2017 онд 70 настай Joan MacDonald цусны өндөр даралт болон ходоодны шархтай нэгэн байв. Тэр тухайн үед хаван, үе мөчний өвчин, ядралтаас болж зовж шаналж байсан бөгөөд шатаар буух нь түүний хувьд амьдын там байжээ. Харин түүний охин Michelle ээжийнхээ эрүүл мэндэд анхаарал тавьж, түүнийг эрүүл саруул болгохын тулд фитнесээр хичээллэхийг санал болгосон байна.
3 жилийн дараа MacDonald тэс ондоо хүн болжээ. Гэхдээ түүний хувьд өөрийнхөө төгс бие галбирыг эргүүлэн авахаас илүүтэй тухайн амьдарч буй цаг мөчөө хайрлахын ач тусыг мэдрэх нь түүний гол зорилго байсан юм.
Өнгөрсөн 4-р сард тэд өөрийнхөө өөрчлөлтийг харьцуулан харуулсан зургийг постолжээ. Зүүн талынх нь дасгал хийх гэж зовж зүдэрч буй нэгэн. Харин баруун талын зураг дээр 73 настай эмэгтэй хоёр толгойт булчингаа бахархалтайгаар бусдад харуулж байна.
Тэр хэлэхдээ:
“Би анх өөрийнхөө өөрчлөгдөх аяллаа эхлэх үедээ хувцас өмсөхийг үзэн яддаг байлаа. Би өмнөх шигээ өөртөө хайртай байхаа больсон учраас өөрөөрөө байхыг илүүд үздэг байв. Би нэгдүгээрт, надад гоё сайхан хувцас өмсөх бие хаа байхгүй, хоёрдугаарт, ямар ч сайхан хувцас надад таарч тохирохгүй, нэн ялангуяа миний насны хүнд – ийм л бодолтой байв.”
Тэр нэгэн хэвийн уйтгартай өнгөтэй хэлхгэр хувцас өмсдөг байсан ч, энэ нь түүнд таалагддаггүй байжээ. Тэгтэл охин нь ээжийгээ дагуулаад “Forever 21” дэлгүүрт очих нь тэр. 73 настай ээжийнх нь бие тэгтлээ өөрчлөгдөөгүй байсан ч, хичээл зүтгэлийнх нь үр шим гэлтэй түүний бодол санаа арай өөр болсон байв. Түүнд гоёмсог, дэгжин хувцас өмсөх эргээд таалагдаж эхэлжээ. Энэ бол түүний хичээл зүтгэлийн үр шим байсан юм.
“Би өөрийгөө үл ялиг бариу загвартай, өнгөлөг хувцас өмссөн байгаагаар харахад миний дотоод мэдрэмж эргээд сэргэх шиг л болсон. Өөрийгөө төгс нэгэн болох хүртлээ хүлээх шаардлагагүй юм билээ. Өөрийнхөө төгс төгөлдрийг одоо байгаагаар нь хүлээж авч, өнөөдрөө баяр хөөрөөр бялхуул. Өөрөө өөрийгөө хангалттай хайрлаж чадсан хүнд өөрчлөлт ирдэг гэдгийг би ойлгосон.”
Харин одоо MacDonald Инстаграм хаягаараа дамжуулан гэртээ хэрхэн дасгал хийж байгаагаа олон нийттэй хуваалцах болжээ – фитнест явалгүй гэрийн нөхцөлд эрүүл чийрэг болох боломжтойг бусдад харуулах нь түүний эрхэм зорилгуудын нэг.
Тэр “Insider” эх сурвалжид өгсөн ярилцлагынхаа үеэр хүн бүр, өндөр настан ч гэсэн үүнд багтана, хөл хорионы үеэр зүгээр суулгүй дасгал хөдөлгөөн хийх хэрэгтэй талаар хэлсэн байна.
“Хөдөлгөөн болон эрүүл хооллолтод насны хязгаар гэж үгүй. Хөдөлгөөний хомсдол, буруу хооллолтоос айх хэрэгтэй. Нэг л мэдэхэд хяналтаас гарчихдаг зүйлс. Гэхдээ өдөр тутам зөв дадал зуршлыг бий болгож, өөртөө анхаарал хандуулж чадвал, хяналтыг гартаа авч чадна.”
“Миний бодлоор аз жаргалтай байх, амьдралдаа сэтгэл хангалуун байх нэг үндэс бол сэтгэл зүрхээрээ залуу хэвээрээ байх юм. Мөрөөд, төсөөл, бас нээлттэй бай. Цаг хугацаа нэг мэдэхэд л харвасан сум шиг нисэж одно. Хэзээ аз жаргал ирэх бол гэж бүү хүлээ.”
Тэрээр “Insider” эх сурвалжид эрүүл амьдралын хэв маяг өөрт нь цагийг хэмнэхэд маш их тус хүргэсэн талаар дурджээ.
“Фитнесээр хичээллээд үр дүнд нь би цагийг үр бүтээлтэй төлөвлөж сурсан. Надад одоо ч гэсэн хийх зүйлс олон байна. Энэ бүхэнд фитнесийн үр шим намайг төвлөрөхөд тусалсан юм.”
Танд энэ 73 настай эмэгтэйн гайхалтай өөрчлөлт ямар мэдрэмж төрүүлсэн бэ? Та өөрчлөлтийг өөрийн амьдрал, бие организмдоо авчрахыг хүсэж байна уу?
Bayarmaa Byambaa
2020/08/13 at 22:20
Хамгийн хөгширдөггүй эрхтэн булчин.
Siilegmaa Badamjav
2020/08/14 at 15:28
Энэ ч үнэн үлгэр дууриалал шүү
У. А.р.к
2020/08/15 at 12:53
wooow
Lenna Baska
2020/08/15 at 17:41
iim nasand ehleed bulchingiin mass avah heregtei