Төмстэй хоолны жор бол баялаг их: төмсний нухаш, шарсан төмс, франц маягаар болгосон төмс гэх мэт…
Энэ удаад нугалаат-төмсний жорыг танд танилцуулж байна. Бэлдэхэд цаг бага орж, тогоочийн ур чадвар нэг их шаардахгүй юм.
Орц:
- Дунд зэргийн төмс – 2ш
- Бекон, хиам, утсан гахайн мах
- Ургамлын тос – 2-3 х.х
- Карри – 1 ц.х
- Цуу – 1 х.х
- Хүссэн хэмжээгээрээ давс, перец
Бэлдэх арга:
1. Аль болох адил хэмжээтэй хоёр төмсийг сонгож арилгаад сайтар угаана. Төмсний доор хоолны халбага тавьж хутгаар нарийхан нарийхан хэрчинэ. Хоолны халбага нь төмсийг бүтэн хэрчүүлэхгүй тээглүүрийн зориулалттай юм.
2. Зүссэн төмсөө мөнгөлөг цаасанд ороож 200 хэм хүртэл халаасан шарах шүүгээнд 30 минут шарна.
3. Төмс шарагдаж байх хооронд хиам эсвэл бекон зэргийг төмснөөс илүү гарч унжаад байхааргүй хэмжээтэй нарийхан хэрчиж бэлдэнэ. Дээрээс нь давс, нунтаг хар перец, багахан ургамлын тос дусааж холино.
4. Соусыг бэлдэх: тавганд цуу, карри болон ургамлын тосоо хийж сайтар хутгана.
5. Хагас цагийн дараа шарах шүүгээнээс төмсөө гаргаж төмсний хэрчим болгонд болгоомжтой амталж бэлдсэн бекон, хиамаа хийж дээрээс соусаа харамлалгүй ахиухан асгана.
6. Мөнгөлөг цаасандаа буцаан ороож 10 минут шарах шүүгээнд шарна (хэм нь өмнөхтэй адил).
Хэрвээ хүсч байвал дээрээс нь бяслаг болон бусад амтлагч цацаж болно. Сайхан хооллоорой.