Дэлхийн хамгийн халуун газрууд

Нийтлэгч: Лука

Огноо: 2013/08/07

Total2
2

Хүн төрөлхтний өлгий болсон эх Дэлхий маань үй олон сонин содон гайхамшгийн уурхай билээ. Үржил шимтэй, баян тансаг, үзэсгэлэн төгөлдөрөөс эхлээд өвс ургамал, ан амьтангүй, эзгүй зэлүүд, сүрдэж аймаар зүйл бүрийн дүр төрх Дэлхийд маань буй. Нэг газар нь хамрынхаа үзүүрийг ч цухуйлгамгүй хүйтэн байхад нөгөө газар нь сүүдэрт суухад ч сэрүүцэж чадахааргүй аагим халуун байх жишээтэй. Тэгвэл манай гаригийн хамгийн халуун газрууд ямар газрууд байдаг юм бол? Энэ тухай мэдэж, газарзүйн мэдлэгээ тэлэхийг хүсвэл та бүхэн мэдээллийн дэлгэрэнгүйд зочилж, нийтлэлийг маань анхааралтай уншаарай.

Этиоп, Даллол /Dallol/

Афарын хотгорт орших аагим халуун энэ хот жилийн дундаж температураараа Дэлхийн хамгийн халуун цэг хэмээгддэг. 1960-1966 онд Даллолт дундаж температур Цельсийн 34,4 градус байсан ба жилийн аль ч үед бараг өөрчлөгддөггүй байв. Одоо бол Даллол хот хаягдсан хот бөгөөд 1960-аад онд уурхайн суурин байсан байна. Галт уулын идэвхтэй бүсэд оршдог нь энэ газрын халууны нэг шалтгаан болдог ба дээрээс төөнөх нар бас нэг эх үүсвэр нь болдог аж. Дашрамд дурдахад зураг дээр харуулсан ус нь усан эмчилгээний гайхалтай үйлчилгээтэй юм.

Израйль, Тират Зви /Tirat Zvi/

Тират Зви бол шашны суурин. Далайн түвшнээс доош 220 метрт орших энэ суурин Йордан голын ойролцоо байрладаг учир зуны цагт үржил шимтэй байдаг ч энэхүү суурингийн оршдог Бейт Шеан хөндий нь бараг шатдаг гэхэд болно. 1942 оны 6-р сард Цельсийн 53,9 градусын халуунаар Азийн хамгийн өндөр температуртай суурин хэмээн бүртгэгдэж байжээ. Халуунаас зугтсан оршин суугчид нь рашаан ундаргатай усан сангуудад шумбадаг ба байшин бүр нь саравчтай.

Мали, Тимбукту /Timbuktu/

Баялаг бөгөөд сэтгэл хөдлөм түүхтэй Тимбукту хот эртний Сахарын худалдааны замын уулзварт оршдог учир Исламаас эхлээд Африк даяар алдартай шинжлэх ухааны цэцэглэн хөгжсөн төв байжээ. Эртний гар бичмэлийн гайхамшигтай цуглуулгатай, тогтмол хүн амтай энэ хотын гол асуудал нь цөлжилт бөгөөд салхиар үлээгдсэн ирсэн элсэн ширхгүүдэд дарагдах гудамжууд, элсэн манхнууд байдаг байна. Энэ газарт халуун улам өссөөр байгаа ба голдуу Цельсийн 55 градусаас дээш халуунтай байдаг аж. Хотын тухай нэг сайн мэдээ байгаа нь хотоос ердөө 24 км-ийн зайд байрлах Нигер голоос усны нөөцөө авдаг явдал юм.

Тунис, Кебили /Kebili/

Тунисын төвд сонин гэмээр тохиолдлоор Кебилигийн баянбүрд оршдог бөгөөд энд хүмүүс Хойд Африкын халуунаас зугтан толгой хоргоддог. Дал модод, хүйтэн цэнгэг ус энд бий ч халуун гэдэг зүйл энд харийн зүйл биш. Цельсийн 55 градус хүртэл халах нь ердийн зүйл. Хэдийгээр аагим халуун хэцүү зүйл ч баянбүрдийн үзэсгэлэн хүмүүсийг татдаг. Кебилид 200,000 жилийн тэртээгээс хүмүүс амьдарч ирсэн.

Араб, Руб-эль-Хали /Rub-Al-Khali/

Дэлхийн хамгийн том үргэлжилсэн элсэн цөл болох Руб-эль-Хали нь Арабын хойгийн бараг гуравны нэгийг эзлэн орших ба Саудын Араб, Оман, Йемень, АНЭУ зэрэг улсуудын газар нутгийг хамардаг. Халуун, хуурай энэ газарт агаарын температур Цельсийн 56 градуст хүрдэг бөгөөд жилд бараг 3-хан сантиметр хур тунадаг унадаг.

Ливи, Эль-Азизия /Al-Azizia/

1922 оны 9-р сарын 13-нд Эль-Азизия хотод Дэлхийн хамгийн халуун мөч тохиосон нь Цельсийн температур +58 градуст хүрсэн байна. Энэ хотод термометр Цельсийн +48,9 градусыг тогтмол заадаг.

АНУ, Үхлийн хөндий /Death Valley/

Калифорний Можавын цөлд орших Үхлийн хөндий Умард Америкийн хамгийн нам дор цэг бөгөөд халуун, хуурай уур амьсгалтай. Энэ газрын хамгийн өндөр цэгт аргаль угалз амьдардаг бол шөнийн цагт улбар шар шилүүс, үнэг болон мэрэгчид гарч ирдэг. Ид шидийн өлгий нутаг гэж хэлж болох энэ хөндийн чулуунууд мөр татуулан өөрсдөө хөдлөн явдаг гэвэл та итгэх үү? Энэ газарт бороо орох үед ургамал нь цэцэглэж, хөндийн ёроол гайхалтай үзэсгэлэнтэй харагддаг байна.

Хятад, Файер Маунтин /Fire Mountain/

Улаан элсэн чулуун арзгар барсгар хормой, гайхмаар гуу жалга нь гал дөлийг санагдуулам энэ газрын нэр уулын хэлбэр дүрс, өнгөнөөс бус аагим халуунаас үүдэлтэй. Хамгийн халуундаа Цельсийн 66 градус хүрч байсан нь 2008 онд хамгийн халуун үе хэмээгдэн бүртгэгдсэн.

Австрали, Бедлендс /Badlands/

Австрали бол Дэлхийн хамгийн хуурай хүн оршин суудаг тив бөгөөд тус тивийн газар нутгийн ихэнх хэсгийг өргөн уудам цөл эзэлдэг. Ган гачгийн цагтаа тэнгэрт нь нарыг хаах бөртийх ч үүл үл үзэгдэх энэ газарт 2003 онд Цельсийн 69,3 градус хүрч байжээ.

Иран, Дашт-и-Лут /Dasht-i-Lut/

Энэ бол Дэлхийн хамгийн халуун газар. Хатаж хуурайшсан энэ эзгүй газарт энэ газрын температурыг хэмжихээр тэнд ажиллана гэдэг аймшигтай зүйл. НАСА-гийн хиймэл дагуул энэ газрын температурыг хэмжсэн ба 2005 онд энэ газарт Цельсийн 70,7 градус хүрч байсан нь Дэлхийн хамгийн өндөр үзүүлэлт хэмээгдэн албан ёсоор батлагддаг байна.