Дэлхийн хамгийн гайхалтай 12 шат

Нийтлэгч: Лука

Огноо: 2013/07/14

Total13
13

Байшин барилга, өгсүүр өндөр газруудад зайлшгүй байдаг нэг зүйл болох олон гишгүүр бүхий шатыг дэргэд нь өөр хэлбэрийн, илүү амар хялбар замыг санал болгох цахилгаан болон урсдаг шат зэрэг зүйл байгаа тохиолдолд ихэнх хүн сонгохоос татгалздаг. Учир нь ердийн гишгүүрнүүд бүхий шат нь уйтгартай бөгөөд багагүй хүчин чармайлт шаарддаг. Гэтэл өнөө цагийн хөдөлгөөнгүй хэв маягийн амьдралтай хүн төрөлхтөнд хэсэгхэн зуурын ч болтугай хөдөлгөөнийг мэдрүүлж, эрүүл, идэвхтэй амьдралын хэв маягийг санал болгодог шат хэмээгч зүйл нь зарим газруудад гайхалтай дизайн болон орчны газар нутгийн ер бусын харагдах байдлаараа аялагч жуулчид болоод нутгийн оршин суугчдыг татаж, зайлшгүй хэрэглэгдэж чаддагаараа онцгойрдог байна. Манай Улаанбаатар хотод гэхэд нэг ийм шат байдаг нь Зайсан толгойн орой дээр байрлах хөшөөт цогцолборт хүргэдэг шат бөгөөд энэхүү шатаар өгсөж байгаа хүн бүрийн амнаас хэдэн гишгүүртэй гэдэг билээ хэмээн нэгбүрчлэн тоолох, өө тоогоо алдчихлаа гэх мэт үгсийг сонсож болдог билээ. Гишгүүр бүрийг нь гишгэн өгсөх хүслийг хүмүүст төрүүлдэг Дэлхийн хамгийн гайхалтай 12 шатны талаарх мэдээллийг энд бэлтгэсэн байгаа маань дээрх оршлын үргэлжлэл гэдгийг дуулгахад баяртай байна.

1. Буэрен уул, Бельги /Bueren Mountain/

Буэрен уул бол үнэн хэрэгтээ жинхэнэ уул биш юм. Бельгийн Лиеге хотод орших 374 гишгүүр бүхий энэхүү урт шат нь 1881 онд аюул ослоор дүүрэн зөрөг замаар явалгүйгээр толгойн өөд өгсөн гарч, төв рүү уруудан буух боломжийг цэргүүдэд олгохоор баригдсан байна.

Энэхүү байгууламж 15-р зуунд Бургундын гүнгийн дайралтаас Лиеге хотыг хамгаалсан язгууртан Винсент де Буэрен /Vincent de Bueren/-ий нэрээр нэрлэгдсэн бөгөөд урьд нь хотын хамгаалалтын бэхлэлт болж байсан Буэрен уулаас холгүй хамгаалалт нь ихээхэн хэмжээгээр сүйдэж байжээ.

Уг шатаар өгсөн Буэрен уулын оройд нь гарахад Лиеге хот болоод Дэлхийн хамгийн хөгшин голуудын нэг болох Мьюз /Meuse/ голын үзэсгэлэн төгөлдөр байдлаар нүдээ хужирлах боломжтой юм.

2. Испани дахь тэнгисийн усан дээгүүрх шат

Испаний Gaztelugatxe хэмээх жижиг арал дээр энэхүү үзэсгэлэнт шат оршдог.

Хүний гараар бүтээгдсэн гүүрээр эх газартай холбогддог энэхүү арлын орой дээр цаг үеийн хувьд 10-р зуун магадгүй бүр 9-р зуунтай ч холбогдож магадгүй даяанчийн агуй байрладаг.

Энэхүү даяанчийн агуйд нарийхан замаар хүрэх ба чулуу өрж хийсэн уг замыг 237 гишгүүртэй гэдэг ч зарим эх сурвалжид 229 эсвэл 231 ч гэж бичсэн байдаг.

Зун цагт аялагч жуулчдаар дүүрэн байдаг энэ газарт айлчилж очин даяанчийн агуйд тайван, эрх чөлөөтэй морилох цаг нь хавар, намар байдаг аж.

3. Хятадын Тайханг /Taihang/ уулан дахь мушгиа хэлбэрийн шат

Хятадын Линжоу мужийн нутаг дэвсгэрт Тайханг нэртэй уул бий. Энэ уулын энгэр дагуу байрлах 91,5 метр өндөртэй мушгиа хэлбэрийн шат нь айх аюулгүй уулын спортын гайхамшгийг санал болгодог. Ямар нэгэн тусгай тоног хэрэгсэл шаардахгүйгээр өндөр уулын оройд гарах боломжийг олгох энэ шатаар өгсөх нь хэзээ ч үл мартах гайхамшигтай дурсамжийг үлдээдэг байна.

Салхи салхилж, шувууд дэргэдүүр нисэхийн зэрэгцээ шат чихран дуугарах нь цахилгаан шатнаас хувь илүү гайхалтай мэдрэмжийг төрүүлдэг хэмээн тус шатны албаны хүмүүс мэдэгдэх аж.

Уг шатаар өгсөхийг 60-аас доош насны, зүрх судас болон уушгины ямар нэгэн асуудалгүй болох нь батлагдсан хүмүүст зөвшөөрдөг байна.

4. Япон, Аважи Хякуданэн /Awaji Hyakudanen/

Аважи Юмэбутай /Awaji Yumebutai/ буюу Мөрөөдлийн шат нэртэй энэхүү цогцолбор нь Японы Хёго мужийн Аважи арал дээр байрладаг.

Аважи Юмэбутайн цэцэрлэгүүдийн нэг нь 100 давхар цэцэрлэг буюу Японоор Хякуданэн нэртэй цэцэрлэг бөгөөд хашаа бүхий жижиг цэцэрлэгүүдээс бүрдсэн үзэсгэлэнтэй сайхан цэцэрлэг юм.

1995 онд Ханшин хэмээх их газар хөдлөлтийн дурсгалд зориулагдан баригдсан энэ цэцэрлэгийг Осакагийн булан дахь хиймэл арлуудыг барих барилгын ажлын үеэр тэнгисийг дүүргэх зорилгоор 90-ээд оны эхэн үеэр талыг нь авч орхисон уулын хэвгий дээр байгуулсан байна.

5. Нидерланд, Moses Bridge stairs

Форт де Роовере /Fort de Roovere/ бэхлэлт нь 17-р зууны эхэн үед устай шуудуугаар хүрээлэгдэн баригдсан ба анх баригдах үедээ гүүргүй байжээ. Саяхан хийгдсэн сэргээн босгох хөтөлбөрийн үеэр нэмэлтээр гүүр барих шаардлагатай болсон байна.

Устай шуудуун дээгүүрх уг гүүрийг Нидерландын Ro&Ad Architecten пүүс зураг төслийг гарган барьсан ба хамгийн онцгой нь дээш доош өгсөж уруудах шат бүхий уг гүүр усанд суусан байдалтайгаар баригдсан явдал юм.

Бэхлэлтийг анх барих үед шуудууг умард хэсэгтээ газраар тусгаарлагдсан байдлаар барьсан ба үерлэсэн үед уг гарам дайсны хөл гишгэх боломжгүй болохоор барьсан байна. Харин гүехэн хэсэгтээ завь ашиглан явах боломжтой байжээ.

Одоо бол хоёр төгсгөлд нь хоёр даланг байгуулж өгснөөр усны түвшин өссөн ч далангаар хязгаарлагдан гүүр рүү урсаж орох нөхцөлгүй болсон байна.

6. Эквадор, Хавцлын шат /Canyon Steps/

Эквадорын Пайлон дел Диабло /Pailon del Diablo/ хүрхрээний дэргэд орших энэхүү алдарт Хавцлын шат нь энэ газрын хамгийн алдартай жуулчдыг татах газруудын нэг юм. Эквадорын Банос хотоос 30 минутын зайд орших Пайлон дел Диабло хүрхрээний дэргэд орших энэ мушгирсан шатаар Эквадорт очсон хүн бүр гарахгүй байхын аргагүй юм.

7. Энэтхэг, Чанд Баори /Chand Baori/

Энэтхэгийн Ражастан мужийн нийслэл Жайпур хотын дэргэд орших Абханери тосгонд Чанд Баори хэмээх алдартай шат бий.

МЭ 800 онд баригдсан 3500 нарийн гишгүүр бүхий 13 давхар энэ шат газрын гүн рүү 30 метрт хүргэх ба Энэтхэгт байдаг хамгийн гүн, хамгийн том шатат худаг гэгддэг.

Туйлын хуурай Ражастан мужид усыг хадгалах хамгийн боломжтой арга хэлбэр хэмээгдэн баригдсан энэ шатат худгийн ёроолд агаарын температур газрын гадаргуу дээрхээс 5-6 хэмээр доогуур байдаг ба хүчтэй халалтын үеэр нутгийн иргэдийн нийтээр эзэмших газар болон ашиглагдаж байжээ.

8. Грек, Санторини Стейрвей /Santorini Stairway/

1715 онд арлын оршин суугчид эгц уулын хэвгий дээр болхидуу шат тавьсан нь тэднийг уулын орой өөд гарах боломжтой болгосон. Түүнээс өмнө арал дээр ирсэн хөлөг онгоцноос хот руу ачаа бараа болон зорчигчдыг тээвэрлэхэд илжигнүүдийг ашигладаг байсан байна. 1930 онд шатыг сайжруулсан ч өгсөж уруудахад илжиг ашигласаар байв. Харин 1979 онд хүмүүсийг олноор нь тээвэрлэх автомат утас бүхий бүхээгтэй болсон ч одоог хүртэл хөгжилтэй хэлбэрээр уулын оройд гарахад илжгийг ашигласаар байгаа аж.

Тэнгисийн эргээс хот руу хүрэх зиг заг хэлбэрийн шатыг чулуугаар хучсан нь өнгөрсөн цаг үе рүү хөтлөх гайхалтай мэдрэмжийг төрүүлдэг. 1300 метр урт энэ шат 10 см өндөртэй гишгүүрнүүдтэй.

9. Австри, Шлосберг шат /Schlossberg Stairs/

Австрийн хоёр дахь том хот болох Граз хотын гол үзмэр бол Шлосберг буюу Castle Hill. Хотын аль ч өнцгөөс бахдам дүр төрхтэйгээр үзэгдэх энэ модод толгойн орой дээрээс Граз хот болон түүний эргэн тойрны үзэсгэлэнг тольдох боломжтой. Энэхүү толгойн оройд Шлосберг шат хүргэнэ.

Шлосберг толгойн элгэн хадан дундуур өөдөө өгсөх боломжийг олгох энэхүү шатны 260 гишгүүрээр алхаж яваа хэнд ч гайхалтай мэдрэмж төрдөг.

10. Украйн, Потемкин шат /Potemkin stairs/

Украйны Одесс хот дахь аварга том шат болох Потемкин шат нь Одесс хотын билэг тэмдэг бөгөөд тэнгисийн зүгээс хот руу очих гол зам болдог байна.

Приморскийн шат гэж албан ёсоор нэрлэгддэг энэ шат анх Болевард шат, Аварга шат зэргээр нэрлэгдэж байв. Хамгийн дээд талын шатны өргөн 12,5 м бол хамгийн доод талын шатны өргөн 21,7 м, шатны нийт өндөр 27 м, урт нь 142 м бөгөөд доод хэсэг нь өргөн, дээд хэсэг нь арай богиноосоо хамааран маш урт сунасан мэт харагддаг байна.

11. АНУ, Хавай, Хайку шат /Haiku Stairs/

Диваажингийн шат хэмээгддэг энэ шат Хавайн арлуудын гурав дахь том арал болох Оаху /Oahu/ арал дээр оршдог. Уг арлын өндөр толгодын орой дээр гарах явган аялалын зам болох энэ шатыг Haiku Ladder ч гэж нэрлэдэг.

Хайку хөндийн өмнөд хэсэг дэх хадан цохионд зоосон модон шатаар эхлэх уг шатыг 1942 онд Хайку хөндийн дээгүүр нэг талын хадан цохионоос нөгөө талын хадан цохио хүртэл антенны кабель зоохоор анх суурилуулсан байна.

Вахайва болон Хайку хөндийн хооронд тогтмол холбоо барих боломжийг бүрдүүлэхээр 850 метр өндөр өргөгдсөн Пу’укеахиакахое уулын орой дээр тэнгисийн радио станцын барилга барьжээ.

2003 онд 875,000 долларын үнээр шатанд засвар хийсэн ч 2012 оны эхэн үед ч газар ашиглалтын гэрээ хараахан шийдвэрлэгдээгүй байжээ. Хонолулу хотын захиргаа одоогоор өр төлбөрийн асуудлаас хамааран уг шатыг олон нийтэд нээх төлөвлөгөөгүй байгаагаа мэдэгдсэн байна.

12. Швейцарь, Бриж-Стейр /Bridge-Stair/

Швейцарийн Граубунден мужийн Тусис болон Зиллис-Рейшен хотууд, Хинтеррхейн голуудын дунд орших замын Виа Мала хэмээх эртний алдартай хэсгийн дээгүүрх Траверсинертобел /Traversinertobel/ дээгүүрх гүүр хэмээх энэхүү гүүрийг инженер Жург Конзетт /Jurg Conzett/ туслах Ролф Бачофнер /Rolf Bachofner/-ын хамт барьжээ.

Нарийн хавцлын дээгүүрх хоёр өөр түвшинд өргөгдсөн хэсгийг холбохын тулд тэд шат ашигласан ба хадны гулгалтанд арчигдаж үгүй болсон олсон гүүрийг шатаар сольсон байна. Хоёр төгсгөлийн хоорондох 22 метрийн өндрийн зөрүүг 56 метрийн урттай, гишгүүрүүд бүхий дүүжин гүүрээр холбожээ.

Нэмэлт шат 1. Герман дахь Урлагийн илэрхийлэл шат

21 метр өндөртэй энэ шатыг Tiger and Turtle – Magic Mountain гэж нэрлэдэг. Германы Дуйсбург хотын толгодын орой дээр байрладаг энэ шат нь ган төмрөөр хийгджээ.

Галзуу хулганы замыг санагдуулам гогцоо бүхий энэ зам аялагчид болоод хотын иргэдийн очих дуртай газрын нэг юм.

Уг шатат замыг Хайке Мюттер /Heike Mutter/, Ульрих Гент /Ulrich Genth/ нар бүтээсэн байна.

Уг байгууламжийн хамгийн өндөр хэсэг нь газраас 21 метрийн өндөрт байрладаг ба энд ирсэн хүмүүс Рур голын үзэсгэлэнт байдлыг харах боломжтой.

Нэмэлт шат 2. Нэгдсэн Вант улс дахь Урлагийн илэрхийлэл шат

Universe Cascade нэртэй энэ шат Шотландын Дамфрайс хотын Сансрын төсөөллийн цэцэрлэгийн ар талын налуу дээр байрладаг.

Өгсөж уруудаж яваа хүмүүст зориулан үе болгонд бясалгалын сандал байрлуулжээ.

Хэрээс хэлбэрийн энэ шат том гэгчийн усан сангаас дээш өгсөн толгойн орой дээрх нээлттэй асарт хүрдэг. Энэхүү цэцэрлэг нь хувийн өмч боловч жилдээ нэг удаа олон нийтэд нээлттэй байдаг байна.