Нүүр арчлах бүтээгдэхүүнд натурал хүнс илүү ихээр ашиглах болжээ. Эмээ нарын минь нүүрээ арчилдаг байсан арга эргэн ирж, өнөөдрийн бүсгүйчүүд химийн орцтой арьс арчилгааны бүтээгдэхүүнээс зайлсхийх болжээ.
Дараах хүнсний бүтээгдэхүүнээр нүүрээ тогтмол арчилсан тохиолдолд таны нүүр царай фотошопоор янзалснаас ч гоё харагдах болно.
Улаан лооль
Зүсэм улаан лооль таны ядарч гандсан нүүрний арьсыг сэргээнэ.
Долоо хоногт нэг удаа 20 минут нүүрэндээ маск тавихад таны арьс чийглэг, залуу, зөөлөн болно. Үрэвссэн арьсны хэсгийг өдөр болгон улаан лоолийн шүүсээр арчина. Мөн улаан лоолийн зөөлөн эд, оливийн тостой маск тавьж болно.
Төмс
Залуу арьсны эх үүсвэр бол төмс. Жижиг үрчлээг арилгаж арьсыг толийлгоно.
Түүхий төмсний нухаш эсвэл шүүсээр өдөр болгон 15 минут маск тавьж болно. Нүүрний арьсаа илүү уян хатан байлгахыг хүсвэл нимбэгийн шүүстэй холиорой.
Нимбэг
Нимбэг – цайруулах, пигментийн толбо арилгах, батга арилгах үйлчилгээтэй. Нүүрний арьсыг толигор болгож, өнгийг эрүүлжүүлнэ.
Шүүсийг нь тоник байдлаар өдөр болгон хэрэглэж болно.
Зуун наст
Шүүс эсвэл нухашийг өдөр болгон нүүрэндээ түрхвэл нүүрний арьс өнгөлөг болж гэрэлтэнэ. Нүүрэн дэх жижиг сорви, батга зэргийг арилгахаас гадна түлэнхийг ч эмчлэх увдистай.
Зуун настын шүүсээр өдөр болгон лосьон байдлаар нүүрээ арчиж болно, нухашаар нь өдөр болгон 10 минут маск тавина.
Өргөст хэмх
Өргөст хэмхийн маск – батганы эсрэг шилдэг хэрэгсэл. Арьсны залуу байдлыг хадгална.
Өргөст хэмхээ нимгэн хэрчээд 15 минут нүүрэндээ маск тавина. Долоо хоногт хэд хэдэн удаа тавьж болно.
Хүнсний сод
Арьсыг цэвэрлэнэ, арьсны эд эсийг нөхөх процессийг хурдасгана. Цэврээр нь түрхэж болохгүй.
Сод, оливийн тосыг адил хэмжээтэй холиод долоо хоногт нэг удаа скраб байдлаар түрхэнэ. Мөн 1 ц.х сод, 1 ц.х таргаар маск бэлдээд 10 минут нүүрэндээ тавина.
Зөгийн бал
Чийгшүүлэх ид шидтэй: мөн нүүрний арьсыг залуужуулж, арьсны эд эсийг хурдан сэргээнэ. Байнгын хэрэглээгээр нүүрний арьсны гүн үрчлээнээс салах боломжтой. Зөгийн бал харшилтай хүмүүст тохирохгүйг анхаарна уу.
Зөгийн балаа цэврээр нь нүүр, хүзүүндээ түрхээд 20 минутын дараа угааж цэвэрлэнэ. Залуужуулах маск байдлаар хэрэглэх бол зөгийн бал, цинамоныг адил хэмжээгээр хийгээд түрхэнэ.
Кокосын тос
Цэвэршүүлээгүй кокосын тос нүүрний арьсыг чийгшүүлэх, гуужуулах ба тэжээл өгнө. Экспресс байдлаар ашиглах боломжтой, үр дүн нь ч гайхамшигтай.
Нүүрэндээ маш нимгэн түрхээд 5 минутын дараа цаасаар арчиж авна.
Оливийн тос
Харшил үүсгэхгүй. Нэг дуслаар ч болов арьсаа арчилж болно: арьсыг чийгшүүлж, толигор, зөөлхөн болгоно.
Тоникийн оронд өглөө оройдоо хэдэн дусал оливийн тосоор нүүрээ арчаарай. Мөн өдөр тутам нүүрэндээ түрхдэг маск хийхдээ уг тосноос дусааж болно.
Витамин Е
Эмийн санд зарагддаг тосон витамин Е–г зөвхөн уугаад зогсохгүй мөн нүүрнийхээ арьсыг арчлахад ч хэрэглэж болно. Арьсны өнгийг сэргээж, үрчлээг багасгана.
Мөн өөрөө маск хийж байгаа бол орцонд нь нэмж болохоос гадна өөрийн түрхдэг өдрийн тосондоо нэмээд нүүрээ тослох, уруулаа арчлах байдлаар хэрэглэж болно.
Нохойн хошууны тос
Залуу байх нууц жор гэж хэлдэг бөгөөд байнгын хэрэглээгээр бага зэргийн үрчлээ, нүдний доорх уут зэргийг арилгана.
Нохойн хошууны тосоор өдөр болгон нүүрээ тоник болгон арчаарай. Мөн маск тавих, өөр бусад нүүрний тосондоо цөөн хэдэн дусал дусааж хэрэглэж болно.
Элсэн чихэр
Цэвэр скраб. Зөөлрүүлж, тэжээл өгнө. Үхэжсэн эд эсийг гуужуулж нүүрний арьсыг зөөлрүүлнэ.
Нүүрээ чийглээд элсэн чихрийг скраб байдлаар өдөр болгон угаасан ч болно.