Интернэтийг 4G-ээс 1000 дахин хурдан болгох шинэ технологи

Нийтлэгч: Лука

Огноо: 2014/03/15

Total0
0

Бидний гар утсанд интернэтийн сүлжээнд орох боломжийг олгодог утасгүй интернэтийн сүлжээ нь хэдийгээр байнга сайжирсаар байгаа ч илүү өндөр хурд, хүрээг хүмүүс хүссээр байна. Энэ талбарт оюун ухаанаа уралдуулдаг авьяаслаг инженерүүдийн ачаар үүрэн телефоны сүлжээнд мөнхийн өөрчлөлт хийгдэх болжээ.

2011 онд Steve Perlman-ы үүсгэн байгуулсан Artemis компани нь pCell хэмээн нэрлэсэн шинэ утасгүй стандартыг бий болгосон нь өнөөгийн 4G-г давж гарахуйц хурдан юм байна.

Энэ чинь юу юм бэ?

Маш энгийнээр хэлбэл pCell /personal cell/ нь үүрэн телефоны цамхгийн жижигрүүлсэн хэлбэр аж. Одоогийн үүрэн телефоны цамхгуудыг аварга том шүхэрний оройтой зүйрлэж болно. Байрлаж байгаа газартаа бөмбөлөг хэлбэрийн хүлээн авалт үүсгэх энэ цамхгаас холдох тусам хүлээн авалт сулардаг. pCell-ийн хувьд огт өөр арга хэрэглэжээ. Чухал газруудад том цамхаг байрлуулахын оронд олон тооны хайрцагнуудыг байрлуулах аж. pWaves хэмээн нэрлэгдсэн рөүтерийн хэмжээний энэ хайрцагнууд нь том хэсгүүдэд дундаж хэмжээгээр үйлчлэхийн оронд жижиг газруудад сайн үйлчлэх юм байна. Өөр бас нэг зүйл нь pCell-ийн гүйцэтгэл радио долгионы нэмэгдэлтээр сайжирна. Энэ нь хэрвээ үргэлж дөрвөн шонтой байгаад байвал 4G-ээс 1000 дахин хурдан хурдыг ашиглах боломжтой гэсэн үг юм.

4G-ээс яаж илүү байх вэ?

Шалтгаан нь маш энгийн. Илүү хүчтэй сигнал, илүү хурдан мөн бусад үр ашигтай талууд. pWave радио нь мэдээллийг дамжуулахын тулд ердөө 1 милливатт дамжуулагчийг ашигладаг бол Wi-Fi нь 250 милливатаас багагүйг ашигладаг. Түүнээс гадна эдийн засгийн хувьд бага хөрөнгө шаардана.

Шинэ төхөөрөмжийг худалдаж авах боломж бий юу?

Хамгийн богино хариулт бол үгүй. Өнөөгийн төхөөрөмжүүд мэдээлэл дамжуулахын тулд pCell сүлжээг хялбархан ашиглах боломжтой. Гэсэн ч ирээдүйд бид pCellNative хэмээх төхөөрөмжийг ашиглах ба энэ нь pCell-ийн бага эрчим хүч ашиглах шаардлагыг хангасан, батерей бага ашигласан, илүү сайжирсан гүйцэтгэлтэй байх аж.

Шинэ технологи бодит амьдралд нэвтрэхэд хэр хэмжээний хугацаа шаардлагатай вэ?

Сан Францискод 2014 оны дөрөв дэх хагаст эхний хэрэглэгчиддээ хүрнэ гэж үзэж байгаа. Artemis хотын 350 байшингийн орой дээр төхөөрөмжийг байршуулахаар ажиллаж байгаа юм байна. Үүний дараа ирэх жилийн турш pCell-ийн байршуулалтын ажил эхлэх бөгөөд 2015 оны сүүл гэхэд бүх томоохон худалдааны цэгүүдэд технологи боломжтой болох аж.