Дэлхийн нэр хүндтэй авто үйлдвэрлэгчдийн нэг Volkswagen групп энэ сарын эхний өдөр Парисын мотор шоун дээр шинэ XL Sport машинаа танилцуулжээ. Анхны XL1 загвар дээр суурилсан энэхүү шинэ машин Ducati V-Twin хөдөлгүүртэйгээр бүтээгдсэн байна. Дэлхийн хамгийн хүчирхэг хос цилиндрт мотоцикл болох Ducati 1199 Superleggera-аас хөдөлгүүрийг нь сайжруулан авсан энэхүү хөдөлгүүр нь 197 морины хүчтэй аж. Тодруулан өгүүлбэл дээрх хөдөлгүүрийн тусламжтайгаар XL Sport машин 270 км/цаг хүртэл хурдалж, 0-100 км/цагийн хурдыг 5,7 секундэд авах юм байна.
Карбон фибер болон сайжруулсан полимерээр голчлон хийгдсэн их бие нь машиныг байж болох хамгийн хөнгөн жинтэй байх үүргийг гүйцэтгэж байгаагаас гадна давтмал магни-хөнгөнцагаан дугуй зэрэг нь ч ихээхэн тус үзүүлж байгаа аж. Гайхалтай загвар, сонирхолтой сонголт бүхий энэхүү гайхамшигтай төмөр хүлэг ердөө 500-хан хувь үйлдвэрлэгдэх юм байна.