Нисэх онгоцон дээрх уран зөгнөлт киноны сурталчилгаа

Английн зохиолч Жон Рональд Руэл Толкин /John Ronald Reuel Tolkien/-ы алдарт зохиолоос сэдэвлэн бүтээгдсэн гурван хэсэг бүхий кино цувралын хоёр дахь хэсэг “Хоббит: Смогийн сүйрэл” /The Hobbit: The Desolation of Smaug/ нэртэйгээр энэ сард нээлтээ хийж эхэлсэн. Шинэ Зеландын кино найруулагч Питер Жексон /Peter Jаckson/-ы бүтээл энэ киноны Шинэ Зеланд дахь нээлт 2013 оны 12-р сарын 12-нд болох бөгөөд киноны сурталчилгаанд Шинэ Зеландын агаарын тээврийн нисэх онгоц ашиглагдаж байгаа ажээ. Боинг 777-300 /Boeing 777-300/ маркын нисэх онгоцны их биеийн хоёр талыг Смог /Smaug/ лууны 54 метр урт хэмжээтэй аварга том зургаар чимсэн байна. Энэхүү аварга том хуулган наалтыг Шинэ Зеландын Вета Дижитал /Weta Digital/ дижитал визуал эффектийн компани бүтээжээ.