Мотоциклийн хөдөлгүүрийн төрлүүд

Нийтлэгч: Лука

Огноо: 2015/09/18

Total87
87

Танд өнөө үед мотоциклуудын ашиглаж байгаа гол хөдөлгүүрүүдийн талаар хүргэе. Дараах мэдээлэл таны мэдлэгт хэрэг болно гэдэгт итгэлтэй байна.

Хамгийн энгийн нэг цилиндртэй хөдөлгүүр. Хамгийн хүчтэй, хамгийн өндөр эргэлттэй биш ч гэлээ дуу чимээ ихтэйгээс гадна хүчтэй чичирдэг хөдөлгүүр юм. Тиймээс ийм моторыг ихэвчлэн бартаат замын мотоциклд суурилуулдаг юм.

Жишээ нь, Yamaha YZ 250 F (зурган дээрх). Энэ мотоцикл нь жирийн зам дээр явахад зориулагдаагүй замын тусгай хэрэгсэл юм. Жирийн мотоцикл биш харин нэг төрлийн спортын тоног төхөөрөмж гэж хэлж болно. Энэ мотоциклын тав тухын талаар ярих ч хэрэг байхгүй биз ээ. Хамгийн гол нь спортын өндөр үр дүнг үзүүлэх болно. Харин үүний тулд мотоцикл хөнгөн, авсаархан хөдөлгүүртэй байх хэрэгтэй.

Хоёр цилиндртэй хөдөлгүүр. Энэ хөдөлгүүрийг ямар ч төрлийн мотоциклд олж харах боломжтой. Чичирхийлэл нь бага ч хүч нь илүү их байдаг. Ажлын эзэлхүүн нь 800 “куб” хүрч болох ба энэ нь бараг литрийн багтаамжтай гэсэн үг юм.

Жишээ нь BMW компаний аялал жуулчлалын мотоцикл – F 800 GS (ихэвчлэн “жижиг галуу” гэж нэрлэдэг). Энэ нь дээрх зурган дээрх шиг хоёр цилиндртэй хөдөлгүүртэй. Мөн энэ мотоцикл нь “ихэр дүү” гэх хотын скутертэй, тэр ч мөн адил хөдөлгүүрээр тоноглогдсон байдаг.

Гурван цилиндртэй хөдөлгүүр. Өмнөх хөдөлгүүрүүд 1 эгнээнд байсныг анхаарна уу. Тийм учраас ийм хөдөлгүүриийг “эгнээт” гэж нэрлэдэг байна.

Өмнө нь гурван цилиндртэй хөдөлгүүрийг нилээн сонин гэж үздэг байсан ч одоо энэ нь улам бүр түгээмэл хэрэглэгддэг болж байна. Юуны өмнө жижиг хэмжээний нэгжтэйгээр зогсохгүй хүч чадал болон ажлын эзэлхүүн ихтэйгээрээ давуу талтай.

Зурган дээрх Yamaha FZ-09 нь өнгөрсөн жилийн загвар юм. Түүний гурван цилиндртэй хөдөлгүүр нь 850 куб багтаамжтай, 100 морины хүчин чадалтай.

Харин хамгийн хурдан, хамгийн хүчирхэг спорт моторт дугуйнуудын хувьд тэд дөрвөн цилиндртэй хөдөлгүүрийг ашиглаж байна. Энэ хөдөлгүүрийн ажиллах багтаамж нь литр гаруй байдаг бөгөөд 200 морины хүчин чадалтай тэнцдэг.

Домогт Yamaha R1 – “суперспорт” ангийн хамгийн хурдан, хамгийн хүчтэй мотоцикл. Дөрвөн цилиндртэй хөдөлгүүр, 1 литрийн багтаамж, 180 морины хүчин чадалтай.

Зургаан эгнээ цилиндртэй хөдөлгүүр. Ийм хөдөлгүүрийн онцлог нь бараг машинтай адил: 1600 куб.см эзэлхүүн, 160 морины хүчин чадалтай. Мэдээж ийм үзүүлэлттэй эдийг ямар нэг том мотоциклд суурилуулдаг гэдэг нь ойлгомжтой.

Жишээ нь, BMW K 1600 GT – хол замд явах зориулалттай аялалын том мотоцикл. Зургаан цилиндртэй хөдөлгүүрийн зорилго нь маш бага дуу чимээ, чичиргээ багатай, өндөр эргэлттэй байхад чиглэжээ. Ямар ч инженер зургаан эгнээт хөдөлгүүрийг тэнцвэр сайтайгаар нь мэднэ.

Үүнээс цааш “эгнээт” хөдөлгүүр гэж байхгүй учир хамгийн ховор, сонирхолтой хөдөлгүүрүүдийг хүргэе. Дараах зурган дээр BMW компаний брэнд хөдөлгүүр байна.

Ийм хөдөлгүүрээр өмнө нь Баварчууд алдартай болж байжээ. Цилиндр нь зэрэгцээ байрлах ба мотоциклийнхоо 2 талд байрлана. Бүлүүр нь боксчны бээлий шиг өөр өөр тийш харна. Тиймээс эдгээр моторыг ихэвчлэн “Боксчин” гэж нэрлэдэг. Энэ хөдөлгүүрийн давуу тал нь өндөр хүчин чадал юм. BMW ийм хөдөлгүүртэй анхны мотоциклийг дайны өмнө үйлдвэрлэж байжээ.

Ийм хөдөлгүүртэй хамгийн алдартай мотоцикл бол BMW R 1200 GS юм. Та үүгээр хотын зам, бартаат замаар давхиж, бүр дэлхийг ч тойрох боломжтой.

Хэрэв BMW-гийн оппозитын цилиндрийг бага зэрэг дээш “өргөвөл” V-маягийн хоёр цилиндртэй хөдөлгүүр болох болно.

Том том компаниудаас өнөөдөр зөвхөн Италийн Moto Guzzi компани л ашиглаж байгаа. Хөдөлгүүрийн өргөн нь мотоциклийн хувьд маш чухал зүйл юм. Гэвч өөрийн зуршлаасаа болж халуун хөдөлгүүрт хөлөө түлэх нь амархан байдаг!

Moto Guzzi-гийн хөдөлгүүрийг аваад дугуй руу нь эргүүлээд, дараа нь цилиндрийг нь ойртуулж тэдгээрийн хоорондын өнцгийг багасгаж байна гэж төсөөлөөд үз дээ… Ингэж V-Twin хөдөлгүүр бий болно. Энэ хөдөлгүүрийг S&S компани үйлдвэрлэдэг.

Энэ төрлийн хоёр цилиндртэй V-хэлбэрт хөдөлгүүрээр Harley Davidson-ы бараг бүх загварууд тоноглогдсон байдаг. Зурган дээрх мотоцикл бол Harley-Davidson Fat Boy юм. Түүний хөдөлгүүр 1.6 литрийн багтаамжтай ба ердөө 80-85 морины хүчин чадалтай.

V-Twin хөдөлгүүрийг аваад цилиндрийг нь бага зэрэг хажуу тийш болгоод урагш нугалъя. Ингээд L хэлбэрийн хөдөлгүүр гэж нэрлэдэг Италийн Ducati мотоциклийн хөдөлгүүр бий болно.

Дээрх зурган дээр харуулсан хөдөлгүүр нь Ducati 899 Panigale супербайканд суурилуулдаг. Түүний хөдөлгүүр нь 898 куб. см. багтаамжтай ба 150 морины хүчин чадалтай. Хөдөлгүүр нь хуванцрын цаанаас харагдахгүй байгаа учир Ducati-гийн өөр нэг мотоциклийг үзүүлье:

Энэ бол Ducati Monster 821.

Инженерүүдийн зохион бүтээх зүйлс дуусна гэж байхгүй шүү. Жишээ нь тэд жирийн V-хэлбэрт хөдөлгүүрийг, тодруулбал хоёрыг аваад зэрэгцүүлэн тавиад нэг болгон өөрчилсөн байна. Аймар харагдаж байна уу?

Энэ бол 4 цилиндртэй Yamaha V-Max. Эзэлхүүн нь 1700 “куб”, 200 морины хүчин чадалтай тэнцдэг.

Эцэст нь зөвхөн нэг үйлдвэрлэгчийн ашигладаг, магадгүй хамгийн ховор схемтэй мотоциклийн хөдөлгүүрийг хүргэе. Энэ хөдөлгүүр хэвтээ байрласан зургаан цилиндртэй – гурав нь баруун, гурав нь зүүн талд байрална. Үүнийг Honda компаний инженерүүд зохиожээ.

Ийм хөдөлгүүрийг аялалын алдарт Honda Gold Wing-д суурилуулсан байдаг. Эзэлхүүн нь 1800 “куб”, 120 морины хүчин чадалтай тэнцэнэ. Хөдөлгүүр өргөнөөрөө хавтгай болсон бөгөөд хүндийн төв нь маш бага болжээ. Энэхүү Honda Gold Wing нь ер бусын тогтвортой байдлаараа алдартай билээ.