Гэрийн нөхцөлд хийх боломжтой нурууны дасгалууд. Хөдөлгөөний дутагдлаас үүдэлтэй нуруу, бэлхүүс орчмын өвдөлт, зовиурыг арилгана

Хөдөлгөөний дутагдал – нуруу, нугасны архаг өвчний эх сурвалж болно. Удаан хугацаагаар хөдөлгөөнгүй суух, компьютерийн ард ажиллах, унтаж байхдаа буруу байрлалаар хэвтэх энэ бүгд нурууны булчин сулрахад хүргэнэ. Үүний үр дагаварт булчин судасны хана, мэдрэлийн захуудыг дарж өвчний хам шинжийг бий болгоно.

Эмч нар остеохондроз, бэлгийн сулрал болон үргүйдэл хоорондоо уялдаа холбоотой болохыг тогтоожээ. Суугаа амьдралын хэв маяг зөвхөн бага аарцаг орчмын эд эрхтнийг өвчлүүлээд зогсохгүй нурууны мэдрэлүүдийг гэмтээж байдаг. Жишээ нь, эмэгтэйчүүдийн хувьд нуруу болон бэлхүүсний остеохондроз нь жирэмслэхэд саад учруулж байна.

Тусгай дасгалын тусламжтайгаар нурууны хэвийн байдлыг богино хугацаанд сэргээж болно. Та бүхэндээ нурууны булчин чангалах үр дүнтэй бөгөөд энгийн дасгалуудыг танилцуулахаар боллоо. Эдгээр дасгалыг та гэртээ хийх бүрэн боломжтой, зарим нэгийг нь бүр ажил дээрээ хийсэн ч болно.

Гэрийн нөхцөлд хийх нурууны дасгал

1. Доош бөгтийх

Тэгшхэн зогсоно, хөл мөрний хэмжээтэй. Гүнзгий амьсгал аваад дээш гараа өргөөд амьсгал гаргахдаа нуруу, хүзүүний булчинг суллан нуруугаараа доош бөгтийнө. Хүзүү болон гар сул чөлөөтэй унжиж байх ёстой. Энэ байрлалдаа хэсэг байгаад таталцлын хүчээр нуруунд яаж ачаалал ирж байгааг мэдэр. Бөгтийж байхдаа 3-4 удаа амьсгалаа авч гаргана.

Эхлэл байрлалдаа ороод нуруугаа тэгшлээрэй.

2. Эгц нуруутай бөгтийх

Эгц зогсоод хөлөө аарцагны хэмжээний зайд байрлуулна. Амьсгал авахдаа хуруугаа дээш өргөөрэй, амьсгалаа гаргахдаа нуруугаа эгц хэвээр нь доош бөгтийнө. Гараараа өвдгөө аажим барина, өвдөг шулуун. Энэ байрлалд 5 секунд барина.

Огцом ширүүн хөдөлгөөн хийхгүй, дасгалыг аажим хийх ёстой. Энэ дасгалыг хийснээр ууц нурууны-хэрээс хэсгийн булчингуудыг сунгаж чадна.

3. Сандалтай сунгалт

Маш таатай дасгал бөгөөд хаана ч хэзээ ч хийж болно. Өөрөөр хэлбэл нуруу чилж байгаа таагүй мэдрэмж төрөнгүүт эсвэл ачаалал авч байгааг мэдрэнгүүт хийгээрэй. Дасгалыг хийж эхлэнгүүт өвчин намжих болно.

Сандлын ард зогсоно, доош тонгойход гар нурууны дээр үлдэхээр тийм зайд зогсоорой. Цээжээрээ доошоо бөгтийнө. Энэ байрлалд 5-10 секунд зогсоно. Энэ дасгалыг хананд тулаад хийж ч болно. Зөвхөн нурууны төдийгүй мөрний булчингууд суларч амардаг ажээ.

4. “Муур” дасгал

Энгийн бөгөөд үр дүнтэй дасгалыг хүн болгон мэддэг гэж хэлж болно. Дөрвөн хөллөнө, нуруу шулуун, гарын алга – мөрний доор, өвдөг – өгзөгний доор байрлалд. Амьсгалаа гаргангуут нуруугаа бөгтийлгөж нумарна, эрүүгээ цээжиндээ хүргэхийг хичээж байгаа мэт, гэдсээ татна. Амьсгалаа авахдаа бэлтгэл байдалдаа ирнэ.

Дараа нь дахиж амьсгалаа гаргахдаа эсрэг чиглэлд – эрүү, зулай дээш байрлалд, хэвлийг суллана. Цээжээрээ аль болох хотойхыг хичээнэ. Дасгалыг аажим яаралгүй гүйцэтгэнэ. 10-15 удаа хийхэд хангалттай.

5. Суугаа байдлаас хийх сунгалт

Хивс эсвэл шалан дээр суугаад хөлөө урагш сунгаж тавина. Нуруу эгц, гараа дээш шулуун өргөнө, амьсгалаа авахдаа хөлийг улыг урагш сунгана, энэ хооронд өвдөг шалнаас салах ёсгүйг анхаарна уу. Нуруу, толгой болон өгзөг нэг шулуунд байх ёстойг мартаж болохгүй. 1 минут орчим энэ байрлалаар суугаад биеэ суллана.

6. “Анжис” дасгал

Энэ дасгал ядаргаа тайлж, хоол боловсруулах эрхтний үйл ажиллагааг дэмжинэ, хэвлийн өөх шатаана мөн тархины цусан хангамжийг нэмэгдүүлдэг. Сэтгэн бодох чадварыг нэмэгдүүлэх, анхаарал, ой тогтолтыг сэргээхэд ч эерэг үйлчилгээ үзүүлнэ. Гэхдээ уг байрлал хэд хэдэн хориглох заалттай: хүзүүний бэртэл гэмтэлтэй болон цусны өндөр даралттай хүмүүс хийхийг хориглоно.

Нуруугаараа дээш харан хэвтэнэ, гар их биеийн дагуу бөгөөд алгыг доош харуулна. Шулуун байгаа хөлөө аажим дээш өргөнө, хөлийн улыг өөр рүүгээ татаарай. Хөлөө аажим нүүрэндээ ойртуулна. Нуруу шалнаас хэрхэн аажим хөндийрч байгааг мэдрээрэй. Энэ байрлалд хэдэн секунд барина.

Хөлөө аажим явуулсаар толгойгоо давуулж тавихад өвдөг духан дээр ирж байгааг хараарай. Хөлийн хурууг аль болох шаланд хүргэхийг хичээгээрэй. Байрлалаа 1 минут орчим барина, тайван, гүнзгий амьсгал аваарай. Дараа нь бэлтгэл байдалдаа удаан эргэж орно.

Хэрвээ өвдгөө нугалахгүйгээр тэгшхэн байлгаж чадахгүй бол хөлөө өвдгөөр нь бага зэрэг нугалж дасгалыг хийж болно. Хамгийн том зорилго бол – нурууны арын хэсгийг сайтар ажиллуулахад оршино.

Дээрх дасгалуудыг унтахаасаа өмнө удаан, болгоомжтой хийхийг хичээгээрэй. Нурууны яс шархирч дуугарах ёсгүй. Зөөлөн хивс шалан дээр дэлгээд хийвэл илүү зохимжтой – нуруунд хэт үрэлт өгч өвтгөхгүй.

Хэрвээ дээрх цогц дасгалыг хийж дуусгаж чадахгүй байвал санаагаар бүү унаарай – хүчээр хийж огт болохгүй шүү. Дасгалуудыг хийх тоог аажим нэмэгдүүл, хэсэг хугацааны дараа таны нурууны булчингуудад гарч байгаа өөрчлөлтийг мэдрэх болно.

Эдгээр дасгалыг зөв, тогтмол хийгээд байвал зөвхөн нуруу төдийгүй биеийн ерөнхий эрүүл мэндийн байдал ч сайжирна. Таны хийсэн ажлыг нуруу тань өндрөөр үнэлэх болно шүү.

33

Бахархмаар

14

Гоё

7

Буруу

7

Гайхмаар

5

Хөөрхөн

3

Тэнэглэл

3

Ха Ха

1

Харамсалтай

Баярлалаа!