Тэнгэрт мандах нарантай уралдан сүүн цацлаа тэнгэртээ өргөдөг Монгол түмний минь шинэ өглөө наадмын баясалтай ийнхүү эхэллээ. Хээр талдаа морин хуурын эгшиг гийнгоон дуутай хоршин, зүлэг ногоон дэвжээндээ хүчит бөхчүүд эрийн хийморийг гайхуулан дэвэх Монгол наадам минь биднийг угтан золголоо. Мэргэн сум нь байгаа оноход уухайн дуу цангинан, харавсан шагай нь хасаандаа тусахад хурсан олон түрнэ.
Тулгар төр байгуулагдсаны 2222 жил, Их Монгол Улсын 807 жил, Ардын хувьсгалын 92 жилийн ойн баяр наадмаа тэмдэглэж буй хотол олон та бүхэндээ баярын мэнд хүргэе.