Ердийн машиныг өөрийгөө жолооддог болгож хувиргах шинэ төхөөрөмж

Өөрийгөө зогсоолд тавих чадвартай, өөрөө өөрийгөө жолооддог машины тухай бид бүгд мэднэ. Гэхдээ өнөөгийн машин ердийн зүйл болсон шиг өөрийгөө жолооддог машин ч бас өдөр тутмын эгэл хэрэглэгдэхүүн болох цаг хэр ойрхон байгаа бол? Олон автомашин үйлдвэрлэгчид 2020 оныг тэр үе гэж үзэж байгаа. Тэд үүнийг хэцүү боловч хийж болох зүйл гэж үзэж байна. Энэ цаг үеийг ойртуулахын тулд Cruise Automation компани ердийн машиныг өөрийгөө жолооддог болгож хувиргадаг шинэ төхөөрөмжийг бүтээжээ.

Энэхүү төхөөрөмж нь үндсэндээ зарим хязгаарлалттайгаар [tweetable]машины жолооны хүрд, хурдасгуур, хийн гишгүүрийг машиндаа хүлээлгэн өгөх боломжийг жолоочид олгож байгаа[/tweetable] аж. Cruise RP-1 хэмээн нэрлэгдсэн мэдрэгч нь сэлбэг хэрэгслийн зах зээл дээр 10,000 доллараар худалдаалагдах юм байна. Уг мэдрэгч нь машиныг бүрэн өөрийгөө жолоодогч тээврийн хэрэгсэл болгож хувиргахгүй ч хурдны зам дээр хийдэг залхуутай ажлуудаас жолоочийг чөлөөлнө. Тодруулбал энэ нь зарим нэг нэмэлт онцлогуудыг шингээж өгсөн cruise control-ын сайжруулсан хувилбар юм байна.

Компаний зүгээс мэдээлж байгаагаар RP-1 нь мэдрэгчүүд, радар, камернуудын нэгдэл бөгөөд дэвшилтэт компьютерын хараа, бартаа саад илрүүлэгчтэй гэнэ. [tweetable]Төхөөрөмж нь замын хажуугийн шугам болон урд яваа машинаас аюулгүй хэмжээний зай баримтлан явах чадвартай[/tweetable] аж.

RP-1 бүхий машиныг Калифорни мужид хууль ёсоор зөвшөөрөөд байгаа ч жолооч RP-1-ийг ашиглаж байх үедээ гар утас ашиглах, мессеж бичихийг хориглосон байгаа юм байна.

Одоогоор эхний 50 машины захиалгаа аваад байгаа тус компани 2015 онд захиалагчиддаа бүтээгдэхүүнийг хүргэх гэнэ. Audi-гийн мэдрэгч бүхий машинд суулгахад тохиромжтойгоор бүтээгдэж байгаа уг төхөөрөмжийг үйлдвэрлэгч бусад машинуудад ч тохирох мэдрэгчүүдийг бүтээх ажилдаа аль хэдийнээ орчихсон гэдгээ мэдэгджээ.