Амьдаараа зоогийн ер бусын тансаг идээ болдог амьтад

Нийтлэгч: Лука

Огноо: 2013/05/07

Total0
0

“Газарзүйн хувьд харьцангуй хол газар нутгуудын хооронд хийгдэх хүмүүс болон обьектууд /онгоц, завь, галт тэрэг болон бусад тээврийн хэрэгслүүд/-ын хийх шилжилт хөдөлгөөнийг аялал жуулчлал гэнэ.” гэсэн тодорхойлолт байдаг. Өнөөгийн хүн төрөлхтний амьдралын салшгүй хэсэг болсон аялал жуулчлалын онцлог нь ямар нэгэн газар нутаг, үзмэрийг үзэж сонирхох, улс орны соёл, зан заншилтай танилцах байдаг бөгөөд аялалаар яваа хүн очсон улс орныхоо үндэсний хоол, зоогийг амталж үзэх нь аялалын хамгийн онцгой, чухал хэсэг байдаг. Улс орон бүрийн үндэсний хоол зоог харилцан адилгүй байхын зэрэгцээ санаанд оромгүй өвөрмөц сэтгэгдлийг төрүүлэхүйц хоол хүнс олон бий. Зарим нутагт хэдэн сараас эхлээд хэдэн сараар газрын хөрсөнд нөөшлөн даршилсан хоол хүнсийг амттай сайхан гэж үздэг байхад өөр нэг газарт түүхий эд бүтээгдэхүүнийг хамгийн шинэ соргог дээр нь хоол зоог болгон бэлтгэхийг илүүд үздэг байх жишээтэй. Энд бид хорвоо дээрх хамгийн хачирхалтай, хамгийн өвөрмөц нарийн хоол зоогнуудын дээжээс сонирхуулж байгаа ба хамгийн онцлууштай нь эдгээр нарийн тансаг зоог идээг амьд амьтдаар бэлтгэдэг гэдэг нь юм.

Саннакжи /Sannakji/

Солонгосын зэгсэн алдартай, нийтлэг зоог болох саннакжи. Энэ хоолны гол орц нь жижиг наймаалж юм. Гүнжидийн үр, гүнжидийн тостой хамт амьдаар нь олгодог энэ зоогийг бэлтгэхдээ наймаалжийг тэмтрүүлнүүдтэй нь хамт ашигладаг. Хамгийн эвгүйцмээр нь саннакжиг зооглох үед наймаалжны тэмтрүүлнүүд муриганан хөдөлсөөр байдаг байна. Түүнчлэн саннакжиг идэхэд бас нэг аюул тулгардаг нь наймаалжны тэмтрүүл хоолойнд наалдан хахах тохиолдлууд байдаг аж.

Далайн зараа

Италид нутгийн иргэд өөрсдөө далайн зарааг барьж, тэр дор нь хоолонд хэрэглэдэг. Энэ амьтны идэж болдог хэсэг нь дотроо байдаг ба ердийн хайч эсвэл тусгай багаж ашиглан доторх хэсгийг нь гаргадаг. Нимбэгтэй хамт зооглодог энэ шүлс асгарам амттай зоог нь ердөө ганцхан халбага төдий хэмжээтэй байдаг байна.

Японы сашими /түүхий/ зоог Одори Эби буюу жижигхэн амьд сам хорхой

Энэхүү үет хөлтнийг зарим тохиолдолд толгойтой нь хамт хайрснаас нь салгаад багахан шараад тусгай соустай хамт олгодог. Зарим зоогийн газруудын хамгийн үнэтэй зоогоор нэрлэгддэг амьд сам хорхойг идэхдээ цагаан будааны архи буюу сакэнд дүрж идэх ба хамгийн гол нь сам хорхойг амьдаар нь хайрснаас нь салгаж бэлтгэнэ гэдэг тогоочоос багагүй хурд, ур чадварыг шаарддаг байна.

Согтуу сам хорхой – Хятад зоог

Японы Одори Эби сашимитай их төстэй энэ зоогоор зөвхөн насанд хүрсэн хүмүүст үйлчилдэг. Учир нь амьд сам хорхойнуудыг Хятадын Байжу хэмээх нэрмэл архинд хийн согтоогоод дараа нь амьдаар нь зооглодог.

Шоргоолжны салат

Нома хэмээх сүлжээ зоогийн газрын 300 долларын шоргоолжны салат нь амьд шоргоолжнуудаар хийгддэг. Нимбэгтэй адилхан амттай энэ салатныхаа шоргоолжийг тус зоогийн газар өөрсдөө тэжээдэг байна.

Казу Марзиех бяслаг /Kazu Marzieh/

Казу Марзиех бол хонины сүүгээр хийдэг Сардины уламжлалт бяслаг юм. Сүү бол амьтан биш, гэтэл үүнийг амьдаар нь иддэг хоол гэсэн нь ямар учиртай юм бол гэж гайхах тань гарцаагүй. Тэгвэл Сардиничууд энэ бяслагаа зориудаар өтүүлж байж иддэг байна. Бяслаганд үржсэн ялааны өт нь бяслагны тосон суурийг үгүй хийдэг ба амьд өтнүүд бүхий бяслагийг идэхэд маш зөөлөн, шүүслэг байдаг байна.

Мэлхийний сашими

Энэ зоог нь харьцангуй алдартай зоог. Амьд мэлхийний дотор гэдсийг санал болгодог энэ зоогны гол онцлог нь мэлхийний цохилж байгаа зүрх байдаг. Зарим зоогийн газарт хэрхэн амьд мэлхийн зоогийг бэлтгэж байгааг зочиддоо харуулдаг.

Икизукури /Ikizukuri/

Загасан сашимигийн нэг төрөл болох энэ зоог нь Японы тансаг зоогнуудын нэг. Төрөл бүрийн загас бүхий том аквариумнаас хүссэн далайн амьтнаа сонгон бэлтгүүлж зооглохыг санал болгодог зоогийн газрын икизукури нь загаснуудын нүд нь эргэлдэн хөдөлж, ам нь ангалзаж байдаг аж.

Инь Янь

Энэ бол амьд болон үхсэн загасны нэгдэл болсон зоог бөгөөд үүнийг бэлтгэхийн тулд загасны дотор эрхтнүүдийг гэмтээхгүйгээр тосонд маш хурдан, маш анхааралтайгаар шардаг ба үүний дараа дахин бүтэн хагас цаг чанахад ч загас амьд хэвээрээ байдаг байна.

Хясаа

Хясааг амьдаар нь зооглоно гэдгийг олон хүн ойлгодоггүй. Хясаа нь үхсэнийхээ дараа амт нь маш хурдан илт мууддаг учир ийнхүү амьдаар нь зооглодог. Хясааны хальсыг нээсэн ч хясаа нилээд урт хугацааны турш амьд хэвээр байдаг ба зөвхөн тэдний махыг хатуу хальснаас салгах үед л үхэж эхэлдэг байна.