АНУ-д -62 хэм хүртэл хүйтэрнэ

Шинэ жилийн баяраас хойш АНУ-д асар их цас унаж, сүүлийн жилүүдэд байгаагүйгээр хүйтэрч байна. Вашингтонд энэ 1-р сард сүүлийн 20 жилд тохиогоогүй хүйтэн өвөл болж байгаа тухай мэдээлэгдэж байгаагийн дээр эмнэлгүүдэд олон арван хүмүүс ноцтой хөлдөлттэй гэсэн адилхан оноштойгоор эмчлүүлж байгаа гэнэ. Ирэх өдрүүдэд Америкийн хэд хэдэн мужуудад ер бусын хүйтэн үргэлжилсээр байх ба цаг уурчид арктикын хүйтэн фронтын улмаас зарим газруудад шөнөдөө – 62 хэм хүртэл хүйтэрнэ хэмээн анхааруулж байгаа аж. Канад, Америкийн Арктикийн бүсэд байдаг газар нутгуудад хүйтэн цаг уур ноёлж, агаарын хэм дээд хэмжээндээ хүртэл буурчихаад байгаа юм. Их хэмжээний цасны улмаас 16 хүн нас барсны олонх нь үзэгдэх орчны хязгаарлагдмал байдлаас үүдэн зам тээврийн осолд орсон бол нэг Америк эмэгтэй машиндаа хөлдсөн тохиолдол гарчээ. Сүүлийн 20 жилд тохиогоогүй хүйтэн өвлийн шуурганд Умард Дакота, Висконсин, Айова, Миннесота зэрэг мужуудын оршин суугчид хамгийн их цохилт амсаад байгаа бөгөөд Миннесотад шөнөдөө -45 хэм хүртэл хүйтэрч байгаа учир нутгийн удирдлагууд муж даяар сургуулиудыг түр завсарлуулах тушаал гаргаад байгаа юм байна. Хотын эрх баригчид иргэдээ болж өгвөл гэрээсээ гарахгүй байхыг ятгахын зэрэгцээ боломжтой бол авто замын цасыг цэвэрлэхийг уриалжээ. Тус улсын хамгийн том нисэх буудлуудын нэг болох Чикагогийн нисэх онгоцны буудлын тал нислэг цуцлагдаж, Сент Луис орчмын зам цасанд ихээр хучигдсаны улмаас машин явах бараг боломжгүй болсон байна. Ер бусын хүйтэн өвөл АНУ-ын эдийн засагт шууд нөлөөлж, үр тарианы экспорт аюулд ороод байгаа ажээ. Улаан буудай, эрдэнэшиш, шар буурцгийн шош зэргийг тээвэрлэдэг гол болон усан сувгууд мөсөнд хаагдаад байгаа юм. Цаг уурчид долоо хоногийн дунд хүртэл онцгой хүйтэн үргэлжилнэ хэмээн анхааруулж байна.