Тахианы махаар амттай хоол хийх 10 жор

Орой ямар хоол хийх вэ? гэдэг бодол магадгүй бүх л эзэгтэй нарын толгойд төрдөг биз ээ. Тахианы махтай хоол амттай ч гэлээ яг ямар хоол хийхээ мэдэхгүй байна уу. Та дараах жоруудыг ашиглан орон орны хоолыг гэртээ хийж идэх боломжтой юм.

Мексикийн халуун ногоотой тахианы махан салат

Орц:

• 4 жижиг тахианы цээж мах
• 1/2 хүрэн байцаа
• 1 чинжүү
• 10 мини помидор
• 1/2 лимон
• Яншуй
• 4 хоолны халбага оливын тос
• 1/2 цайны халбага элсэн чихэр (бор байвал сайн)
• Йогурт
• Амтлагч: хар перец, паприка, давс, гоньд
• Нимгэн гамбир

Бэлтгэх арга:

1. Тахианы цул махаа оливын тосоор тослоод амтлагч болон элсэн чихэр асгана. Багадаа 30 минут хөргөгчинд хийгээд (хонуулбал сайн) царцаана.
2. Тахиагаа дөрвөлжилж хэрчээд зөөлөн гал дээр оливийн тостой шарна. Дээрээс нь тал лимоны шүүснээс нэмээрэй.
3. Байцаа болон ногоогоо жижиглээд, чинжүүгээ дөрвөлжилж хэрчинэ. Дараа нь байцаа, чинжүүгээ мини помидор болон тахиатайгаа холиод таваг эсвэл нимгэн гамбиран дээр тавиарай. Йогуртаар амталж болно.

Энэтхэгийн тахиа, авокадотой салат

Орц:

• 500 гр тахианы цээж мах
• 1/2 цэцэгт байцаа
• 2 ширхэг авакадо
• 250 гр шарсан талх
• 1/2 улаан сонгино
• 1 хоолны халбага ургамлын тос
• 3 цайны халбага гоньд
• 1/2 хоолны халбага лимоны шүүс

Бэлтгэх арга:

1. Ургамлын тосоо том хайруулын тавган дээр зөөлөн галаар халаана. Тахиагаа жижиглэж зүсээд гоньд нэмж шаргал өнгийн болтол хуурна. Дараа нь таваглаарай.
2. Том хэрчсэн цэцэгт байцаа, дөрвөлжилсөн авокадо, жижиглэсэн шарсан талх, жижиглэж хэрчсэн сонгино, тахиагаа хооронд нь холино. Лимоны шүүсээр амтлаарай.

Хан боргоцой, эрдэнэ шиштэй тахианы махан салат

Орц:

• 300 гр тахианы цул мах
• 2 өндөг
• 1 лаазалсан эрдэнэ шиш
• 380 гр лаазалсан хан боргоцой
• 2 шинэхэн өргөст хэмх
• майонез

Бэлтгэх арга:

1. Тахианы цул махаа чанаад жижиг шоо дөрвөлжин хэрчинэ. Өргөст хэмхээ нарийн савхан, хан боргоцойгоо дөрвөлжин хэрчээрэй. Өндгөө чанаад жижиглэж хэрчинэ.
2. Бүх орцыг тахиа, хан боргоцой, өргөст хэмх гэх мэтээр үелүүлж тавиад үе хооронд майонез түрхэнэ.
3. Салатаа 15-20 минут байлгаснаар амт нь хоорондоо уусна.
4. Дээр нь эрдэнэ шиш болон жижиглэсэн өндгөө тавиарай.

Гүржийн Чихиртма тахианы шөл

Орц:

• 1 том тахиа
• 250 гр сонгино
• 5 өндөгний шар
• 50 мл виноны уксус
• 100 гр хайлуулсан масло
• Давс, лаврын навч, бөөрөнхий хар перец
• Шөлөндөө хүссэн хэмжээгээрээ төмс, ногоо бэлтгэнэ

Бэлтгэх арга:

1. Тахиагаа дундуур нь хуваагаад шөл гаргана. Хагас цагийн дараа, бэлэн болохын өмнө том хэрчсэн төмс ногоогоо хийнэ.
2. Болсон тахиагаа шөлнөөсөө гаргаад жижиглэж хэрчинэ. Жижиглэн хэрчсэн сонгиноо халаасан тосон дээрээ шараад, шөлөндөө сонгино, тахиагаа хийж 5 -10 минут буцалгана.
3. Өндөгний шараа давс уксустай холиод хөөсөртөл нь хутгана. Өндгөн дээрээ 3-4 шанага шөл бага багаар хийж холиод шөлөө гал дээрээс авч өндөгний хольцоо дээрээс нь нэмээд сайтар хутгана.

Шаржигнуур тахиа

Орц:

• 500 гр тахианы цул мах
• 1 өндөгний цагаан
• 1,5 стакан эрдэнэ шишийн нэвс
• 50 гр хатуу бяслаг
• Перец, давс, паприка, амтлагч

Бэлтгэх арга:

1. Шарах шүүгээг 200 градус хүртэл халаана. Жижиг тавган дээр өндөгний цагааныг холиод сэрээгээр задалж хутгана. Өөр тавганд эрдэнэ шишийн нэвс, жижиглэж үрсэн бяслаг, амтлагч, давс, перец хийж холино.
2. Тахианы цул махыг нарийн хавтгай хэрчээд, өндгөндөө дүрж эрдэнэ шишийн нэвсээр бүрнэ.
3. Тахианы махаа листэн дээр тавиад шарах шүүгээнд 15-20 минут шарна.

Тахианы махтай ороомгон боов

Орц:

• 2 тахианы цээж мах
• 1/2 сонгино
• 350 гр давхраат зуурмаг
• Яншуй
• Бага зэрэг гурил
• 1 тахианы өндөг
• Давс, перец

Бэлтгэх арга:

1. Шарах шүүгээг 200 градус хүртэл халаана. Сонгиноо нарийн цагираг хэлбэртэй, яншуйгаа жижиглэн хэрчээд, өндгөө задалж хутгана. Блендерт тахиагаа жижиглээд сонгино яншуйтайгаа хольж давс, перецээр амтлаарай.
2. Зуурмагаа 2 тэнцүү эгнээ нарийхан хуваана. Тахианы хольцоо хуваагаад 2 зуурмаг дээрээ тэнцүү тавина. Зуурмагаа рулет шиг ороохдоо зуурмагны нэг үзүүр дээр өндөг түрхэж наалдуулна.
3. Ороомогныхоо дээр өндгөө түрхэнэ, ингэснээр алтлаг гадаргуутай болно. Ороомгоо жижиг зүсээд 20 минут шарна.

Тахианы мах, зайдастай шпагетти

Орц:

• 350 гр тахианы гуя
• 200 гр хиам
• 350 гр шпагетти гоймон
• 2 сонгино
• 3 хумс сармис
• томатны паста
• Үрсэн бяслаг
• 2 лаврын навч
• Давс, перец, орегано

Бэлтгэх арга:

1. Тахиа, хиамаа зүсээд давс, перецээр амтлаарай. Оливын тосоо хайруулын тавган дээр хүчтэй галаар халаана. Тахиа, химаа 5 минут шараад таваглаж тавина.
2. Сонгино, сармис, лаврын навч, томатны пастаа хайруулын тавган дээр хийнэ. Галаа багасгаж сонгиноо зөөлөн болтол 6-8 минут шарж болгоно. Хэрэв сонгино түлэгдээд ирвэл бага зэрэг ус нэмнэ.
3. Чанасан гоймонгоо сонгинотой хольцон дээр холиод шаргал өнгийн болтол 6 минут шарна. Дараа нь пастанаас дээш нэг см орчим ус нэмнэ.
4. Зөөлөн гал дээр соусаа өтгөртөл 10 минут хутгана. Давс, перецээр амтлаад идэхийнхээ өмнө дээр нь үрсэн бяслаг цацаарай.

Тахианы мах, ногоотой пүнтүүзтэй хуурга

Орц:

• 500 гр тахианы цул мах
• 200 гр пүнтүүз
• 400 гр ногоон вандуй
• 2 сонгино
• 1 лууван
• 1 чинжүү
• 1 хумс сонгино
• 50 мл цуу
• 50 мл будааны уксус
• Давс, перец

Бэлтгэх арга:

1. Цул махаа нимгэн хавтгай хэрчээд ширүүн галан дээр шарж амтлагчуудаа нэмнэ. Тахиан дээрээ цагираглан хэрчсэн сонгиноо нэмээд цугт нь шарна.
2. Пүнтүүзээ зааврын дагуу болгоод 5-7 минут халуун усанд байлгаад, дараа нь хүйтэн усанд хийнэ.
3. Чинжүүгээ савхан хэрчинэ. Луувангаа том үрэгчээр үрнэ. Ногоон вандуйгаа чанана. Дараа нь ногоон вандуй, лууван, чинжүүгээ болтол нь шараад амтлагч болон жижиглэсэн сармисаа нэмнэ.
4. Бэлэн болсон тахиагаа сонгино, пүнтүүз, ногоотойгоо холино. Будааны уксус болон цуугаар амталж болно. Энэхүү хоолыг халуун, хүйтэн байдлаар идэж болно.

Цагаан гаа, зөгийн балаар амталсан шарсан тахиа

Орц:

• 1 кг тахианы гуя
• 3 хумс сармис
• 60 мл цуу
• 1 хоолны халбга үрсэн цагаан гаа
• 2 цайны халбага зөгийн бал
• 1 сонгино
• 1 гүнждийн үртэй шарсан ногоон согино

Бэлтгэх арга:

1. Хэрчсэн тахианы цээж махаа түгжээтэй уутанд хийгээд дээрээс нь цуу, сармис, цагаан гаа, зөгийн бал нэмнэ. Сайтар холиод хөргөгчинд 4 цаг царцаана.
2. Грилиэ халаана. Тахиагаа ойролцоогоор 3 минут 2 талаар нь бэлэн болтол нь шарна. Бэлэн болсон тахиагаа 5 минут амраана.
3. Сонгиноо гриль дээр 1 минут шарна.
4. Сонгиноо тахиатайгаа холиод гүнждийн үр болон ногоон сонгиноор чимэглээрэй.

Тахианы махтай ризотто

Орц:

• Том тахианы тал мах
• 500 гр төрөл бүрийн хөлдөөсөн ногоо
• 400 гр будаа
• 1 сонгино
• 150 гр бяслаг
• 2 хоолны халбага оливын тос
• 125 мл цөцгий

Бэлтгэх арга:

1. Тахианаасаа шөл гаргаж тахиагаа хэрчнэ.
2. Өндөр туургатай хайруулын тавганд оливын тосоо халаана.
3. Будаагаа шөлний тал хүртэл хэмжээтэй хийж хөлдөөсөн ногоогоо нэмнэ. Тагийг нь тавиад галыг багасгаж будаагаа болгоно. Шаардлагатай бол шөлийг нь нэмээрэй.
4. Шөлийг нь ширгээгээд будаан дээрээ жижиглэн үрсэн бяслаг, цөцгий, чанасан тахиагаа нэмнэ.
5. Хайруулын тавгаа гал дээрээс аваад 10 минут амраагаарай.
6. Тахианы махтай ризоттог халуунаар нь идвэл тохиромжтой.

50

Бахархмаар

23

Тэнэглэл

22

Гоё

15

Буруу

14

Харамсалтай

11

Гайхмаар

9

Ха Ха

9

Хөөрхөн

Баярлалаа!