Цаг хугацааны хатуу хуулинд хорвоогийн бүхий л зүйл захирагдах нь жам ёсны зүйл. Гэхдээ цаг хугацаанаас илүүтэй бүхнийг сайнаас нь муу руу, муугаас нь сайн руу хувирган өөрчилж байгаа нэг зүйл бол та бидний хийж байгаа зүйл буюу хүн төрөлхтний үйлдэл юм. 200,000 жилийн тэртээ орчин үеийн хүн үүсэн бий болсон цагаас хойш өнөөг хүртэлх хугацаанд хүний гараар бүтээгдэж бас сүйдэн үгүй болсон олон зүйл байгаа ба хүн төрөлхтөний бий болгосон хамгийн том зүйлсийн нэг нь техник технологийн асар хурдтай бөгөөд өндөр хөгжилтэй ертөнц билээ. Анх Африк тивд үүсэн бий болж, дараа нь бусад тивүүд рүү нүүн тархаж, өдгөө тооны хувьд 7 тэрбум даваад байгаа хүн төрөлхтөн сүүлийн 30 жилийн хугацаанд буюу 1984-өөс 2012 оныг хүртэлх хугацаанд Дэлхий ертөнцийг хэрхэн өөрчилснийг та бүхэнд харуулахыг хүслээ. Дараах зургуудыг үзэх боломжийг Гүүгл /Google/ болон Тайм /Time/ сэтгүүлийн хамтарсан шинэ төсөл олгож байгаа ба тус төслийн ажилд АНУ-ын газарзүйн байр зүйн алба, НАСА хамтарчээ. Энэхүү өөрчлөлт нь тийм ч сайн үр дагаврыг харуулсан зүйл биш гэдгийг энд дурдахын хамт өнөөгийн хүний нийгмийн үйл бүхэн нь бараг бүгд байгаль Дэлхийд хор хөнөөлтэй байгааг хэлэхгүй өнгөрөх аргагүй юм. Хүн амын өсөлт, түүнтэй дагалдан бий болох хоол хүнс болоод хувцас, бусад хэрэглээний өсөлт энэ бүхэн Дэлхийн дулааралд онцгой их хэмжээгээр нөлөөлж, тэр хэрээр байгаль экологийн тэнцвэрт байдал алдагдаж байна. Ой мод их хэмжээгээр сүйдэж, газар нутгийн хомсдол үүсэж, гол мөрөн, нуур ширгэж, ан амьтад ховордон үгүй болж, Умард болон Өмнөд туйлын мөс хайлж байна.