Галанд дурласан Ус буюу Усанд дурласан Гал

Гал хүү, Дусал охин бие биенийгээ анх хараад л дурлажээ. Гал хүүгийн цогтой гялалзах нүд Дусал охины сэтгэлийг хөдөлгөсөн бол Дусал охины тунгалаг дөлгөөн харц Гал хүүгийн хайрыг татсан байна. Харц харцандаа татагдсан тэд бие биедээ дөхсөөр хурууных нь үзүүр хүрэлцэх үед шархийх чимээ гарч, уур дэгдлээ. Сандарч тэвдсэн тэд бие биедээ хүрч болохгүйг ухаарсан байна. Гэхдээ чулуугаар дамжуулан гар гараасаа барилцаж болохыг мэдэж, хөндлөн хөх чулууг холбох гүүр болгон алхлаа. Явсаар хоргодох бяцхан агуй олж, ядарсандаа хоромхон зуур унтчихжээ. Гал хүү сэрээд хартал хайрттай нь холбож байсан чулууг шоргоолжнууд аваад явж байгаа харагдав. Сандран гүйж очоод чулуугаа шүүрэн автал өөрийг нь хүн аваад явчих нь тэр. Хүний гэрийг гэрэлтүүлэн дэнлүү болон асах Гал хүү дээрээ ирсэн Дусал охин дэнлүүний дэргэд суусаар ядарч унтлаа. Гэтэл шилэн дэнлүүн дотор асах Гал хүүгийн халуун илч Дусал охиныг аажим аажмаар ууршуулсаар Дусал охин агаарт замхран одов. Хөөрхий Гал хүү яахаа мэдэхгүй бачимдан гуниглаж байтал хүн ирж, дэнлүүг унтраалаа. Дэнгийн гэрэл унтрах үед гарсан утаанд шингэсэн Гал хүүгийн сүнс тэнгэрт байгаа Дусал охины сүнстэй уулзаж,тэд хамтдаа айх аюулгүй хүссэнээрээ хөтлөлцөн хөх тэнгэрээр дүүлэн нисжээ.

7

Гоё

1

Бахархмаар

1

Гайхмаар

0

Ха Ха

0

Хөөрхөн

0

Харамсалтай

0

Тэнэглэл

0

Буруу

Баярлалаа!