Цаг зарцуулахгүй, бөөн ажил болохгүйгээр амттан хийгээд идэх хүсэлтэй хүмүүс их л байдаг байх. Бид та бүхэнд яг тийм амттан хийх жорыг танилцуулах гэж байна.
Тоортой бялуу
Орц:
- Гурил – 2-3 стакан
- Маргарин – 200 г
- Сахар – ½ стакан (хүсвэл илүүг хийж болно)
- Чимх давс
- 1 нимбэгийн үрж авсан хальс
- Өндөг – 4 ш
- Крахмал – 100 г
- Хэдэн чимх хөөлгөгч эсвэл хутганы үзүүр дээрх сод
- Зөөхий – 4 х.х
- Хөлдөөсөн ясгүй тоор
Хийх арга:
- Маргарин, сахараа холиод дээрээс нь давс, нимбэгийн хальс, өндгөө нэмнэ. Миксерээр холиорой. Гурил, крахмал, хөөлгөгчөө хийгээд хамгийн сүүлд нь зөөхийгөө хийж хутгана.
- Бялуу хийх савны ёроолд хүнсний цаас дэвсэх эсвэл тосолно. Мөн шарсан талхны үйрмэг цацах ч бас наалдуулахгүй сайн арга. Гурилын зуурмагаа тэгш тарааж хийнэ.
- Дээрээс нь тоор жимсээ тараан тавьж 200 хэм хүртэл халаасан шарах шүүгээнд 50 минут болгоно.
Махны хачиртай бялуу
Орц:
Гурилын зуурмагт:
- Майонез – 200 г
- Зөөхий – 250 г
- Өндөг – 3 ш
- Гурил – 4-5 стакан
- Хөөлгөгч – 1 ц.х / эсвэл тал цайны халбага сод
- Давс
Хачиранд:
- Мах – 300-400 г (үхэр, гахай, тахиа гээд дуртай махаа хийгээрэй)
- Дунд зэргийн төмс – 3-4 ш
- Сонгино – 1 том
- Давс
- Нунтаг хар перец
Хийх арга:
- Майонез, зөөхий болон өндгөө хийж сайтар холино. Дээрээс нь хөөлгөгч, гурил, давсаа хийж зуурна. Зуурсан гурилаа хэсэг амраана.
- Махан хачираа бэлдэнэ: махаа машиндаад, сонгино, төмсөө жижиглэн хэрчиж давс, перецээр амтлаад бүгдийг холино.
- Шарах шүүгээний хавтангаа тослоод тал гурилаа элдэж тавина. Дээрээс нь махныхаа хачирыг тараан тавьж үлдсэн гурилаа элдэж дээрээс нь битүүлж тавина.
- 180 хэмд 60-70 орчим минут болгоно. Хэрвээ дээд хэсэг нь түлэгдэх гээд байвал мөнгөлөг цаасаар битүүлж тавиарай. Доороосоо түлэгдэх гээд байвал устай сав дор нь тавина.
Аарцтай бялуу
Орц:
Гурилын зуурмагт:
- Гурил – 2 стакан
- Маргарин – 150 г
- Сахар – 1/3 стакан
- Сод – ½ ц.х
- Нимбэг эсвэл жүржийн шүүс – 1 х.х
Хачиранд:
- Аарц – 250 г
- Сахар – 1/3 стакан
- Өндөг – 2 ш
- Чимх ванилин
Хийх арга:
- Маргаринаа хутгаар жижиглэн бага багаар гурил, сахар, сод, нимбэгийн шүүсээ хийж холино. Элс мэт бутарсан зуурмаг болно.
- Хуурай саванд гурилын зуурмагаа хийж сайтар нухна.
- Аарц, өндөг, сахар болон ванилаа миксерээр холино. Гурилын зуурмагаа шарах шүүгээний хавтан дээр жигд тараана.
- 180 хэмд 30-40 минут болгоно.
Бяслагтай бялуу
Орц:
- Өндөг – 2 ш
- Тараг – 1 стакан
- Сод – ½ ц.х
- Гурил – 1 стакан
- Давс – ½ ц.х
- Хатуу бяслаг – 250 г
- Зайдас – 200 г (гахайн утсан мах, хиам байж болно)
- Ногоон навчит ногоо
Хийх арга:
- Давс, 2 өндгөө сайтар холино.
- Сод, таргаа холиод хэдэн минут амрааж байгаад өндөг дээрээ нэмнэ.
- Гурилаа хийж зуурна.
- Том ширхэгтэй үрүүлээр бяслагаа үрж, ногоон навчит ногоогоо жижиглэн хэрчинэ. Зайдас, гахайн мах эсвэл хиамаа нарийхан уртаар нь хэрчинэ. Бүгдийг зуурсан гурил дээрээ хийж сайн нухна.
- Шарах шүүгээний хавтанг тослон дээрээс нь шарсан талхны үйрмэг эсвэл хүүхдийн будаа цацна. Зуурмагаа тараан тавьж халбагаар тэгшилнэ.
- 200 хэмд халсан шарах шүүгээнд 25 минут болгоно.
Гадилтай бялуу
Орц:
- Маргарин эсвэл цөцгийн тос – 100 г
- Өндөг – 2 ш
- Сахар – 1,5 стакан
- Гурил – 2 стакан
- Хөөлгөгч – 2 ц.х
- Ванилийн сахар – 1 ц.х
- Давс – хутганы үзүүр дээр
- Гадил – 2 ш
- Сүү – 150 г
Хийх арга:
- Гадилаа хальснаас нь салган сэрээгээр нухна. Тасалгааны хэмд хайлмагтуулсан цөцгийн тосоо сахартай хольж миксердэнэ. Нухсан гадилаа цөцгийн тосон дээрээ хийж сайтар холино.
- Зуурмагтаа ванилийн сахар, сүү, чимх давсаа хийгээд холиорой.
- Өндгөө нэг нэгээр нэмж миксерийн бага хурдаар холино. Хамгийн сүүлчийн хийх орц бол хөөлгөгч хийсэн гурил байна. Гурилаа сайн зуурна.
- Бялуу болгох хэвээ сайтар тослоод гурилаа тараан тавина. 180-190 хэмд 30-40 минут болгоно.
Nergui Undarmaa
2016/02/06 at 21:46
zaya Undarmaa Zaya