Жигнэх шаардлагагүй амтат чизкейк хийх 7 төрлийн жор

Өөрийн гараар хоол бэлтгэнэ гэдэг зугаатай биш гэж үү? Ингэхэд баярын ширээнийхээ бялууг та өөрөө хийдэг үү эсвэл худалдаж авдаг уу? Бид танд өөрийн гараар хийхийг зөвлөмөөр байна: жишээ нь чизкейк. Хийх хэцүү гэж бодож байна уу? Эндүүрч байна!

Бид танд гэрийн нөхцөлд бэлтгэх боломжтой энэхүү зөөлөн амттаны 7 төрлийн жорыг санал болгож байна. Туршаад үзээрэй.

Уламжлалт чизкейк

Орц:

• 300 гр жигнэмэг (жишээ нь “Юбилейное”)
• 100-150 гр цөцгийн тос
• 500 гр маскарпоне, “Филадельфия” бяслаг эсвэл тослоггүй гашилсан сүүний бяслаг
• 200 мл 33-35%-ийн тослогтой цөцгий
• 150 гр элсэн чихэр
• 20 гр желатин

Бэлтгэх арга:

1. Желатинаа 100 мл хүйтэн буцалсан усанд хийгээд нэг цаг орхино.
2. Жигнэмэгээ блендерт жижиглээд дараа нь дээрээс нь хайлуулсан тосоо нэмж бүгдийг сайтар хутгана.
3. Цөцгийн тостой жигнэмэгээ хэвэнд (24-26 см-ийн диаметртэй) хийгээд сайтар чигжиж нягтруулаад дүүргэлтийг бэлтгэж дуусах хүртэл хөргөгчинд байлгана.
4. Желатинаа халаана, гэхдээ буцалгаж болохгүй шүү. Хөргөөрэй.
5. Цөцгийгөө элсэн чихэртэй хамт цохино.
6. Дээрээс нь маскарпоне нэмж сайтар холино.
7. Дээрээс нь желатинаа нэмээд дахин холино.
8. Бэлэн болсон холимгоо жигнэмэгэн суурин дээр тавьж тэгшлээд хөргөгчинд 3-4 цаг байлгаарай.

Шоколадтай чизкейк

Орц:

• 150 гр үйрмэг жигнэмэг
• 50 гр цөцгийн тос
• 100 гр элсэн чихэр
• 120 мл хутгаж хөөсрүүлэх зориулалттай өтгөн зөөхий
• 150 гр хар шоколад
• 2 хоолны халбага нунтаг какао
• 200 гр цөцгийтэй бяслаг

Бэлтгэх арга:

1. Буцалсан устай саван дээр савтай шоколадаа хайлуулна. Дараа нь хөргөөрэй.
2. Жигнэмэгээ блендерт хийж жижиглэнэ. Хайлуулсан цөцгийн тос, 1 хоолны халбага элсэн чихэр нэмээд сайтар холино.
3. Бэлэн болсон сууриа хэвэндээ хийж чигжээд хөргөгчиндөө хийнэ.
4. Хутгаж хөөсрүүлэх зориулалттай өтгөн зөөхийгөө хөөсрүүлээд дээр нь эхлээд хөрсөн шоколадаа нэмээд дараа нь жоохон усанд найруулсан нунтаг какао нэмнэ. Бүгдийг болгоомжтой хутгаарай.
5. Цөцгийтэй бяслагийг элсэн чихэртэй цохино. Шоколадан холимогтой нийлүүлээд хутгана.
6. Хөлдөөсөн суурин дээрээ тавина. Хөлдөөгчинд 1 цаг байлгана.
7. Хөлдөөгчөөс гаргаад хөргөгчинд 30 минут байлгаад чизкейкээ зүсэж болно.

Самар, нэрстэй чизкейк

Орц:

• 500 гр аарц
• 500 гр зөөхий
• 1 стакан элсэн чихэр
• 200 гр самар (бүйлс, кешью, хушга)
• 100 гр нэрс эсвэл нэрсний чанамал
• 150 гр цөцгийн тос
• 200 гр желатин
• 150 гр хасарваань эсвэл хатаасан чангаанз

Бэлтгэх арга:

1. Самар, хасарваань (хатаасан чангаанз) жимсээ блендерт жижиглээд хайлуулсан цөцгийн тостойгоо хольж хэвэндээ туурга үүсгэн суурийг бэлтгэнэ.
2. Желатинаа уусгана.
3. Аарц, элсэн чихэр, зөөхийгөө нэгэн жигд болтол цохино. Дээрээс нь желатин нэмээд дахин нэг удаа сайтар холино.
4. Дээрээс нь нэрс эсвэл нэрсний чанамал нэмээд дахин нэг удаа сайтар холино.
5. Бэлэн болсон холимгоо суурин дээр асгаад хөргөгчинд 3-4 цаг байлгана.
6. Суурь нь хангалттай сайн биежих үед чизкейкээ шинэхэн жимс эсвэл чанамлаар чимэглээрэй.

Гадилтай чизкейк

Орц:

• 350 гр үйрмэг жигнэмэг (“Юбилейное” болно)
• 150 гр цөцгийн тос
• 3 гадил
• 2 хоолны халбага нимбэгний шүүс
• 450 гр аарц
• 200 мл цөцгий
• 2 хоолны халбага сахарын пүдр
• 1,5 хоолны халбага желатин

Бэлтгэх арга:

1. Жигнэмгээ блендерт хийж жижиглээд дараа нь хайлуулсан цөцгийн тостойгоо холино.
2. Бэлэн болсон сууриа хэвэнд хийж тэгшилнэ.
3. Желатинаа 6-7 хоолны халбага халуун усанд хийгээд бүрэн уустал хутгана.
4. 2 гадил жимсийг нимбэгний шүүстэй хамт блендерт жижиглэнэ. Дараа нь аарц, цөцгий, сахарын пүдр нэмнэ. Крем шиг болтол хутгаад дараа нь хутгангаа желатинаа удаанаар хийнэ.
5. Бэлтгэсэн холимгоо жигнэмэгэн суурин дээр асгаад хөргөгчинд 3-4 цаг царцаана.
6. Бэлэн болсон чизкейкийг хэвнээс нь салгаад гадилаар чимэглээрэй.

Аарц, молокотой чизкейк

Орц:

• 300 гр аарц
• 300 гр молоко
• 250 гр үйрмэг жигнэмэг
• 200 гр цөцгийн тос
• 1,5 хоолны халбага желатин
• 100 мл цөцгий

Бэлтгэх арга:

1. Желатинаа заавар дээр заасан усны хэмжээний дагуу хийж найруулна.
2. Жигнэмгээ жижиглээд хайлуулсан тостойгоо холино.
3. Бэлтгэсэн зуурмагаа хэвэндээ хийж туурга үүсгэн суурийг бэлтгэнэ.
4. Блендерт молоко, аарц, цөцгий хийж холино. Дээрээс нь желатин нэмж дахин нэг удаа сайтар холино.
5. Дүүргэлтийг жигнэмэгэн суурин дээр асгана.
6. Амттанаа хөргөгчинд 3-4 цаг байлгана.
7. Чизкейкээ өөрийн хүслээр чимэглээрэй.

Бөөрөлзгөнөтэй аяган чизкейк

Орц:

• 9 ширхэг жигнэмэг (дурын)
• 150 гр хөлдөөсөн бөөрөлзгөнө жимс
• 2 хоолны халбага эрдэнэ шишийн цардуул
• 30гр элсэн чихэр
• 300 гр “Филадельфия” эсвэл “Альметте” гэрийн бяслаг
• 100 гр 30%-ийн тослогтой цөцгий
• 250 мл хүйтэн ус

Бэлтгэх арга:

1. Жигнэмгээ жижиглэнэ.
2. Хөлдөөсөн жимсээ саванд хийж бага гал дээр гэсгээнэ.
3. Ялгарсан шүүсийг шүүж аваад дээрээс нь усныхаа талыг нэмж дараа нь эрдэнэ шишийн цардуул нэмээд бүгдийг сайтар холино.
4. Жимсэн дээрээ үлдсэн усаа нэмээд элсэн чихэр нэмж дахин гал дээр тавина.
5. Холимог халаад ирмэгц эрдэнэ шишийн цардуулыг аажим хийнгээ тасралтгүй хутгана. Бэлэн болсон киселийг хөргөнө.
6. Гэрийн бяслаган дээрээ бага зэрэг цөцгий нэмж хутгаад крем бэлтгээрэй.
7. Стаканы ёроолд жижиглэсэн жигнэмэг, крем, бөөрөлзгөний киселийг үелэн тавина. Дахин дээрээс нь жигнэмэг, крем, кисель үелэн тавиарай.
8. Гааны навч, жимс, кремээр чимэглээрэй.

Мандаринтай чизкейк

Орц:

• 300 гр жигнэмэг
• 150 гр цөцгийн тос
• 500 гр аарц
• 200 мл 32-33%-ийн тослогтой цөцгий
• 150 гр элсэн чихэр
• 20 гр желатин
• 4 мандарин
• 1/2 стакан сахарын пүдр

Бэлтгэх арга:

1. Желатинаа 150 мл буцалсан хүйтэн усанд хийгээд нэг цаг орхино.
2. Жигнэмгээ жижиглээд хайлуулсан тостойгоо холино.
3. Бэлэн болсон холимгоо илгэн цаас дэвссэн дугуй хэвэнд хийж чигжээд хөлдөөгчинд хийнэ.
4. Желатинаа хайлтал халаана.
5. Элсэн чихэр, аарц, цөцгийгөө нэгэн жигд болтол хутгана. Дээрээс нь хөргөсөн желатинаа нэмнэ.
6. Жигнэмэгтэй хэвэндээ холимгоосоо хийгээд хөргөгчинд царцаана.
7. Мандаринаа сахарын пүдрт хийгээд 30 минутыг дараа шүүс ялгармагц 5-10 минут зөөлөн галаар буцалгана.
8. Бэлэн болсон чизкейк дээрээ соуснаасаа асгаад мандаринаар чимэглээрэй.

60

Хөөрхөн

14

Гоё

9

Гайхмаар

5

Тэнэглэл

4

Буруу

3

Бахархмаар

3

Ха Ха

2

Харамсалтай

Баярлалаа!