Шар өнгөний тухай бодох үед магадгүй таны толгойд нар, намрын навчис зэрэг сэтгэлд хөнгөхөн санагдах, эерэг зүйлс хамгийн түрүүнд орж ирэх биз ээ. Мэдээж араас нь Пикачу, Спонж Боб, Симпсонс зэрэг олон хүүхэлдэйн киноны дүрүүд хөвөрнө. Тэгвэл манай сайт уншигч танд хүүхэлдэйн киноны дүрүүд шар өнгөтэй байдаг нь ямар шалтгаантай байдаг тухай хүргэж байна.
1. Өнгөний ялгарал
Үндсэн өнгөнүүдээс хамгийн тод бөгөөд хүний сэтгэлд хамгийн эхэнд үлддэг өнгө бол мэдээж шар өнгө. Хөх, улаан болон шар өнгө бол үндсэн өнгө боловч орчин цагийн цахилгаан хэрэгслүүдийн дэлгэцний үндсэн өнгөөр улаан, хөх, ногоон өнгийг ашиглаж байгаа нь сонирхолтой.
Өнгөний схемд шар болон хөх өнгөнүүд эсрэг туйл болдог бөгөөд бусад дүрүүдээс гол дүрийг ялгаруулах үүднээс шар өнгийг кино уран бүтээлчид ихээр ашигладаг ажээ.
2. Сэтгэлзүй
Шар өнгө нь хүний сэтгэл санаанд хөнгөхөн аз жаргалыг илэрхийлдэг аж. Судалгаагаар ч хүмүүсийн 72 хувь нь шар өнгийг харах үедээ аз жаргал мэдэрч байдаг нь тогтоогдсон байдаг. Иймээс шар өнгийг эерэг дүрүүдэд ашиглах нь элбэг байна.
3. Өнгө ялгадаггүй хүн ч шар өнгийг тод хардаг
Шар өнгө бол өнгөний туйл гэдгийг дээр дурьдсанчлан бүдэг гэрэлтэй үед болон өнгө ялгадаггүй хүмүүст ч шар өнгө тодоор ялгарч харагддаг ажээ. Түүнчлэн өдрийн гэрэлд хамгийн тод ялгарч харагддаг хоёр дахь өнгө нь шар өнгө юм.
4. Хүүхдүүд шар өнгөнд дуртай байдаг
Lego, Hot Wheels, Crayola зэрэг хүүхдэд зориулсан бүтээгдэхүүн, үйлчилгээ үзүүлдэг брендүүд шар өнгө зонхилсон сурталчилгаа явуулах хандлагатай байдаг нь бага насны хүүхэд болон тоглоомын төрлийн барааны сурталчилгаанд шар өнгө хэрэглэх нь зүйтэй гэсэн маркетингийн суурь зарчимтай холбоотой.
Бага насны хүүхдүүдийн дунд аз жаргалтай болон гунигтай түүх ярьж өгөөд шар болон бор өнгийн будгийн харандааг аль түүхээр жишиж буйг харах судалгаагаар шар өнгө ямагт аз жаргалтай түүхийг төлөөлж байгаа хандлага ажиглагдсан байдаг. Иймээс бага насныханд зориулсан хүүхэлдэйн киноны дүрүүд ихэвчлэн шар өнгөтэй байх хандлагатай байдаг ажээ.
5. Хүний анхаарал маш сайн татдаг өнгө
Гэвч шар өнгийг хүүхэлдэйн кинонд ашиглах явдал нь зөвхөн аз жаргалын өнгө гэдэгтэй нь холбоогүй байдаг ажээ. Шар өнгийг хэрэглэх бас нэгэн шалтгаан нь хүний нүдэнд маш амархан өртдөг явдал юм. Иймээс ч зарим оронд замын тэмдэглэгээ шар өнгөтэй байдаг.
Түүнчлэн зөгий, хорт могойн зарим төрлүүд шар өнгөтэй байдаг нь биднийг шар өнгөтэй зүйлсийг хараад анхаарал илүү их хандуулах төрөлхийн зөн совинд хөтөлж байдаг аж. Иймээс хүүхэлдэйн киноны дүрүүдийг илүү анхаарал татам болгох үүднээс шар өнгөтэй хийдэг байна.
Таны хувьд хамгийн дуртай шар өнгөтэй дүр юу вэ? Сэтгэгдэл хэсэгт бидэнтэй хуваалцаарай.
Гайхмаар
Гоё
Бахархмаар
Тэнэглэл
Буруу
Харамсалтай
Ха Ха
Хөөрхөн
