариг эрхсийн хөдөлгөөн болон цаг хугацааны үргэлжлэх дарааллаас санаа авч сэдсэн бүтээл болжээ. Opus X бугуйн цагны зүү нь цагийн зүүтэй нэгэн зэрэг эргэлдэх хүрээн дотор суурилагдсан бөгөөд цагны заалтын ажиллах зарчим нь төв цэгээ тойрон тойрог замаар хөдлөх нарны аймгийн системийг санагдуулахуйц ажээ.

RSW Wonderland Ladies Watch
Швейцарийн RSW компани нь эмэгтэйчүүдэд зориулсан ер бусын тансаг зэрэглэлийн цагаа танилцуулсан нь Ladies Wonderland Watch нэртэй бугуйн цаг юм. Дөрвөлжин хэлбэрийн нүүрэн дээр нь үечилсэн, доош хонхойлгож хийсэн хээтэйгээс гадна ган төмрөөр хийгдсэн гэрийг нь очир алмаазаар чимэглэжээ. Тус цаг нь саарал, хар, сувдан цагаан гэсэн өнгөтэй нүүртэйгээр гарсан байна.

Quadruple Tourbillon
Швейцарийн Greubel Forsey компани урлаг болон техникийн хооронд шинэчлэл хийсэн Quadruple Tourbillon цагаа танилцуулсан нь дөрвөн эргүүлэгт системтэй бөгөөд гэрний хувьд 18 каратын улаан алтаар хийгдэж, тэгш өнцөгт хэлбэртэй гүдгэр индранил чулуугаар чимэглэгджээ.

Millenary Tradition of Excellence Cabinet No.5
Швейцарийн Audemars Piguet цаг үйлдвэрлэгч компаний Millenary Tradition of Excellence Cabinet загварын бугуйн цаг нь дөрвөн эргүүлэгт системтэйгээс гадна нэвт харагддаг цагны гэр нь индранил чулуугаар хийгджээ. Оосорны хувьд цагаан алтан түгжээ бүхий гараар оёж хийсэн хөх өнгийн оосортой аж. Audemars Piguet нь энэхүү онцгой цагаа тусгай бэлэгний хайрцагтайгаар 20-хон ширхэг үйлдвэрлэсэн байна.

Vacheron Constantin Tour de I’lle
Швейцарийн хамгийн нэр хүндтэй, хамгийн олон жилийн түүхтэй цагны брэнд болох Vacheron Constantin 250 жилийнхээ ойд зориулан Tour de I’lle бугуйн цагаа гаргасан нь ердөө долоохон ширхэг хийгдсэн бөгөөд нэг бүрийнх нь үнэ 1.5 сая долларт хүрч байгаа юм байна.

Classique Grande Complication Tourbillon Messidor
Тансаг зэрэглэлийн цаг үйлдвэрлэгч Breguet брэндийн Classique Grande Complication Tourbillon Messidor бугуйн цаг нь 706 ширхэг очир алмаазаар бүрсэн 18 каратын алтан тагтайгаар хийгджээ. Энэхүү үнэтэй таг нь цагийг харах нүхтэй бөгөөд ром тоо бүхий цагны нүүр нь 18 каратын сарнайн өнгөт алт орсон родий хэмээх ховор металлаар хийгджээ. Бор өнгийн аллигаторын арьсан оосортой энэ цаг 233.000 доллараар үнэлэгдэж байгаа ажээ.

Parmigiani Luxury Watch for Pershing
Швейцарийн Parmigiani Fleurier брэнд болон өнөөгийн завь үйлдвэрлэгч хамгийн том компаниудын нэг болох Pershing компани хамтран тансаг зэрэглэлийн бугуйн цагны цуглуулга гаргасны эхний багц нь шинэ хамтын ажиллагааны хүндэтгэлд зориулан цөөн тоотойгоор хийгдсэн байна. Энэ багц нь хоёр цувралтай гарснаас эхнийх нь 18 каратын алт болон алт эсвэл мөнгөн нүүртэй 950-ын палладинаар хийгдсэн бол хоёр дахь нь улаан хүрэн, мөнгөлөг, хөх, бал чулууны гэсэн дөрвөн өнгийн нүүртэйгээр ган төмрөөр хийгдсэн байна.

Maîtres du Temps Chapter One
Дэлхийн алдарт цаг үйлдвэрлэгч Peter Speake-Marin болон Christophe Clarethave нарын хамтын бүтээл болох энэхүү ер бусын цагны гол онцлог нь нэг талдаа долоо хоногийг, нөгөө талдаа од болон сарны дүрсийг харуулсан байдаг байна. Цагны гэр нь 96 хэсгээс бүрдэх ба 18 каратын улаан алтаар хийгдсэн байна.

Le Clef du Temps Tourbillon
Швейцарийн цаг үйлдвэрлэгч Confrerie Horlogere брэндийн доорх цагны гол онцлог нь цагны хурдыг эзэн хүн нь өөрєє тохируулах боломжтойд оршиж байгаа ажээ. Титанаар хийгдсэн энэ цаг 285.000 доллараар үнэлэгдэж байгаа юм байна.

Minute Repeater Tourbillon 45
Corum брэндийн Admiral’s Cup collection-ын 50 жилийн ойд зориулан гаргасан доорх цаг нь Corum брэндийн улаан өнгийн лого бүхий 18 каратын алтан түгжээ бүхий аллигаторын оосортой бөгөөд аравхан ширхэг хийгдсэн байна.

Parmigiani Fleurier’s Bugatti Tourbillon Watch
Parmigiani Fleurier брэндийн бас нэгэн гайхалтай цаг бол Bugatti Tourbillon нэртэй бугуйн цаг бөгөөд 1920-1930 онд байсан жинхэнэ агуу гайхамшигт аялалын моторт тээврийн хэрэгслээс сэдэлтэй ажээ. Гэрний хувьд 18 каратын алтаар хийгдсэнээс гадна Bugatti машины хянах самбарыг харж байгаа мэт сэтгэгдлийг төрүүлдэг ажээ. Энэ цаг нь 200.000 доллараар үнэлэгдэж байгаа юм байна.

Mysticum Luxury Watch
Германы цаг үйлдвэрлэгч KUDOKE компани Mysticum Luxury Watch хэмээх шинэ тансаг зэрэглэлийн цагаа танилцуулсан нь шар эсвэл цагаан алт, мөн ган төмрөөр хийгджээ. Цагны гараар сийлбэрлэж хийсэн гоёмсог хээ хуар бүхий нүүрэн дээрх тоонууд нь бяцхан товгор биетүүдээр хийгдсэн байна. Энэ цагны үнэ 6.500 долларт хүрч байгаа ажээ.

0

Гоё

0

Ха Ха

0

Хөөрхөн

0

Гайхмаар

0

Бахархмаар

0

Харамсалтай

0

Тэнэглэл

0

Буруу

Баярлалаа!