Бодит түүхээс сэдэвлэсэн кинонууд бидэнд болж өнгөрсөн бодит үйл явдлыг өөрийн биеэр мэдрэх боломжийг олгож байдаг билээ. Гэсэн ч тэдгээр бүтээлүүдэд бодит үйл явдлаас хэтийдсэн уран сайхны хэтрүүлэг ихээр орсон байх нь бий. Манай сайт уншигч танд болсон бодит үйл явдлыг гажуудуулан дэлгэцнээ гаргасан 11 киног танилцуулж байна.
1. “The Theory of Everything” кинон дээрх Stephen Hawking-ын дурлалын түүхийг өөрчилсөн
Тус кинон дээр нэрт физикчийн дурлалын түүх Британийн Кембрижийн их сургуульд эхэлж буйгаар өгүүлдэг ч энэ нь бодит түүхээс гажуудсан үзэгдэл ажээ. Үнэн хэрэгтээ тэд ахлах сургуулийн найзууд байсан бөгөөд тэр үеэс тэдний дурлалын түүх эхэлсэн түүхтэй.
2. “Rush” киноны гол дүрийн залуус эцсээ хүртэл найзууд хэвээр үлдсэн
1970-аад онд үйл явдал нь өрнөдөг Niki Lauda болон James Hunt уралдааны машины нисгэгчдийн амьдралын түүхийг өгүүлэх “Rush” кинонд гол дүрийн залуусыг өрсөлдөгчид хэмээн харуулдаг билээ. Тэгвэл бодит амьдрал дээр тэд дотны сайн найзууд байсан бөгөөд хамтдаа байр түрээслэн амьдарч байсан үе ч бий аж.
3. “Gladiador” кинонд түүхийн холбогдолтой хэд хэдэн алдаа бий
2000 онд нээлтээ хийж байсан алдарт “Gladiador” кинонд түүхийн болон цаг хугацааны хувьд зөрчилтэй алдаа олон бий. Тухайлбал, Колизейд хүмүүс хэвлэсэн бичигтэй цаас тарааж явдаг нь тухайн цаг үед боломжгүй зүйлсийн нэг билээ. Мөн Ромын эзэнт гүрний үед Анфитеатр хэмээн нэрлэгддэг байсан ч тус кинонд хожим үеийн нэр болох Колизей хэмээн нэрийдэж буй нь харагддаг.
Түүнчлэн цезaрь Маркус Аурелиус бодит амьдрал дээр өвчний улмаас таaлал төгсөж, түүний хүү Коммодус хууль ёсоор хаан ширээнд заларсан байдаг ажээ. Коммодусын хувьд аавыгаа эцсийн мөч хүртэл нь асарч, түүнтэй хамтаар эзэнт гүрнээ засаглаж байсан нэгэн юм.
4. “The Imitation Game” кинонд машины нэрийг сольсон
Дaйны цаг үед германы aрмийн нууц кодыг тайлж унших машин бүтээсэн Alan Turing-ийн амьдралыг өгүүлэх тус кинонд машиныг Кристофер хэмээн нэрийддэг. Гэвч бодит амьдрал дээр тус машины нэрийг “Бөмбөг” хэмээн нэрлэж байжээ.
Кино зохиол Кристофер нэрийг өгөхдөө Alan Turing-ийн дотны найз, ажлын хамтрагч байсан Кристофер Моркомын нэрнээс санаа авч өгчээ.
5. Уиллиам Уоллос жинхэнэ хатан зоригтон байгаагүй
Нэрт жүжигчин Mel Gibson-ий бүтээсэн Уиллиам Уоллосын дүрийг мэдэхгүй хүн үгүй гэхэд хилсдэхгүй биз ээ. Гэвч бодит түүхийг сөхөн харвал тухайн цаг үеийн жинхэнэ хатан зоригтон бол Уиллиам бус Шотландын 1-р Роберт хаан байсан ажээ. Тус кинонд Роберт хааны дүрийг жүжигчин Angus Macfadyen бүтээсэн байдаг билээ.
6. “Django Unchained” кинонд нарны шил зүүсэн нь
Жүжигчин Jamie Foxx-ын чадварлаг бүтээсэн Django-ын дүр өөрийн өвөрмөц дүр төрхөөрөө үзэгчдийн дунд алдаршсан билээ. Гэвч тэрээр кинонд нарны шил зүүж харагддаг нь тус киноны үйл явдал өрнөх 1860-аад онтой нийцэхгүй явдал ажээ. Нарны шилийг хүн төрөлхтөн 1920-оод оноос эхлэн хэрэглэж эхэлжээ.
7. “Pirates of the Caribbean: The Curse of the Black Pearl” кинонд жүжигчдийн хувцас хэрэглэл, үйл явдал өрнөх байрлал түүхтэй нийцээгүй
Хөгжилтэй, адал явдлаар дүүрэн өрнөлтэй тус кино дэлхий даяар асар их амжилт дагуулсан билээ. Тус кинонд Порт Рояаль хотыг 1720-иод оны Британийн гол боомт хотуудын нэг хэмээн харуулдаг. Гэвч бодит байдал дээр тус хот 1692 он газар хөдлөлтийн улмаас бүрэн сүйдсэн ажээ.
Мөн усан цэpгүүд дүрэмт хувцас өмссөн байсан нь бодит түүхтэй мөн нийцдэггүй аж. Учир нь усан цэpгүүд 1748 оноос эхлэн дүрэмт хувцас өмсдөг болсон түүхтэй.
8. “Mary Queen of Scots” кинонд Шотландын хатан хаан Мериг пирсингэд дурласан нэгэн болгож харуулав
Тус кинонд хатан хаан Мериг чихээ олон цоолж пирсинг хийлгэсэн байгааг ажиглах боломжтой. Гэвч пирсинг харьцангуй орчин үеийн соёл бөгөөд тухайн киноны үйл явдал өрнөх 16-р зуунд байгаагүй гэдэг нь лавтай.
9. “Shakespeare in love” кинонд Шекспирийн хайр Ромео Жульетта жүжгийн зохиолыг бичих сэдэл өгөөгүй
Шекспирийн амьдралын нэгэн түүхийг өгүүлэх “Shakespeare in love” кино нь бодит түүхээс илүүтэйгээр уран сайхны хэтрүүлэг, зохиол давамгайлсан бүтээл ажээ. Нэрт зохиолч, яруу найрагчийн амьдралын түүхийн баримт бидний үед тун бага уламжлагдан ирсэн нь ч үүнтэй холбоотой биз ээ. Тус кинонд дурлалдаа шатсан Уиллиам Ромео Жульетта жүжгийн зохиол бичиж байгаагаар харуулдаг ч үнэн хэрэгтээ тэрээр тус зохиолоо италийн зохиолч Луйжи Да Портогийн нэгэн бүтээлээс санаа авч бичсэн гэдэг.
10. Аполло 13 хөлгийн түүх болон нэр нь дурдагдаагүй жинхэнэ баатар
“Apollo 13” нэртэй тус кинонд НАСА агентлагийн ажилтнуудын гүйцэтгэдэг ажил хэрэг, хүндрэл бэрхшээл зэргийг тодорхой өгүүлдэг билээ. Гэвч бодит амьдрал дээр кинон дээр өгүүлдэг шиг гэнэтийн байдалд авч хэрэгжүүлэх хариу арга хэмжээ, төлөвлөгөө бэлэн байдаг тул гэнэтийн хүндрэлтэй байдалд орох нь маш ховор тохиолддог аж. Түүнчлэн тус кинонд Аполло 13 хөлгийг аврахад хамгийн том нөлөө үзүүлсэн хөлгийн инженер, нислэгийн багийн зохицуулагч Glynn Lunney-г дурдаагүй нь том алдаа байсан гэдэг.
11. “The Pursuit of Happyness” кинонд Крисийн амжилтыг дутуу гаргасан
Крис Гарднерын амьдралын түүхийг өгүүлсэн тус бүтээлд гол дүрийг тун чадварлаг дүрслэн харуулсан боловч түүний санхүүгийн байдлыг тийм ч таатай дүрсэн харуулдаггүй билээ. Тэгвэл бодит амьдрал дээр Крис 1000 ам.долларын ашигтай ажиллаж чадсан гэдэг. Энэ нь Сан Франциско хотод хүүтэйгээ амьдардаг аавын хувьд хангалттай хэмжээний мөнгө биш боловч кинон дээр өгүүлснээс хавьгүй их хэмжээний мөнгөн дүн билээ.
Таны хувьд хамгийн үзэх дуртай, бодит явдлаас сэдэвлэсэн кино юу вэ?